vo lamha jab mire bachche ne maañ pukārā mujhe

maiñ ek shāḳh se kitnā ghanā daraḳht huī

wo lamha jab mere bachche ne man pukara mujhe

main ek shaKH se kitna ghana daraKHt hui

raushan-dān se dhuup kā TukḌā aa kar mere paas girā

aur phir sūraj ne koshish kī mujh se aañkh milāne kī

raushan-dan se dhup ka TukDa aa kar mere pas gira

aur phir suraj ne koshish ki mujh se aankh milane ki

ham aur tum jo badal ga.e to itnī hairat kyā

aks badalte rahte haiñ ā.īnoñ kī ḳhātir

hum aur tum jo badal gae to itni hairat kya

aks badalte rahte hain aainon ki KHatir

logo! ham pardesī ho kar jaane kyā kyā kho baiThe

apne kūche bhī lagte haiñ begāne begāne se

logo! hum pardesi ho kar jaane kya kya kho baiThe

apne kuche bhi lagte hain begane begane se

ajab mazāq us kā thā ki sar se paañv tak mujhe

vafāoñ se bhigo diyā nadāmatoñ kī soch meñ

ajab mazaq us ka tha ki sar se panw tak mujhe

wafaon se bhigo diya nadamaton ki soch mein

mirī almāriyoñ meñ qīmtī sāmān kaafī thā

magar achchhā lagā us se ka.ī farmā.isheñ karnā

meri almariyon mein qimti saman kafi tha

magar achchha laga us se kai farmaishen karna

havā kī tez-gāmiyoñ kā inkishāf kyā kareñ

jo dosh par liye ho us ke bar-ḳhilāf kyā kareñ

hawa ki tez-gamiyon ka inkishaf kya karen

jo dosh par liye ho us ke bar-KHilaf kya karen

kañkar pheñk rahe haiñ ye andāza karne ko

Thahrā paanī kitnī 'humairā' halchal rakhtā hai

kankar phenk rahe hain ye andaza karne ko

Thahra pani kitni 'humaira' halchal rakhta hai

guzashta mausamoñ meñ bujh ga.e haiñ rañg phūloñ ke

darīcha ab bhī merā raushnī ke zāviyoñ par hai

guzashta mausamon mein bujh gae hain rang phulon ke

daricha ab bhi mera raushni ke zawiyon par hai