نہ دل میں کوئی غم رہے نہ میری آنکھ نم رہے

ہر ایک درد کو مٹا شراب لا شراب دے

بس ایک بار ہی توڑا جہاں نے عہد وفا

کسی سے ہم نے پھر عہد وفا کیا ہی نہیں

زندگی وادی و صحرا کا سفر ہے کیوں ہے

اتنی ویران مری راہگزر ہے کیوں ہے

محفل یاراں میں دیوانوں کا عالم کچھ نہ پوچھ

جام ہاتھوں میں اٹھائیں تو چھلکنا چاہیے

تری زمیں سے اٹھیں گے تو آسماں ہوں گے

ہم ایسے لوگ زمانے میں پھر کہاں ہوں گے

کریں سلام اسے تو کوئی جواب نہ دے

الٰہی اتنا بھی اس شخص کو حجاب نہ دے

رات بھر تنہا رہا دن بھر اکیلا میں ہی تھا

شہر کی آبادیوں میں اپنے جیسا میں ہی تھا

مجھے نہ دیکھو مرے جسم کا دھواں دیکھو

جلا ہے کیسے یہ آباد سا مکاں دیکھو

کوئی تو ہوگا جس کو مرا انتظار ہے

کہتا ہے دل کہ شہر تمنا میں لے کے چل

تھی حوصلے کی بات زمانے میں زندگی

قدموں کا فاصلہ بھی یہاں ایک جست تھا

کوئی بھروسہ نہیں ابر کے برسنے کا

بڑھے گی پیاس کی شدت نہ آسماں دیکھو

نہیں ہے تم میں سلیقہ جو گھر بنانے کا

تو اشکؔ جاؤ پرندوں کے آشیاں دیکھو

خود اپنے آپ سے لینا تھا انتقام مجھے

میں اپنے ہاتھ کے پتھر سے سنگسار ہوا

کس لیے کترا کے جاتا ہے مسافر دم تو لے

آج سوکھا پیڑ ہوں کل تیرا سایا میں ہی تھا

چلے گئے تو پکارے گی ہر صدا ہم کو

نہ جانے کتنی زبانوں سے ہم بیاں ہوں گے

یہ اور بات ہے کہ برہنہ تھی زندگی

موجود پھر بھی میرے بدن پر لباس تھا

دنیا بہت قریب سے اٹھ کر چلی گئی

بیٹھا میں اپنے گھر میں اکیلا ہی رہ گیا

بکھرے ہوئے تھے لوگ خود اپنے وجود میں

انساں کی زندگی کا عجب بندوبست تھا

زندگی اپنی مسلسل چاہتوں کا اک سفر

اس سفر میں بارہا مل کر بچھڑ جاتا ہے وہ