یہ محبت بھی ایک نیکی ہے

اس کو دریا میں ڈال آتے ہیں

پکارتے تھے مجھے آسماں مگر میں نے

قیام کرنے کو یہ خاک داں پسند کیا

ایک لمحہ لوٹ کر آیا نہیں

یہ برس بھی رائیگاں رخصت ہوا

دریا کو کنارے سے کیا دیکھتے رہتے ہو

اندر سے کبھی دیکھو کیسا نظر آتا ہے

نیند سے جاگا ہوں تو بیٹھا سوچتا ہوں

خواب میں اس کو پایا تھا یا سایا تھا

اپنی ہی روانی میں بہتا نظر آتا ہے

یہ شہر بلندی سے دریا نظر آتا ہے

بجھ جائے گا اک روز تری یاد کا شعلہ

لیکن مرے سینے میں دھواں یوں ہی رہے گا

جیے گرچہ اسی دنیا میں ہم بھی

مگر دنیا ہماری اور ہی تھی

ہم ٹھہرے رہیں گے کسی تعبیر کو تھامے

آنکھوں میں کوئی خواب رواں یوں ہی رہے گا

جو تیری آرزو مجھ کو نہ ہوتی

تو کوئی دوسرا آزار ہوتا

زمانہ ہے برے ہمسائے جیسا

سو ہمسائے سے جھگڑا کر چکے ہیں

خاموش کھڑا ہوں میں در خواب سے باہر

کیا جانیے کب تک اسی حالت میں رہوں گا

کچھ روز ابھی اور ہے یہ آئنہ خانہ

کچھ روز ابھی اور میں حیرت میں رہوں گا

وہ دل جس نے ہمیں رسوا کیا تھا

ہم آج اس دل کو رسوا کر چکے ہیں

کبھی لوٹ آیا میں دشت سے تو یہ شہر بھی

اسی گرد میں تھا اٹا ہوا مرے سامنے

جس روز ترے ہجر سے فرصت میں رہوں گا

معلوم نہیں کون سی وحشت میں رہوں گا