qadam milā ke zamāne ke saath chal na sake

bahut sambhal ke chale ham magar sambhal na sake

qadam mila ke zamane ke sath chal na sake

bahut sambhal ke chale hum magar sambhal na sake

ishq ko ek umr chāhiye aur

umr kā koī e'tibār nahīñ

ishq ko ek umr chahiye aur

umr ka koi e'tibar nahin

tum nahīñ paas koī paas nahīñ

ab mujhe zindagī kī aas nahīñ

tum nahin pas koi pas nahin

ab mujhe zindagi ki aas nahin

nahīñ ilāj-e-ġham-e-hijr-e-yār kyā kiije

taḌap rahā hai dil-e-be-qarār kiyā kiije

nahin ilaj-e-gham-e-hijr-e-yar kya kije

taDap raha hai dil-e-be-qarar kiya kije

dard ho dukh ho to davā kiije

phaT paḌe āsmāñ to kyā kiije

dard ho dukh ho to dawa kije

phaT paDe aasman to kya kije

maraz-e-ishq ko shifā samjhe

dard ko dard kī davā samjhe

maraz-e-ishq ko shifa samjhe

dard ko dard ki dawa samjhe

āstāñ bhī koī mil jā.egā ai zauq-e-niyāz

sar salāmat hai to sajda bhī adā ho jā.egā

aastan bhi koi mil jaega ai zauq-e-niyaz

sar salamat hai to sajda bhi ada ho jaega

saañs lene meñ dard hotā hai

ab havā zindagī kī raas nahīñ

sans lene mein dard hota hai

ab hawa zindagi ki ras nahin

aaj kyā jaane kyā hai hone ko

jī bahut chāhtā hai rone ko

aaj kya jaane kya hai hone ko

ji bahut chahta hai rone ko

ishq ko dījiye junūñ meñ faroġh

dard se dard kī davā kījiye

ishq ko dijiye junun mein farogh

dard se dard ki dawa kijiye

na miT sakā na miTegā kabhī nishāñ merā

liyā ajal ne ka.ī baar imtihāñ merā

na miT saka na miTega kabhi nishan mera

liya ajal ne kai bar imtihan mera

nahīñ ki jurm-e-mohabbat kā e'tirāf nahīñ

magar huuñ ḳhush ki mirī ye ḳhatā muaaf nahīñ

nahin ki jurm-e-mohabbat ka e'tiraf nahin

magar hun KHush ki meri ye KHata muaf nahin

ishq meñ qadr-e-ḳhastagī kī ummīd

ai 'jigar' hosh kī davā kījiye

ishq mein qadr-e-KHastagi ki ummid

ai 'jigar' hosh ki dawa kijiye

ye sher mere use sunā do

pūchhe jo koī 'jigar' maiñ kyā huuñ

ye sher mere use suna do

puchhe jo koi 'jigar' main kya hun

ham aur uThā.eñge ehsān jāñ-navāzī ke

hameñ to saañs bhī lenā girāñ guzartā hai

hum aur uThaenge ehsan jaan-nawazi ke

hamein to sans bhi lena giran guzarta hai

tasallī aap ne dī farq hai haañ dil kī hālat meñ

jo tham tham kar ḳhalish hotī thī paiham hotī jaatī hai

tasalli aap ne di farq hai han dil ki haalat mein

jo tham tham kar KHalish hoti thi paiham hoti jati hai