راہ الفت میں ملاقات ہوئی کس کس سے

دشت میں قیس ملا کوہ میں فرہاد مجھے

نہ پوچھو ہم سفرو مجھ سے ماجرا وطن

وطن ہے مجھ پے فدا اور میں فدائے وطن

پیار کی باتیں کیجیے صاحب

لطف صحبت کا گفتگو سے ہے

تیرے آتے ہی دیکھ راحت جاں

چین ہے صبر ہے قرار ہے آج

اٹھایا اس نے بیڑا قتل کا کچھ دل میں ٹھانا ہے

چبانا پان کا بھی خوں بہانے کا بہانہ ہے

بدن پر بار ہے پھولوں کا سایہ

مرا محبوب ایسا نازنیں ہے

پڑا ہوں میں یہاں اور دل وہیں ہے

الٰہی میں کہیں ہوں وہ کہیں ہے

ہر دم دم آخر ہے اجل سر پہ کھڑی ہے

دم بھر بھی ہم اس دم کا بھروسہ نہیں کرتے

لے قضا احسان تجھ پر کر چلے

ہم ترے آنے سے پہلے مر چلے

ہوا یقیں کہ زمیں پر ہے آج چاند گہن

وہ ماہ چہرے پہ جب ڈال کر نقاب آیا

نہ آئی بات تک بھی منہ پہ رعب حسن جاناں سے

ہزاروں سوچ کر مضمون ہم دربار میں آئے

کٹا تھا روز مصیبت خدا خدا کر کے

یہ رات آئی کہ سر پہ مرے عذاب آیا

ہجر جاناں میں جی سے جانا ہے

بس یہی موت کا بہانہ ہے

ابرو آنچل میں دوپٹے کے چھپانا ہے بجا

ترک کیا میان میں رکھتے نہیں تلواروں کو

کہنا قاصد کہ اس کے جینے کا

وعدۂ وصل پر مدار ہے آج

ہرجائیوں کے عشق نے کیا کیا کیا ذلیل

رسوا رہے خراب رہے در بدر رہے

نہ نکلی حسرت دل ایک بھی ہزار افسوس

عدم سے آئے تھے کیا کیا ہم آرزو کرتے

جس کو دیکھو وو نور کا بقعہ

یہ پرستان ہے کہ لندن ہے

خاک بھی لطف زندگی نہ رہا

آرزو جی میں ہو وہ جی نہ رہا

کی ریا سے نہ شیخ نے توبہ

مر گیا وہ گناہ گار افسوس

رسم الٹی ہے خوب رویوں کی

دوست جس کے بنو وہ دشمن ہے

ناامید اہل خرابات نہیں رحمت سے

بخش دے گا وہ کریم اپنے گناہ گاروں کو

ہر دم یہ دعا مانگتے رہتے ہیں خدا سے

اللہ بچائے شب فرقت کی بلا سے

فرقت کی رات وصل کی شب کا مزہ ملا

پہروں خیال یار سے باتیں کیا کیے

دنیا میں کوئی عشق سے بد تر نہیں ہے چیز

دل اپنا مفت دیجیے پھر جی سے جائیے

ہو غریبوں کا چاک خاک رفو

تار ہاتھ آئے جب نہ دامن سے

کیوں کر بڑھاؤں ربط نہ دربان یار سے

آخر کوئی تو ملنے کی تدبیر چاہئے

ہاتھوں میں نازکی سے سنبھلتی نہیں جو تیغ

ہے اس میں کیا گناہ تیرے جاں نثارؔ کا

دیا وہ جو نہ تھا وہم و گماں میں

بھلا میں اور کیا مانگوں خدا سے

ہمارے مرگ پہ شادی عبث اغیار کرتے ہیں

جہاں سے رفتہ رفتہ ایک دن ان کو بھی جانا ہے

تم کو دیوانہ اگر ہم سے ہزاروں ہیں تو خیر

ہم بھی کر لیں گے کوئی تم سا پری رو پیدا

بدن میں زخم نہیں بدھیاں ہیں پھولوں کی

ہم اپنے دل میں اسی کو بہار جانتے ہیں

کھو گیا کوئے دلربا میں نظامؔ

لوگ کہتے ہیں مارواڑ میں ہے

ریل پر یار آئے گا شاید

مژدۂ وصل آج تار میں ہے

لبوں پہ جان ہے اک دم کا اور میہماں ہے

مریض عشق و محبت کا تیرے حال یہ ہے

یہ رقیبوں کی ہے سخن سازی

بے وفا آپ ہوں خدا نہ کرے

جو چیز ہے جہان میں وہ بے مثال ہے

ہر فرد خلق وحدت حق پر دلیل ہے

خدا را بہر استقبال جلد اے جان باہر آ

عیادت کو مری جان جہاں تشریف لاتے ہیں

میں شوق وصل میں کیا ریل پر شتاب آیا

کہ صبح ہند میں تھا شام پنچ آب آیا

دل کو لگاؤں اور سے میں تم کو چھوڑ دوں

فقرہ ہے یہ رقیب کا اور جھوٹھ بات ہے

درد سر ہے تیری سب پند و نصیحت ناصح

چھوڑ دے مجھ کو خدا پر نہ کر اب سر خالی

جس کو سب کہتے ہیں سمندر ہے

قطرۂ اشک دیدۂ تر ہے

خوب جینے کا مزا پاتے ہیں ہم

خون دل پیتے ہیں غم کھاتے ہیں ہم

کھینچا ہے عکس قلب کی فوٹوگراف میں

شیشے میں ہے شبیہ پری کوہ قاف میں

غم سوا عشق کا مآل نہیں

کون دل ہے جو پائمال نہیں

تم ہو مجھ سے ہزار مستغنی

دل نہیں میرا یار مستغنی

اشک حسرت دیدۂ دل سے ہیں جاری ان دنوں

کار طوفاں کر رہی ہے اشک باری ان دنوں

آخر ہوا ہے حشر بپا انتظار میں

صبح شب فراق ہوئی مارواڑ میں