کس سے شکوہ کریں ویرانیٔ ہستی کا حیاتؔ

ہم نے خود اپنی تمناؤں کو جینے نہ دیا

ہزار شوق نمایاں تھے جس نظر سے کبھی

وہی نگاہ بڑی اجنبی سی لگتی ہے

خوشبو سی کوئی آئے تو لگتا ہے کہ تم ہو

شیشہ کہیں ٹکرائے تو لگتا ہے کہ تم ہو

ایک خوشبو سی ابھرتی ہے نفس سے میرے

ہو نہ ہو آج کوئی آن بسا ہے مجھ میں

تمام عمر بھٹکتے رہے جو راہوں میں

دکھا رہے ہیں وہی آج راستا مجھ کو

گھر سے جو شخص بھی نکلے وہ سنبھل کر نکلے

جانے کس موڑ پہ کس ہاتھ میں خنجر نکلے

ہزار درد سمیٹے ہوئے ہوں اک دل میں

بکھر گئی جو مری داستاں تو کیا ہوگا

تم ہمیں حرف غلط کہہ کے مٹا بھی نہ سکے

اب بھی ہر لب پہ سر بزم ہے چرچا اپنا

یہ کیا کہ آج کوئی نام تک نہیں لیتا

وہ دن بھی تھے کہ ہر اک لب پہ بات اپنی تھی

تمہارے ملنے کی ہر آس آج ٹوٹ گئی

تمہیں بتاؤ کہ اب کس طرح جیا جائے

اگرچہ کہنے کو کل کائنات اپنی تھی

حقیقتاً کہاں اپنی بھی ذات اپنی تھی

کیا غرض ہم کو وہاں اب کوئی بھی آباد ہو

ہم تو اس بستی سے گھر اپنا اٹھا کر لے گئے