maiñ vo mahrūm-e-ināyat huuñ ki jis ne tujh se

milnā chāhā to bichhaḌne kī vabā phuuT paḌī

main wo mahrum-e-inayat hun ki jis ne tujh se

milna chaha to bichhaDne ki waba phuT paDi

jitnī āñkheñ thiiñ saarī merī thiiñ

jitne manzar the sab tumhāre the

jitni aankhen thin sari meri thin

jitne manzar the sab tumhaare the

ye jāntā hai palaT kar use nahīñ aanā

vo apnī ziist kī khiñchtī huī kamān meñ hai

ye jaanta hai palaT kar use nahin aana

wo apni zist ki khinchti hui kaman mein hai

maiñ ḳhud ko sāmne tere biThā kar

ḳhud apne se gila kartā rahā huuñ

main KHud ko samne tere biTha kar

KHud apne se gila karta raha hun

maan TuuTe to phir nahīñ juḌtā

bad-gumānī kabhī na aa ke ga.ī

man TuTe to phir nahin juDta

bad-gumani kabhi na aa ke gai

ishq vo chaar sū safar hai jahāñ

koī bhī rāsta nahīñ ruktā

ishq wo chaar su safar hai jahan

koi bhi rasta nahin rukta

ek manzil hai muḳhtalif rāheñ

rañg haiñ be-shumār phūloñ ke

ek manzil hai muKHtalif rahen

rang hain be-shumar phulon ke

ishq tū bhī zarā Tikā le kamar

dil bhī ab so gayā hai raat ga.e

ishq tu bhi zara Tika le kamar

dil bhi ab so gaya hai raat gae

yā husn hai nā-vāqif-e-pindār-e-mohabbat

yā ishq hī āsānī-e-atvār meñ gum hai

ya husn hai na-waqif-e-pindar-e-mohabbat

ya ishq hi aasani-e-atwar mein gum hai