umr bhar kī baat bigḌī ik zarā sī baat meñ

ek lamha zindagī bhar kī kamā.ī khā gayā

umr bhar ki baat bigDi ek zara si baat mein

ek lamha zindagi bhar ki kamai kha gaya

ye ināyateñ ġhazab kī ye balā kī mehrbānī

mirī ḳhairiyat bhī pūchhī kisī aur kī zabānī

ye inayaten ghazab ki ye bala ki mehrbani

meri KHairiyat bhi puchhi kisi aur ki zabani

bad-gumānī ko baḌhā kar tum ne ye kyā kar diyā

ḳhud bhī tanhā ho ga.e mujh ko bhī tanhā kar diyā

bad-gumani ko baDha kar tum ne ye kya kar diya

KHud bhi tanha ho gae mujh ko bhi tanha kar diya

ek dīvāne ko jo aa.e haiñ samjhāne ka.ī

pahle maiñ dīvāna thā aur ab haiñ dīvāne ka.ī

ek diwane ko jo aae hain samjhane kai

pahle main diwana tha aur ab hain diwane kai

añdherā māñgne aayā thā raushnī kī bhiik

ham apnā ghar na jalāte to aur kyā karte

andhera mangne aaya tha raushni ki bhik

hum apna ghar na jalate to aur kya karte

ye kareñ aur vo kareñ aisā kareñ vaisā kareñ

zindagī do din kī hai do din meñ ham kyā kyā kareñ

ye karen aur wo karen aisa karen waisa karen

zindagi do din ki hai do din mein hum kya kya karen

mirī be-zabān āñkhoñ se gire haiñ chand qatre

vo samajh sakeñ to aañsū na samajh sakeñ to paanī

meri be-zaban aankhon se gire hain chand qatre

wo samajh saken to aansu na samajh saken to pani

jī meñ aatā hai ki deñ parde se parde kā javāb

ham se vo parda kareñ duniyā se ham pardā kareñ

ji mein aata hai ki den parde se parde ka jawab

hum se wo parda karen duniya se hum parda karen

dil kī ujḌī huī hālat pe na jaa.e koī

shahr ābād hue haiñ isī vīrāne se

dil ki ujDi hui haalat pe na jae koi

shahr aabaad hue hain isi virane se

vo aa.ina huuñ jo kabhī kamre meñ sajā thā

ab gir ke jo TuuTā huuñ to raste meñ paḌā huuñ

wo aaina hun jo kabhi kamre mein saja tha

ab gir ke jo TuTa hun to raste mein paDa hun

dūsroñ se kab talak ham pyaas kā shikva kareñ

laao tesha ek dariyā dūsrā paidā kareñ

dusron se kab talak hum pyas ka shikwa karen

lao tesha ek dariya dusra paida karen

rāsta roke hue kab se khaḌī hai duniyā

na idhar hotī hai zālim na udhar hotī hai

rasta roke hue kab se khaDi hai duniya

na idhar hoti hai zalim na udhar hoti hai

aas hī se dil meñ paidā zindagī hone lagī

sham.a jalne bhī na paa.ī raushnī hone lagī

aas hi se dil mein paida zindagi hone lagi

shama jalne bhi na pai raushni hone lagi

ek jhoñkā is tarah zanjīr-e-dar khaḌkā gayā

maiñ ye samjhā bhūlne vaale ko maiñ yaad aa gayā

ek jhonka is tarah zanjir-e-dar khaDka gaya

main ye samjha bhulne wale ko main yaad aa gaya