ادا آئی جفا آئی غرور آیا حجاب آیا

ہزاروں آفتیں لے کر حسینوں پر شباب آیا

ہم انتظار کریں ہم کو اتنی تاب نہیں

پلا دو تم ہمیں پانی اگر شراب نہیں

سنتے رہے ہیں آپ کے اوصاف سب سے ہم

ملنے کا آپ سے کبھی موقع نہیں ملا

ملنا جو نہ ہو تم کو تو کہہ دو نہ ملیں گے

یہ کیا کبھی پرسوں ہے کبھی کل ہے کبھی آج

عشق میں کچھ نظر نہیں آیا

جس طرف دیکھیے اندھیرا ہے

وہ خدائی کر رہے تھے جب خدا ہونے سے قبل

تو خدا جانے کریں گے کیا خدا ہونے کے بعد

دوستی کو برا سمجھتے ہیں

کیا سمجھ ہے وہ کیا سمجھتے ہیں

خدا کے ڈر سے ہم تم کو خدا تو کہہ نہیں سکتے

مگر لطف خدا قہر خدا شان خدا تم ہو

کہیں نہ ان کی نظر سے نظر کسی کی لڑے

وہ اس لحاظ سے آنکھیں جھکائے بیٹھے ہیں

دل کے دو حصے جو کر ڈالے تھے حسن و عشق نے

ایک صحرا بن گیا اور ایک گلشن ہو گیا

مجھ کو یہ فکر کہ دل مفت گیا ہاتھوں سے

ان کو یہ ناز کہ ہم نے اسے چھینا کیسا

لیلیٰ ہے نہ مجنوں ہے نہ شیریں ہے نہ فرہاد

اب رہ گئے ہیں عاشق و معشوق میں ہم آپ

کہہ رہی ہے یہ تری تصویر بھی

میں کسی سے بولنے والی نہیں

محفل میں تیری آ کے یوں بے آبرو ہوئے

پہلے تھے آپ آپ سے تم تم سے تو ہوئے

برسوں رہے ہیں آپ ہماری نگاہ میں

یہ کیا کہا کہ ہم تمہیں پہچانتے نہیں

جب ذکر کیا میں نے کبھی وصل کا ان سے

وہ کہنے لگے پاک محبت ہے بڑی چیز

نہ ملو کھل کے تو چوری کی ملاقات رہے

ہم بلائیں گے تمہیں رات گئے رات رہے

دل نذر کرو ظلم سہو ناز اٹھاؤ

اے اہل تمنا یہ ہیں ارکان تمنا

جو وقت جائے گا وہ پلٹ کر نہ آئے گا

دن رات چاہئے سحر و شام کا لحاظ

کمبخت کبھی جی سے گزرنے نہیں دیتی

جینے کی تمنا مجھے مرنے نہیں دیتی

اشکوں کے ٹپکنے پر تصدیق ہوئی اس کی

بے شک وہ نہیں اٹھتے آنکھوں سے جو گرتے ہیں

ان سے سب حال دغاباز کہے دیتے ہیں

میرے ہم راز مرا راز کہے دیتے ہیں

اچھے برے کو وہ ابھی پہچانتے نہیں

کمسن ہیں بھولے بھالے ہیں کچھ جانتے نہیں

آج آئیں گے کل آئیں گے کل آئیں گے آج آئیں گے

مدت سے یہی وہ کہتے ہیں مدت سے یہی ہم سنتے ہیں

وہ ہاتھ میں تلوار لئے سر پہ کھڑے ہیں

مرنے نہیں دیتی مجھے مرنے کی خوشی آج

بے وجہ محبت سے نہیں بول رہے ہیں

وہ باتوں ہی باتوں میں مجھے کھول رہے ہیں

دل کو تم شوق سے لے جاؤ مگر یاد رہے

یہ نہ میرا نہ تمہارا نہ کسی کا ہوگا

جگر کی چوٹ اوپر سے کہیں معلوم ہوتی ہے

جگر کی چوٹ اوپر سے نہیں معلوم ہوتی ہے

آتے آتے راہ پر وہ آئیں گے

جاتے جاتے بد گمانی جائے گی

ہمیں اصرار ملنے پر تمہیں انکار ملنے سے

نہ تم مانو نہ ہم مانیں نہ یہ کم ہو نہ وہ کم ہو

ساقی جو دل سے چاہے تو آئے وہ زمانہ

ہر شخص ہو شرابی ہر گھر شراب خانہ

خاک ہو کر ہی ہم پہنچ جاتے

اس طرف کی مگر ہوا بھی نہیں

شرما کے بگڑ کے مسکرا کر

وہ چھپ رہے اک جھلک دکھا کر

ان کا وعدہ ان کا پیماں ان کا اقرار ان کا قول

جتنی باتیں ہیں حسینوں کی وہ بے بنیاد ہیں

کوئی یہاں سے چل دیا رونق بام و در نہیں

دیکھ رہا ہوں گھر کو میں گھر ہے مگر وہ گھر نہیں

وہ بات کیا جو اور کی تحریک سے ہوئی

وہ کام کیا جو غیر کی امداد سے ہوا

دل انہیں دیں گے مگر ہم دیں گے ان شرطوں کے ساتھ

آزما کر جانچ کر سن کر سمجھ کر دیکھ کر

اللہ رے ان کے حسن کی معجز نمائیاں

جس بام پر وہ آئیں وہی کوہ طور ہو

غیر کا عشق ہے کہ میرا ہے

صاف کہہ دو ابھی سویرا ہے

نوح بیٹھے ہیں چارپائی پر

چارپائی پہ نوح بیٹھے ہیں

اے نوحؔ توبہ عشق سے کر لی تھی آپ نے

پھر تانک جھانک کیوں ہے یہ پھر دیکھ بھال کیا

یہ میرے پاس جو چپ چاپ آئے بیٹھے ہیں

ہزار فتنۂ محشر اٹھائے بیٹھے ہیں

بھری محفل میں ان کو چھیڑنے کی کیا ضرورت تھی

جناب نوح تم سا بھی نہ کوئی بے ادب ہوگا

مجھ کو نظروں کے لڑانے سے ہے کام

آپ کو آنکھیں دکھانے سے غرض

پامال ہو کے بھی نہ اٹھا کوئے یار سے

میں اس گلی میں سایۂ دیوار ہو گیا

ابھی اس قیامت کو میں کیا کہوں

جو گزرے گی جی سے گزرنے کے بعد

اسیران قفس کو واسطہ کیا ان جھمیلوں سے

چمن میں کب خزاں آئی چمن میں کب بہار آئی

چلو نوحؔ تم کو دکھا لائیں تم نے

نہ مے خانہ دیکھا نہ بت خانہ دیکھا

موسم گل ابھی نہیں آیا

چل دیئے گھر میں ہم لگا کر آگ

کعبہ ہو کہ بت خانہ ہو اے حضرت واعظ

جائیں گے جدھر آپ نہ جائیں گے ادھر ہم