zamāne se alag thī merī duniyā

maiñ us kī dauḌ meñ shāmil nahīñ thā

zamane se alag thi meri duniya

main us ki dauD mein shamil nahin tha

ajab yaqīn sā us shaḳhs ke gumān meñ thā

vo baat karte hue bhī na.ī uḌaan meñ thā

ajab yaqin sa us shaKHs ke guman mein tha

wo baat karte hue bhi nai uDan mein tha

ka.ī paḌāv the manzil kī raah meñ 'tābish'

mire nasīb meñ lekin safar kuchh aur se the

kai paDaw the manzil ki rah mein 'tabish'

mere nasib mein lekin safar kuchh aur se the

koī iz.hār kar saktā hai kaise

ye lafzoñ se zabāñ kā fāsla hai

koi izhaar kar sakta hai kaise

ye lafzon se zaban ka fasla hai

na dekheñ to sukūñ miltā nahīñ hai

hameñ āḳhir vo kyuuñ miltā nahīñ hai

na dekhen to sukun milta nahin hai

hamein aaKHir wo kyun milta nahin hai

jis ne insāñ se mohabbat hī nahīñ kī 'tābish'

us ko kyā ilm ki pindār se aage kyā hai

jis ne insan se mohabbat hi nahin ki 'tabish'

us ko kya ilm ki pindar se aage kya hai

yaqīñ se jo gumāñ kā fāsla hai

zamīñ se āsmāñ kā fāsla hai

yaqin se jo guman ka fasla hai

zamin se aasman ka fasla hai

ham us dhartī ke bāshinde the 'tābish'

ki jis kā koī mustaqbil nahīñ thā

hum us dharti ke bashinde the 'tabish'

ki jis ka koi mustaqbil nahin tha

utar gayā hai rag-o-pai meñ zā.iqa us kā

ajiib shahad sā kal raat us zabān meñ thā

utar gaya hai rag-o-pai mein zaiqa us ka

ajib shahad sa kal raat us zaban mein tha

kab khulegā ki falak paar se aage kyā hai

kis ko mālūm ki dīvār se aage kyā hai

kab khulega ki falak par se aage kya hai

kis ko malum ki diwar se aage kya hai