زمین اتنی نہیں ہے کہ پاؤں رکھ پائیں

دل خراب کی ضد ہے کہ گھر بنایا جائے

عجیب درد کا رشتہ تھا سب کے سب روئے

شجر گرا تو پرندے تمام شب روئے

اب آسمان بھی کم پڑ رہے ہیں اس کے لیے

قدم زمین پر رکھا تھا جس نے ڈرتے ہوئے

ابھی پھر رہا ہوں میں آپ اپنی تلاش میں

ابھی مجھ سے میرا مزاج ہی نہیں مل رہا

کھول دیتے ہیں پلٹ آنے پہ دروازۂ دل

آنے والے کا ارادہ نہیں دیکھا جاتا

رات رو رو کے گزاری ہے چراغوں کی طرح

تب کہیں حرف میں تاثیر نظر آئی ہے

اٹھا اٹھا کے ترے ناز اے غم دنیا

خود آپ ہی تری عادت خراب کی ہم نے

یہ خیال تھا کبھی خواب میں تجھے دیکھتے

کبھی زندگی کی کتاب میں تجھے دیکھتے

بے وجہ نہ بدلے تھے مصور نے ارادے

میں اس کے خیالات میں پہلے بھی کہیں تھا

کوئی کب دیوار بنا ہے میرے سفر میں

خود ہی اپنے رستے کی دیوار رہا ہوں

جمال مجھ پہ یہ اک دن میں تو نہیں آیا

ہزار آئینے ٹوٹے مرے سنورتے ہوئے

ابھی تو منصب ہستی سے میں ہٹا ہی نہیں

بدل گئے ہیں مرے دوستوں کے لہجے بھی

ترے خیال کی لو ہی سفر میں کام آئی

مرے چراغ تو لگتا تھا روئے اب روئے

کنارہ کر نہ اے دنیا مری ہست زبونی سے

کوئی دن میں مرا روشن ستارہ ہونے والا ہے

عجب نہیں در و دیوار جیسے ہو جائیں

ہم ایسے لوگ جو خود سے کلام کرتے ہیں

وہ آئینہ ہے تو حیرت کسی جمال کی ہو

جو سنگ ہے تو کہیں رہ گزر میں رکھا جائے

یہ ویرانی سی یوں ہی تو نہیں رہتی ہے آنکھوں میں

مرے دل ہی سے کوئی جادۂ وحشت نکلتا ہے

خوش ارزانی ہوئی ہے اس قدر بازار ہستی میں

گراں جس کو سمجھتا ہوں وہ کم قیمت نکلتا ہے