mat pūchhiye kyā jītne niklā thā maiñ ghar se

ye dekhiye kyā haar ke lauTā huuñ safar se

mat puchhiye kya jitne nikla tha main ghar se

ye dekhiye kya haar ke lauTa hun safar se

ye safar ye Dūbte sūraj kā manzar aur maiñ

jaane kab ho pā.eñge bāham mirā ghar aur maiñ

ye safar ye Dubte suraj ka manzar aur main

jaane kab ho paenge baham mera ghar aur main

badan kī qaid se chhūTā to log pahchāne

tamām 'umr kisī ko mirā pata na milā

badan ki qaid se chhuTa to log pahchane

tamam 'umr kisi ko mera pata na mila

lahū se jin ke hai raushan ye ḳhānqāh-e-junūñ

hamāre sar pe hai saaya unhīñ buzurgoñ kā

lahu se jin ke hai raushan ye KHanqah-e-junun

hamare sar pe hai saya unhin buzurgon ka

ġham-e-hayāt ko yuuñ ḳhush-gavār kar liyā hai

ki ham ne haal ko maazī shumār kar liyā hai

gham-e-hayat ko yun KHush-gawar kar liya hai

ki hum ne haal ko mazi shumar kar liya hai

shu’ūr-e-tishnagī ik roz meñ puḳhta nahīñ hotā

mire hoñToñ ne sadiyoñ karbalā kī ḳhaak chūmī hai

shu’ur-e-tishnagi ek roz mein puKHta nahin hota

mere honTon ne sadiyon karbala ki KHak chumi hai

pahle thā bahut fāsla bāzār se ghar kā

ab ek hī kamre meñ hai bāzār bhī ghar bhī

pahle tha bahut fasla bazar se ghar ka

ab ek hi kamre mein hai bazar bhi ghar bhi

kal raat bhī ik chehra hamrāh mire jaagā

kal raat bhī rah-rah kar dīvār lagīñ āñkheñ

kal raat bhi ek chehra hamrah mere jaga

kal raat bhi rah-rah kar diwar lagin aankhen

kal raat bhī thā chaudhvīñ kā chāñd falak par

kal raat bhī ik qāfila niklā thā khañDar se

kal raat bhi tha chaudhwin ka chand falak par

kal raat bhi ek qafila nikla tha khanDar se

merī jholī meñ muravvat ke sivā kuchh bhī na thā

so use bhī yaar logoñ ne mire luuTā bahut

meri jholi mein murawwat ke siwa kuchh bhi na tha

so use bhi yar logon ne mere luTa bahut

ab kahāñ bastī meñ vo ḳhubān-e-vahshat-āshnā

maañg khā letā huuñ ik sāz-e-shikasta ke tufail

ab kahan basti mein wo KHuban-e-wahshat-ashna

mang kha leta hun ek saz-e-shikasta ke tufail

kaun hai jo itne sannāTe meñ hai mahv-e-safar

dasht-e-shab meñ ye ġhubār-e-māh-o-anjum kis liye

kaun hai jo itne sannaTe mein hai mahw-e-safar

dasht-e-shab mein ye ghubar-e-mah-o-anjum kis liye

āñkheñ haiñ ki ab tak usī chaukhaT pe dharī haiñ

detā huuñ zamāne ko magar apnā pata aur

aankhen hain ki ab tak usi chaukhaT pe dhari hain

deta hun zamane ko magar apna pata aur

zindagī ke is safar ne aur kyā mujh ko diyā

ek TuuTā aa.ina do chaar patthar aur maiñ

zindagi ke is safar ne aur kya mujh ko diya

ek TuTa aaina do chaar patthar aur main

kaun jaane aaj bhī karte haiñ kis kā intizār

ye shikasta bām-o-dar rauzan kabūtar aur maiñ

kaun jaane aaj bhi karte hain kis ka intizar

ye shikasta baam-o-dar rauzan kabutar aur main

kyā ḳhabar thī ki tamāshe ko hunar karte hue

'umr kaT jā.egī bāzār ko ghar karte hue

kya KHabar thi ki tamashe ko hunar karte hue

'umr kaT jaegi bazar ko ghar karte hue