مری داستاں بھی عجیب ہے وہ قدم قدم مرے ساتھ تھا

جسے راز دل نہ بتا سکا جسے داغ دل نہ دکھا سکا

جواب اس سوال کا بھی دے ذرا مجھے

اڑا کے لائی ہے یہاں پہ کیوں ہوا مجھے

ہم خود بھی ہوئے نادم جب حرف دعا نکلا

سمجھے تھے جسے پتھر وہ شخص خدا نکلا

اس اجنبی سے واسطہ ضرور تھا کوئی

وہ جب کبھی ملا تو بس مرا لگا مجھے

آج پھر دب گئیں درد کی سسکیاں

آج پھر گونجتا قہقہہ رہ گیا

جام عشق پی چکے زندگی بھی جی چکے

اب ہلالؔ گھر چلو اب تو شام ہو گئی

آج نہ ہم سے پوچھئے کیسا کمال ہو گیا

ہجر کے خوف میں رہے اور وصال ہو گیا

اس عقل کی ماری نگری میں کبھی پانی آگ نہیں بنتا

یہاں عشق بھی لوگ نہیں کرتے یہاں کوئی کمال نہیں ہوتا

جب وقت پڑا تھا تو جو کچھ ہم نے کیا تھا

سمجھے تھے وہی یار ہمارا بھی کرے گا

باہر جو نہیں تھا تو کوئی بات نہیں تھی

احساس ندامت مگر اندر بھی نہیں تھا

پانی پہ بنتے عکس کی مانند ہوں مگر

آنکھوں میں کوئی بھر لے تو مٹتا نہیں ہوں میں

اپنے دکھ میں رونا دھونا آپ ہی آیا

غیر کے دکھ میں خود کو دکھانا عشق میں سیکھا

پہلے بھی جہاں پر بچھڑے تھے وہی منزل تھی اس بار مگر

وہ بھی بے لوث نہیں لوٹا ہم بھی بے تاب نہیں آئے

نہ ہی بجلیاں نہ ہی بارشیں نہ ہی دشمنوں کی وہ سازشیں

بھلا کیا سبب ہے بتا ذرا جو تو آج بھی نہیں آ سکا