chalne kā hausla nahīñ ruknā muhāl kar diyā

ishq ke is safar ne to mujh ko niDhāl kar diyā

chalne ka hausla nahin rukna muhaal kar diya

ishq ke is safar ne to mujh ko niDhaal kar diya

kyā kare merī masīhā.ī bhī karne vaalā

zaḳhm hī ye mujhe lagtā nahīñ bharne vaalā

kya kare meri masihai bhi karne wala

zaKHm hi ye mujhe lagta nahin bharne wala

yuuñ bichhaḌnā bhī bahut āsāñ na thā us se magar

jaate jaate us kā vo muḌ kar dobāra dekhnā

yun bichhaDna bhi bahut aasan na tha us se magar

jate jate us ka wo muD kar dobara dekhna

ab to is raah se vo shaḳhs guzartā bhī nahīñ

ab kis ummīd pe darvāze se jhāñke koī

ab to is rah se wo shaKHs guzarta bhi nahin

ab kis ummid pe darwaze se jhanke koi

vo to ḳhush-bū hai havāoñ meñ bikhar jā.egā

mas.ala phuul kā hai phuul kidhar jā.egā

wo to KHush-bu hai hawaon mein bikhar jaega

masala phul ka hai phul kidhar jaega

jugnū ko din ke vaqt parakhne kī zid kareñ

bachche hamāre ahd ke chālāk ho ga.e

jugnu ko din ke waqt parakhne ki zid karen

bachche hamare ahd ke chaalak ho gae

paas jab tak vo rahe dard thamā rahtā hai

phailtā jaatā hai phir aañkh ke kājal kī tarah

pas jab tak wo rahe dard thama rahta hai

phailta jata hai phir aankh ke kajal ki tarah

husn ke samajhne ko umr chāhiye jānāñ

do ghaḌī kī chāhat meñ laḌkiyāñ nahīñ khultīñ

husn ke samajhne ko umr chahiye jaanan

do ghaDi ki chahat mein laDkiyan nahin khultin

kaise kah duuñ ki mujhe chhoḌ diyā hai us ne

baat to sach hai magar baat hai rusvā.ī kī

kaise kah dun ki mujhe chhoD diya hai us ne

baat to sach hai magar baat hai ruswai ki

maiñ sach kahūñgī magar phir bhī haar jā.ūñgī

vo jhuuT bolegā aur lā-javāb kar degā

main sach kahungi magar phir bhi haar jaungi

wo jhuT bolega aur la-jawab kar dega

bas ye huā ki us ne takalluf se baat kī

aur ham ne rote rote dupaTTe bhigo liye

bas ye hua ki us ne takalluf se baat ki

aur hum ne rote rote dupaTTe bhigo liye

apne qātil kī zehānat se pareshān huuñ maiñ

roz ik maut na.e tarz kī ījād kare

apne qatil ki zehanat se pareshan hun main

roz ek maut nae tarz ki ijad kare

kamāl-e-zabt ko ḳhud bhī to āzmā.ūñgī

maiñ apne haath se us kī dulhan sajā.ūñgī

kamal-e-zabt ko KHud bhi to aazmaungi

main apne hath se us ki dulhan sajaungi

laḌkiyoñ ke dukh ajab hote haiñ sukh us se ajiib

hañs rahī haiñ aur kājal bhīgtā hai saath saath

laDkiyon ke dukh ajab hote hain sukh us se ajib

hans rahi hain aur kajal bhigta hai sath sath

kāñToñ meñ ghire phuul ko chuum aa.egī lekin

titlī ke paroñ ko kabhī chhilte nahīñ dekhā

kanTon mein ghire phul ko chum aaegi lekin

titli ke paron ko kabhi chhilte nahin dekha

tū badaltā hai to be-sāḳhta merī āñkheñ

apne hāthoñ kī lakīroñ se ulajh jaatī haiñ

tu badalta hai to be-saKHta meri aankhen

apne hathon ki lakiron se ulajh jati hain

ham to samjhe the ki ik zaḳhm hai bhar jā.egā

kyā ḳhabar thī ki rag-e-jāñ meñ utar jā.egā

hum to samjhe the ki ek zaKHm hai bhar jaega

kya KHabar thi ki rag-e-jaan mein utar jaega

kū-ba-kū phail ga.ī baat shanāsā.ī kī

us ne ḳhushbū kī tarah merī pazīrā.ī kī

ku-ba-ku phail gai baat shanasai ki

us ne KHushbu ki tarah meri pazirai ki

apnī rusvā.ī tire naam kā charchā dekhūñ

ik zarā sher kahūñ aur maiñ kyā kyā dekhūñ

apni ruswai tere nam ka charcha dekhun

ek zara sher kahun aur main kya kya dekhun

us ne jaltī huī peshānī pe jab haath rakhā

ruuh tak aa ga.ī tāsīr masīhā.ī kī

us ne jalti hui peshani pe jab hath rakha

ruh tak aa gai tasir masihai ki