کی تلاش کا نتیجه | موضو - نظم, صفحہ ayyaar

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "ayyaar"

نظم کے متعلقہ نتیجہ "ayyaar"

نظم

دلیل صبح روشن ہے ستاروں کی تنک تابی
افق سے آفتاب ابھرا گیا دور گراں خوابی
عروق مردۂ مشرق میں خون زندگی دوڑا
سمجھ سکتے نہیں اس راز کو سینا و فارابی
مسلماں کو مسلماں کر دیا طوفان مغرب نے
تلاطم ہائے دریا ہی سے ہے گوہر کی سیرابی
عطا مومن کو پھر درگاہ حق سے ہونے والا ہے
شکوہ ترکمانی ذہن ہندی نطق اعرابی
اثر کچھ خواب کا غنچوں میں باقی ہے تو اے بلبل
نوا را تلخ ترمی زن چو ذوق نغمہ کم یابی
تڑپ صحن چمن میں آشیاں میں شاخساروں میں
جدا پارے سے ہو سکتی نہیں تقدیر سیمابی
وہ چشم پاک ہیں کیوں زینت بر گستواں دیکھے
نظر آتی ہے جس کو مرد غازی کی جگر تابی
ضمیر لالہ میں روشن چراغ آرزو کر دے
چمن کے ذرے ذرے کو شہید جستجو کر دے
سرشک چشم مسلم میں ہے نیساں کا اثر پیدا
خلیل اللہ کے دریا میں ہوں گے پھر گہر پیدا
کتاب ملت بیضا کی پھر شیرازہ بندی ہے
یہ شاخ ہاشمی کرنے کو ہے پھر برگ و بر پیدا
ربود آں ترک شیرازی دل تبریز و کابل را
صبا کرتی ہے بوئے گل سے اپنا ہم سفر پیدا
اگر عثمانیوں پر کوہ غم ٹوٹا تو کیا غم ہے
کہ خون صد ہزار انجم سے ہوتی ہے سحر پیدا
جہاں بانی سے ہے دشوار تر کار جہاں بینی
جگر خوں ہو تو چشم دل میں ہوتی ہے نظر پیدا
ہزاروں سال نرگس اپنی بے نوری پہ روتی ہے
بڑی مشکل سے ہوتا ہے چمن میں دیدہ ور پیدا
نوا پیرا ہو اے بلبل کہ ہو تیرے ترنم سے
کبوتر کے تن نازک میں شاہیں کا جگر پیدا
ترے سینے میں ہے پوشیدہ راز زندگی کہہ دے
مسلماں سے حدیث سوز و ساز زندگی کہہ دے
خدائے لم یزل کا دست قدرت تو زباں تو ہے
یقیں پیدا کر اے غافل کہ مغلوب گماں تو ہے
پرے ہے چرخ نیلی فام سے منزل مسلماں کی
ستارے جس کی گرد راہ ہوں وہ کارواں تو ہے
مکاں فانی مکیں فانی ازل تیرا ابد تیرا
خدا کا آخری پیغام ہے تو جاوداں تو ہے
حنا بند عروس لالہ ہے خون جگر تیرا
تری نسبت براہیمی ہے معمار جہاں تو ہے
تری فطرت امیں ہے ممکنات زندگانی کی
جہاں کے جوہر مضمر کا گویا امتحاں تو ہے
جہان آب و گل سے عالم جاوید کی خاطر
نبوت ساتھ جس کو لے گئی وہ ارمغاں تو ہے
یہ نکتہ سر گزشت ملت بیضا سے ہے پیدا
کہ اقوام زمین ایشیا کا پاسباں تو ہے
سبق پھر پڑھ صداقت کا عدالت کا شجاعت کا
لیا جائے گا تجھ سے کام دنیا کی امامت کا
یہی مقصود فطرت ہے یہی رمز مسلمانی
اخوت کی جہانگیری محبت کی فراوانی
بتان رنگ و خوں کو توڑ کر ملت میں گم ہو جا
نہ تورانی رہے باقی نہ ایرانی نہ افغانی
میان شاخساراں صحبت مرغ چمن کب تک
ترے بازو میں ہے پرواز شاہین قہستانی
گماں آباد ہستی میں یقیں مرد مسلماں کا
بیاباں کی شب تاریک میں قندیل رہبانی
مٹایا قیصر و کسریٰ کے استبداد کو جس نے
وہ کیا تھا زور حیدر فقر بوذر صدق سلمانی
ہوئے احرار ملت جادہ پیما کس تجمل سے
تماشائی شگاف در سے ہیں صدیوں کے زندانی
ثبات زندگی ایمان محکم سے ہے دنیا میں
کہ المانی سے بھی پایندہ تر نکلا ہے تورانی
جب اس انگارۂ خاکی میں ہوتا ہے یقیں پیدا
تو کر لیتا ہے یہ بال و پر روح الامیں پیدا
غلامی میں نہ کام آتی ہیں شمشیریں نہ تدبیریں
جو ہو ذوق یقیں پیدا تو کٹ جاتی ہیں زنجیریں
کوئی اندازہ کر سکتا ہے اس کے زور بازو کا
نگاہ مرد مومن سے بدل جاتی ہیں تقدیریں
ولایت پادشاہی علم اشیا کی جہانگیری
یہ سب کیا ہیں فقط اک نکتۂ ایماں کی تفسیریں
براہیمی نظر پیدا مگر مشکل سے ہوتی ہے
ہوس چھپ چھپ کے سینوں میں بنا لیتی ہے تصویریں
تمیز بندہ و آقا فساد آدمیت ہے
حذر اے چیرہ دستاں سخت ہیں فطرت کی تعزیریں
حقیقت ایک ہے ہر شے کی خاکی ہو کہ نوری ہو
لہو خورشید کا ٹپکے اگر ذرے کا دل چیریں
یقیں محکم عمل پیہم محبت فاتح عالم
جہاد زندگانی میں ہیں یہ مردوں کی شمشیریں
چہ باید مرد را طبع بلندے مشرب نابے
دل گرمے نگاہ پاک بینے جان بیتابے
عقابی شان سے جھپٹے تھے جو بے بال و پر نکلے
ستارے شام کے خون شفق میں ڈوب کر نکلے
ہوئے مدفون دریا زیر دریا تیرنے والے
طمانچے موج کے کھاتے تھے جو بن کر گہر نکلے
غبار رہ گزر ہیں کیمیا پر ناز تھا جن کو
جبینیں خاک پر رکھتے تھے جو اکسیر گر نکلے
ہمارا نرم رو قاصد پیام زندگی لایا
خبر دیتی تھیں جن کو بجلیاں وہ بے خبر نکلے
حرم رسوا ہوا پیر حرم کی کم نگاہی سے
جوانان تتاری کس قدر صاحب نظر نکلے
زمیں سے نوریان آسماں پرواز کہتے تھے
یہ خاکی زندہ تر پایندہ تر تابندہ تر نکلے
جہاں میں اہل ایماں صورت خورشید جیتے ہیں
ادھر ڈوبے ادھر نکلے ادھر ڈوبے ادھر نکلے
یقیں افراد کا سرمایۂ تعمیر ملت ہے
یہی قوت ہے جو صورت گر تقدیر ملت ہے
تو راز کن فکاں ہے اپنی آنکھوں پر عیاں ہو جا
خودی کا رازداں ہو جا خدا کا ترجماں ہو جا
ہوس نے کر دیا ہے ٹکڑے ٹکڑے نوع انساں کو
اخوت کا بیاں ہو جا محبت کی زباں ہو جا
یہ ہندی وہ خراسانی یہ افغانی وہ تورانی
تو اے شرمندۂ ساحل اچھل کر بے کراں ہو جا
غبار آلودۂ رنگ و نسب ہیں بال و پر تیرے
تو اے مرغ حرم اڑنے سے پہلے پرفشاں ہو جا
خودی میں ڈوب جا غافل یہ سر زندگانی ہے
نکل کر حلقۂ شام و سحر سے جاوداں ہو جا
مصاف زندگی میں سیرت فولاد پیدا کر
شبستان محبت میں حریر و پرنیاں ہو جا
گزر جا بن کے سیل تند رو کوہ و بیاباں سے
گلستاں راہ میں آئے تو جوئے نغمہ خواں ہو جا
ترے علم و محبت کی نہیں ہے انتہا کوئی
نہیں ہے تجھ سے بڑھ کر ساز فطرت میں نوا کوئی
ابھی تک آدمی صید زبون شہریاری ہے
قیامت ہے کہ انساں نوع انساں کا شکاری ہے
نظر کو خیرہ کرتی ہے چمک تہذیب حاضر کی
یہ صناعی مگر جھوٹے نگوں کی ریزہ کاری ہے
وہ حکمت ناز تھا جس پر خرد مندان مغرب کو
ہوس کے پنجۂ خونیں میں تیغ کارزاری ہے
تدبر کی فسوں کاری سے محکم ہو نہیں سکتا
جہاں میں جس تمدن کی بنا سرمایہ داری ہے
عمل سے زندگی بنتی ہے جنت بھی جہنم بھی
یہ خاکی اپنی فطرت میں نہ نوری ہے نہ ناری ہے
خروش آموز بلبل ہو گرہ غنچے کی وا کر دے
کہ تو اس گلستاں کے واسطے باد بہاری ہے
پھر اٹھی ایشیا کے دل سے چنگاری محبت کی
زمیں جولاں گہہ اطلس قبایان تتاری ہے
بیا پیدا خریدا راست جان نا توانے را
پس از مدت گزار افتاد برما کاروانے را
بیا ساقی نوائے مرغ زار از شاخسار آمد
بہار آمد نگار آمد نگار آمد قرار آمد
کشید ابر بہاری خیمہ اندر وادی و صحرا
صدائے آبشاراں از فراز کوہسار آمد
سرت گردم توہم قانون پیشیں ساز دہ ساقی
کہ خیل نغمہ پردازاں قطار اندر قطار آمد
کنار از زاہداں برگیر و بیباکانہ ساغر کش
پس از مدت ازیں شاخ کہن بانگ ہزار آمد
بہ مشتاقاں حدیث خواجۂ بدرو حنین آور
تصرف ہائے پنہانش بچشم آشکار آمد
دگر شاخ خلیل از خون ما نمناک می گردد
ببازار محبت نقد ما کامل عیار آمد
سر خاک شہیرے برگ ہائے لالہ می پاشم
کہ خونش بانہال ملت ما سازگار آمد
بیا تا گل بفیشانیم و مے در ساغر اندازیم
فلک را سقف بشگافیم و طرح دیگر اندازیم

علامہ اقبال

نظم

سلسلۂ روز و شب نقش گر حادثات
سلسلۂ روز و شب اصل حیات و ممات
سلسلۂ روز و شب تار حریر دو رنگ
جس سے بناتی ہے ذات اپنی قبائے صفات
سلسلۂ روز و شب ساز ازل کی فغاں
جس سے دکھاتی ہے ذات زیر و بم ممکنات
تجھ کو پرکھتا ہے یہ مجھ کو پرکھتا ہے یہ
سلسلۂ روز و شب صیرفی کائنات
تو ہو اگر کم عیار میں ہوں اگر کم عیار
موت ہے تیری برات موت ہے میری برات
تیرے شب و روز کی اور حقیقت ہے کیا
ایک زمانے کی رو جس میں نہ دن ہے نہ رات
آنی و فانی تمام معجزہ ہائے ہنر
کار جہاں بے ثبات کار جہاں بے ثبات
اول و آخر فنا باطن و ظاہر فنا
نقش کہن ہو کہ نو منزل آخر فنا
ہے مگر اس نقش میں رنگ ثبات دوام
جس کو کیا ہو کسی مرد خدا نے تمام
مرد خدا کا عمل عشق سے صاحب فروغ
عشق ہے اصل حیات موت ہے اس پر حرام
تند و سبک سیر ہے گرچہ زمانے کی رو
عشق خود اک سیل ہے سیل کو لیتا ہے تھام
عشق کی تقویم میں عصر رواں کے سوا
اور زمانے بھی ہیں جن کا نہیں کوئی نام
عشق دم جبرئیل عشق دل مصطفی
عشق خدا کا رسول عشق خدا کا کلام
عشق کی مستی سے ہے پیکر گل تابناک
عشق ہے صہبائے خام عشق ہے کاس الکرام
عشق فقیہہ حرام عشق امیر جنود
عشق ہے ابن السبیل اس کے ہزاروں مقام
عشق کے مضراب سے نغمۂ تار حیات
عشق سے نور حیات عشق سے نار حیات
اے حرم قرطبہ عشق سے تیرا وجود
عشق سراپا دوام جس میں نہیں رفت و بود
رنگ ہو یا خشت و سنگ چنگ ہو یا حرف و صوت
معجزۂ فن کی ہے خون جگر سے نمود
قطرۂ خون جگر سل کو بناتا ہے دل
خون جگر سے صدا سوز و سرور و سرود
تیری فضا دل فروز میری نوا سینہ سوز
تجھ سے دلوں کا حضور مجھ سے دلوں کی کشود
عرش معلی سے کم سینۂ آدم نہیں
گرچہ کف خاک کی حد ہے سپہر کبود
پیکر نوری کو ہے سجدہ میسر تو کیا
اس کو میسر نہیں سوز و گداز سجود
کافر ہندی ہوں میں دیکھ مرا ذوق و شوق
دل میں صلوٰۃ و درود لب پہ صلوٰۃ و درود
شوق مری لے میں ہے شوق مری نے میں ہے
نغمۂ اللہ ہو میرے رگ و پے میں ہے
تیرا جلال و جمال مرد خدا کی دلیل
وہ بھی جلیل و جمیل تو بھی جلیل و جمیل
تیری بنا پائیدار تیرے ستوں بے شمار
شام کے صحرا میں ہو جیسے ہجوم نخیل
تیرے در و بام پر وادی ایمن کا نور
تیرا منار بلند جلوہ گہ جبرئیل
مٹ نہیں سکتا کبھی مرد مسلماں کہ ہے
اس کی اذانوں سے فاش سر کلیم و خلیل
اس کی زمیں بے حدود اس کا افق بے ثغور
اس کے سمندر کی موج دجلہ و دنیوب و نیل
اس کے زمانے عجیب اس کے فسانے غریب
عہد کہن کو دیا اس نے پیام رحیل
ساقی ارباب ذوق فارس میدان شوق
بادہ ہے اس کا رحیق تیغ ہے اس کی اصیل
مرد سپاہی ہے وہ اس کی زرہ لا الہ
سایۂ شمشیر میں اس کی پنہ لا الہ
تجھ سے ہوا آشکار بندۂ مومن کا راز
اس کے دنوں کی تپش اس کی شبوں کا گداز
اس کا مقام بلند اس کا خیال عظیم
اس کا سرور اس کا شوق اس کا نیاز اس کا ناز
ہاتھ ہے اللہ کا بندۂ مومن کا ہاتھ
غالب و کار آفریں کار کشا کارساز
خاکی و نوری نہاد بندۂ مولا صفات
ہر دو جہاں سے غنی اس کا دل بے نیاز
اس کی امیدیں قلیل اس کے مقاصد جلیل
اس کی ادا دل فریب اس کی نگہ دل نواز
آج بھی اس دیس میں عام ہے چشم غزال
اور نگاہوں کے تیر آج بھی ہیں دل نشیں
بوئے یمن آج بھی اس کی ہواؤں میں ہے
رنگ حجاز آج بھی اس کی نواؤں میں ہے
دیدۂ انجم میں ہے تیری زمیں آسماں
آہ کہ صدیوں سے ہے تیری فضا بے اذاں
کون سی وادی میں ہے کون سی منزل میں ہے
عشق بلا خیز کا قافلۂ سخت جاں
دیکھ چکا المنی شورش اصلاح دیں
جس نے نہ چھوڑے کہیں نقش کہن کے نشاں
حرف غلط بن گئی عصمت پیر کنشت
اور ہوئی فکر کی کشتئ نازک رواں
چشم فرانسیس بھی دیکھ چکی انقلاب
جس سے دگر گوں ہوا مغربیوں کا جہاں
ملت رومی نژاد کہنہ پرستی سے پیر
لذت تجدیدہ سے وہ بھی ہوئی پھر جواں
روح مسلماں میں ہے آج وہی اضطراب
راز خدائی ہے یہ کہہ نہیں سکتی زباں
نرم دم گفتگو گرم دم جستجو
رزم ہو یا بزم ہو پاک دل و پاک باز
نقطۂ پرکار حق مرد خدا کا یقیں
اور یہ عالم تمام وہم و طلسم و مجاز
عقل کی منزل ہے وہ عشق کا حاصل ہے وہ
حلقۂ آفاق میں گرمئ محفل ہے وہ
کعبۂ ارباب فن سطوت دین مبیں
تجھ سے حرم مرتبت اندلسیوں کی زمیں
ہے تہ گردوں اگر حسن میں تیری نظیر
قلب مسلماں میں ہے اور نہیں ہے کہیں
آہ وہ مردان حق وہ عربی شہسوار
حامل خلق عظیم صاحب صدق و یقیں
جن کی حکومت سے ہے فاش یہ رمز غریب
سلطنت اہل دل فقر ہے شاہی نہیں
جن کی نگاہوں نے کی تربیت شرق و غرب
ظلمت یورپ میں تھی جن کی خرد راہ بیں
جن کے لہو کے طفیل آج بھی ہیں اندلسی
خوش دل و گرم اختلاط سادہ و روشن جبیں
دیکھیے اس بحر کی تہہ سے اچھلتا ہے کیا
گنبد نیلوفری رنگ بدلتا ہے کیا
وادی کہسار میں غرق شفق ہے سحاب
لعل بدخشاں کے ڈھیر چھوڑ گیا آفتاب
سادہ و پرسوز ہے دختر دہقاں کا گیت
کشتئ دل کے لیے سیل ہے عہد شباب
آب روان کبیر تیرے کنارے کوئی
دیکھ رہا ہے کسی اور زمانے کا خواب
عالم نو ہے ابھی پردۂ تقدیر میں
میری نگاہوں میں ہے اس کی سحر بے حجاب
پردہ اٹھا دوں اگر چہرۂ افکار سے
لا نہ سکے گا فرنگ میری نواؤں کی تاب
جس میں نہ ہو انقلاب موت ہے وہ زندگی
روح امم کی حیات کشمکش انقلاب
صورت شمشیر ہے دست قضا میں وہ قوم
کرتی ہے جو ہر زماں اپنے عمل کا حساب
نقش ہیں سب ناتمام خون جگر کے بغیر
نغمہ ہے سودائے خام خون جگر کے بغیر

علامہ اقبال

نظم

زمانہ آیا ہے بے حجابی کا عام دیدار یار ہوگا
سکوت تھا پردہ دار جس کا وہ راز اب آشکار ہوگا
گزر گیا اب وہ دور ساقی کہ چھپ کے پیتے تھے پینے والے
بنے گا سارا جہان مے خانہ ہر کوئی بادہ خوار ہوگا
کبھی جو آوارۂ جنوں تھے وہ بستیوں میں پھر آ بسیں گے
برہنہ پائی وہی رہے گی مگر نیا خارزار ہوگا
سنا دیا گوش منتظر کو حجاز کی خامشی نے آخر
جو عہد صحرائیوں سے باندھا گیا تھا پھر استوار ہوگا
نکل کے صحرا سے جس نے روما کی سلطنت کو الٹ دیا تھا
سنا ہے یہ قدسیوں سے میں نے وہ شیر پھر ہوشیار ہوگا
کیا مرا تذکرہ جو ساقی نے بادہ خواروں کی انجمن میں
تو پیر مے خانہ سن کے کہنے لگا کہ منہ پھٹ ہے خوار ہوگا
دیار مغرب کے رہنے والو خدا کی بستی دکاں نہیں ہے
کھرا جسے تم سمجھ رہے ہو وہ اب زر کم عیار ہوگا
تمہاری تہذیب اپنے خنجر سے آپ ہی خودکشی کرے گی
جو شاخ نازک پہ آشیانہ بنے گا ناپائیدار ہوگا
سفینۂ برگ گل بنا لے گا قافلہ مور ناتواں کا
ہزار موجوں کی ہو کشاکش مگر یہ دریا سے پار ہوگا
چمن میں لالہ دکھاتا پھرتا ہے داغ اپنا کلی کلی کو
یہ جانتا ہے کہ اس دکھاوے سے دل جلوں میں شمار ہوگا
جو ایک تھا اے نگاہ تو نے ہزار کر کے ہمیں دکھایا
یہی اگر کیفیت ہے تیری تو پھر کسے اعتبار ہوگا
کہا جو قمری سے میں نے اک دن یہاں کے آزاد پا بہ گل ہیں
تو غنچے کہنے لگے ہمارے چمن کا یہ رازدار ہوگا
خدا کے عاشق تو ہیں ہزاروں بنوں میں پھرتے ہیں مارے مارے
میں اس کا بندہ بنوں گا جس کو خدا کے بندوں سے پیار ہوگا
یہ رسم بزم فنا ہے اے دل گناہ ہے جنبش نظر بھی
رہے گی کیا آبرو ہماری جو تو یہاں بے قرار ہوگا
میں ظلمت شب میں لے کے نکلوں گا اپنے در ماندہ کارواں کو
شرر فشاں ہوگی آہ میری نفس مرا شعلہ بار ہوگا
نہیں ہے غیر از نمود کچھ بھی جو مدعا تیری زندگی کا
تو اک نفس میں جہاں سے مٹنا تجھے مثال شرار ہوگا
نہ پوچھ اقبالؔ کا ٹھکانا ابھی وہی کیفیت ہے اس کی
کہیں سر راہ گزار بیٹھا ستم کش انتظار ہوگا

علامہ اقبال

نظم

سلیماں سر بہ زانو اور سبا ویراں
سبا ویراں، سبا آسیب کا مسکن
سبا آلام کا انبار بے پایاں!
گیاہ و سبزہ و گل سے جہاں خالی
ہوائیں تشنۂ باراں،
طیور اس دشت کے منقار زیر پر
تو سرمہ ور گلو انساں
سلیماں سر بہ زانو اور سبا ویراں!
سلیماں سر بہ زانو ترش رو، غمگیں، پریشاں مو
جہانگیری، جہانبانی، فقط طرارۂ آہو،
محبت شعلۂ پراں، ہوس بوئے گل بے بو
ز راز دہر کمتر گو!
سبا ویراں کہ اب تک اس زمیں پر ہیں
کسی عیار کے غارت گروں کے نقش پا باقی
سبا باقی، نہ مہروئے سبا باقی!
سلیماں سر بہ زانو
اب کہاں سے قاصد فرخندہ پے آئے؟
کہاں سے، کس سبو سے کاسۂ پیری میں مے آئے؟

ن م راشد

نظم

یوں لب سے اپنے نکلے ہے اب بار بار آہ
کرتا ہے جس طرح کہ دل بے قرار آہ
ہم عید کے بھی دن رہے امیدوار آہ
ہو جی میں اپنے عید کی فرحت سے شاد کام
خوباں سے اپنے اپنے لیے سب نے دل کے کام
دل کھول کھول سب ملے آپس میں خاص و عام
آغوش خلق گل بدنوں سے بھرے تمام
خالی رہا پر ایک ہمارا کنار آہ
کیا پوچھتے ہو شوخ سے ملنے کی اب خبر
کتنا ہی جستجو میں پھرے ہم ادھر ادھر
لیکن ملا نہ ہم سے وہ عیار فتنہ گر
ملنا تو اک طرف ہے عزیزو کہ بھر نظر
پوشاک کی بھی ہم نے نہ دیکھی بہار آہ
رکھتے تھے ہم امید یہ دل میں کہ عید کو
کیا کیا گلے لگاویں گے دل بر کو شاد ہو
سو تو وہ آج بھی نہ ملا شوخ حیلہ جو
تھی آس عید کی سو گئی وہ بھی دوستو
اب دیکھیں کیا کرے دل امیدوار آہ
اس سنگ دل کی ہم نے غرض جب سے چاہ کی
دیکھا نہ اپنے دل کو کبھی ایک دم خوشی
کچھ اب ہی اس کی جورو و تعدی نہیں نئی
ہر عید میں ہمیں تو سدا یاس ہی رہی
کافر کبھی نہ ہم سے ہوا ہمکنار آہ
اقرار ہم سے تھا کئی دن آگے عید سے
یعنی کہ عید گاہ کو جاویں گے تم کو لے
آخر کو ہم کو چھوڑ گئے ساتھ اور کے
ہم ہاتھ ملتے رہ گئے اور راہ دیکھتے
کیا کیا غرض سہا ستم انتظار آہ
کیوں کر لگیں نہ دل میں مرے حسرتوں کے تیر
دن عید کے بھی مجھ سے ہوا وہ کنارہ گیر
اس درد کو وہ سمجھے جو ہو عشق کا اسیر
جس عید میں کہ یار سے ملنا نہ ہو نظیرؔ
اس کے اپر تو حیف ہے اور صد ہزار آہ

نظیر اکبرآبادی

نظم

کسے خبر کہ ہزاروں مقام رکھتا ہے
وہ فقر جس میں ہے بے پردہ روح قرآنی
خودی کو جب نظر آتی ہے قاہری اپنی
یہی مقام ہے کہتے ہیں جس کو سلطانی
یہی مقام ہے مومن کی قوتوں کا عيار
اسی مقام سے آدم ہے ظل سبحانی
یہ جبر و قہر نہیں ہے یہ عشق و مستی ہے
کہ جبر و قہر سے ممکن ۔۔۔نہیں جہاں بانی
کیا گیا ہے غلامی میں مبتلا تجھ کو
کہ تجھ سے ہو نہ سکی فقر کی نگہبانی
مثال ماہ چمکتا تھا جس کا داغ سجود
خرید لی ہے فرنگی نے وہ مسلمانی
ہوا حریف مہ و آفتاب تو جس سے
رہی نہ تیرے ستاروں میں وہ درخشانی

علامہ اقبال

نظم

نغمہ در جاں رقص برپا خندہ بر لب
دل تمناؤں کے بے پایاں الاؤ کے قریب
دل مرے صحرا نورد پیر دل
ریگ کے دل شاد شہری ریگ تو
اور ریگ ہی تیری طلب
ریگ کی نکہت ترے پیکر میں تیری جاں میں ہے
ریگ صبح عید کے مانند زرتاب و جلیل
ریگ صدیوں کا جمال
جشن آدم پر بچھڑ کر ملنے والوں کا وصال
شوق کے لمحات کے مانند آزاد و عظیم
ریگ نغمہ زن
کہ ذرے ریگ زاروں کی وہ پازیب قدیم
جس پہ پڑ سکتا نہیں دست لئیم
ریگ صحرا زرگری کی ایک کی لہروں سے دور
چشمۂ مکر و ریا شہروں سے دور
ریگ شب بیدار ہے سنتی ہے ہر جابر کی چاپ
ریگ شب بیدار ہے نگراں ہے مانند نقیب
دیکھتی ہے سایۂ آمر کی چاپ
ریگ ہر عیار غارت گر کی موت
ریگ استبداد کے طغیاں کے شور و شر کی موت
ریگ جب اٹھتی ہے اڑ جاتی ہے ہر فاتح کی نیند
ریگ کے نیزوں سے زخمی سب شہنشاہوں کے خواب
ریگ اے صحرا کی ریگ
مجھ کو اپنے جاگتے ذروں کے خوابوں کی
نئی تعبیر دے
ریگ کے ذروں ابھرتی صبح تم
آؤ صحرا کی حدوں تک آ گیا روز طرب
دل مرے صحرا نورد پیر دل
آ چوم ریگ
ہے خیالوں کے پری زادوں سے بھی معصوم ریگ
ریگ رقصاں ماہ و سال نور تک رقصاں رہے
اس کا ابریشم ملائم نرم خو خنداں رہے
دل مرے صحرا نورد پیر دل
یہ تمناؤں کا بے پایاں الاؤ
راہ گم کر دوں کی مشعل اس کے لب پر آؤ آؤ
تیرے ماضی کے خذف ریزوں سے جاگی ہے یہ آگ
آگ کی قرمز زباں پر انبساط نو کے راگ
دل مرے صحرا نورد پیر دل
سرگرانی کی شب رفتہ سے جاگ
کچھ شرر آغوش صرصر میں ہیں گم
اور کچھ زینہ بہ زینہ شعلوں کے مینار پر چڑھتے ہوئے
اور کچھ تہہ میں الاؤ کی ابھی
مضطرب لیکن مذبذب طفل کمسن کی طرح
آگ زینہ آگ رنگوں کا خزینہ
آگ ان لذات کا سر چشمہ ہے
جس سے لیتا ہے غذا عشاق کے دل کا تپاک
چوب خشک انگور اس کی مے ہے آگ
سرسراتی ہے رگوں میں عید کے دن کی طرح
آگ کاہن یاد سے اتری ہوئی صدیوں کی یہ افسانہ خواں
آنے والے قرنہا کی داستانیں لب پہ ہیں
دل مرا صحرا نورد پیر دل سن کر جواں
آگ آزادی کا دل شادی کا نام
آگ پیدائش کا افزائش کا نام
آگ کے پھولوں میں نسریں یاسمن سنبل شفیق و نسترن
آگ آرائش کا زیبائش کا نام
آگ وہ تقدیس دھل جاتے ہیں جس سے سب گناہ
آگ انسانوں کی پہلی سانس کے مانند اک ایسا کرم
عمر کا اک طول بھی جس کا نہیں کافی جواب
یہ تمناؤں کا بے پایاں الاؤ گر نہ ہو
اس لق و دق میں نکل آئیں کہیں سے بھیڑیے
اس الاؤ کو سدا روشن رکھو
ریگ صحرا کو بشارت ہو کہ زندہ ہے الاؤ
بھیڑیوں کی چاپ تک آتی نہیں
آگ سے صحرا کا رشتہ ہے قدیم
آگ سے صحرا کے ٹیڑھے رینگنے والے
گرہ آلود ژولیدہ درخت
جاگتے ہیں نغمہ در جاں رقص برپا خندہ بر لب
اور منا لیتے ہیں تنہائی میں جشن ماہتاب
ان کی شاخیں غیر مرئی طبل کی آواز پر دیتی ہیں تال
بیخ و بن سے آنے لگتی ہے خداوندی جلاجل کی صدا
آگ سے صحرا کا رشتہ ہے قدیم
رہروؤں صحرا نوردوں کے لیے ہے رہنما
کاروانوں کا سہارا بھی ہے آگ
اور صحراؤں کی تنہائی کو کم کرتی ہے آگ
آگ کے چاروں طرف پشمینہ و دستار میں لپٹے ہوئے
افسانہ گو
جیسے گرد چشم مژگاں کا ہجوم
ان کے حیرت ناک دل کش تجربوں سے
جب دمک اٹھتی ہے ریت
ذرہ ذرہ بجنے لگتا ہے مثال ساز جاں
گوش بر آواز رہتے ہیں درخت
اور ہنس دیتے ہیں اپنی عارفانہ بے نیازی سے کبھی
یہ تمناؤں کا بے پایاں الاؤ گر نہ ہو
ریگ اپنی خلوت بے نور و خودبیں میں رہے
اپنی یکتائی کی تحسیں میں رہے
اس الاؤ کو سدا روشن رکھو
یہ تمناؤں کا بے پایاں الاؤ گر نہ ہو
ایشیا افریقہ پہنائی کا نام
بے کار پہنائی کا نام
یورپ اور امریکہ دارائی کا نام
تکرار دارائی کا نام
میرا دل صحرا نورد پیر دل
جاگ اٹھا ہے مشرق و مغرب کی ایسی یک دلی
کے کاروانوں کا نیا رویا لیے
یک دلی ایسی کہ ہوگی فہم انساں سے ورا
یک دلی ایسی کہ ہم سب کہہ اٹھیں
اس قدر عجلت نہ کر
اژدہام گل نہ بن
کہہ اٹھیں ہم
تو غم کل تو نہ تھی
اب لذت کل بھی نہ بن
روز آسائش کی بے دردی نہ بن
یک دلی بن ایسا سناٹا نہ بن
جس میں تابستاں کی دوپہروں کی
بے حاصل کسالت کے سوا کچھ بھی نہ ہو
اس جفا گر یک دلی کے کارواں یوں آئیں گے
دست جادو گر سے جیسے پھوٹ نکلے ہوں طلسم
عشق حاصل خیز سے یا زور پیدائی سے جیسے ناگہاں
کھل گئے ہوں مشرق و مغرب کے جسم
جسم صدیوں کے عقیم
کارواں فرخندہ پے اور ان کا بار
کیسہ کیسہ تخت جم اور تاج کے
کوزہ کوزہ فرد کی سطوت کی مے
جامہ جامہ روز و شب محنت کا خے
نغمہ نغمہ حریت کی گرم لے
سالکو فیروز بختو آنے والے قافلو
شہر سے لوٹو گے تم تو پاؤ گے
ریت کے سرحد پہ جو روح ابد خوابیدہ تھی
جاگ اٹھی ہے شکوہ ہائے نے سے وہ
ریت کی تہہ میں جو شرمیلی سحر روئیدہ تھی
جاگ اٹھی ہے حریت کی لے سے وہ
اتنی دوشیزہ تھی اتنی مرد نا دیدہ تھی صبح
پوچھ سکتے تھے نہ اس کی عمر ہم
درد سے ہنستی نہ تھی
ذروں کی رعنائی پہ بھی ہنستی نہ تھی
ایک محجوبانہ بے خبری میں ہنس دیتی تھی صبح
اب مناتی ہے وہ صحرا کا جلال
جیسے عز و جل کے پاؤں کی یہی محراب ہو
زیر محراب آ گئی ہو اس کو بے داری کی رات
خود جناب عز و جل سے جیسے امید زفاف
سارے ناکردہ گناہ اس کے معاف
صبح صحرا شادباد
اے عروس عز و جل فرخندہ رو تابندہ کھو
تو اک ایسے حجرۂ شب سے نکل کر آئی ہے
دست قاتل نے بہایا تھا جہاں ہر سیج پر
سینکڑوں تاروں کا رخشندہ لہو پھولوں کے پاس
صبح صحرا سر مرے زانو پہ رکھ کر داستاں
ان تمنا کے شہیدوں کی نہ کہہ
ان کی نیمہ رس امنگوں آرزوؤں کی نہ کہہ
جن سے ملنے کا کوئی امکاں نہیں
شہد تیرا جن کو نش جاں نہیں
آج بھی کچھ دور اس صحرا کے پار
دیو کی دیوار کے نیچے نسیم
روز و شب چلتی ہے مبہم خوف سے سہمی ہوئی
جس طرح شہروں کی راہوں پر یتیم
نغمہ بر لب تاکہ ان کی جاں کا سناٹا ہو دور
آج بھی اس ریگ کے ذروں میں ہیں
ایسے ذرے آپ ہی اپنے غنیم
آج بھی اس آگ کے شعلوں میں ہیں
وہ شرر جو اس کی تہہ میں پر بریدہ رہ گئے
مثل حرف ناشنیدہ رہ گئے
صبح صحرا اے عروس عز و جل
آ کہ ان کی داستاں دہرائیں ہم
ان کی عزت ان کی عظمت گائیں ہم
صبح ریت اور آگ ہم سب کا جلال
یک دلی کے کارواں ان کا جمال
آؤ
اس تحلیل کے حلقے میں ہم مل جائیں
آؤ
شاد باغ اپنی تمناؤں کا بے پایاں الاؤ

ن م راشد

نظم

عقل نے تجھ کو بھلانے کے کیے لاکھ جتن
لے گئے مجھ کو کبھی مصر کے بازاروں میں
کبھی اٹلی کبھی اسپین کے گلزاروں میں
بلجیم کے، کبھی ہالینڈ کے مے خانوں میں
کبھی پیرس، کبھی لندن کے صنم خانوں میں
اور میں عقل کی باتوں میں کچھ ایسا آیا
میں یہ سمجھا کہ تجھے بھول چکا ہوں شاید

جگن ناتھ آزاد

نظم

میری رامائن ادھوری ہے ابھی
میری سیتا
اور مجھ میں حائل دوری ہے ابھی
میری سیتا اداس ہے
رشتوں کا پھیلا بن باس ہے
پھرنا ہے مجھے ابھی
جنگل جنگل صحرا صحرا ساگر ساگر
میرا حمزہ وہی میرا لچھمن ہے ابھی
زمانہ تو عیار ہے
سو بھیس بدل لیتا ہے
سادھوؤں کے بہروپ میں ہیں پوشیدہ ابھی
نہ جانے راکشش کتنے
آج پھر
زمانے نے چھل لیا ہے مجھے
میری سیتا کو
حالات کے راون نے
ہر لیا ہے ابھی
دور بہت دور
میری نگاہوں سے اوجھل
ساحل سمندر کی ریت پر
وہ بے سدھ پڑی رو رہی ہے ابھی
تاہم
اپنی شکستہ حالی سے
اس نے ہار نہیں مانی ہے ابھی
وقت کے لنکیشور کے آگے
اس نے آتم سمرپن کیا نہیں ہے ابھی
ریت میں دھنسی اپنی ننھی سی کشتی کو
وہ تک رہی ہے غور سے
اپنے رام کے قدموں کی آہٹ
کی منتظر سماعت کو سمیٹے ہوئے
سراپا بگوش بنی
دکھ کی بھٹی میں تپ کے نکھر رہی ہے ابھی
ملن کی شبھ گھڑی کا اسے ابھی ہے یقین
اس کے خشک ہونٹوں پہ ہے میرا ہی نام
رام رام رام
صاحبو
حقیقت تو یہ ہے کہ راکشس باہر نہیں ہے کہیں
راکشس تو خود اپنے اندر
درون خانۂ دل میں روپوش ہے کہیں
میری سیتا
میری بھولی بھالی سیتا کو
انتظار اس سنہرے پل کا ہے
جب میرا غصہ شانت ہوگا
اور میرے اندر سے
مریادہ پرش رام اتپن ہوں گے کبھی نہ کبھی
تب راون اپنے آپ ہی پراست ہو جائے گا
تبھی رام جی اپنی سیتا کو
اپنے پہلو میں اٹھا کر لے جائیں گے
اپنے دل کے سنگھاسن پر بٹھائیں گے تبھی
تبھی دیپ جلیں گے
گھر آنگن میں اوپر نیچے چاروں اور
تبھی دن دسہرا ہوگا
تبھی رات دیوالی ہوگی

پرویز شہریار

نظم

کہیں افسانۂ عشق و محبت
کہیں روداد سوز و ساز بھی ہے
یہی تقدیس مریم ضبط سیتا
یہی عیار و شاہد باز بھی ہے

شوکت پردیسی

نظم

یہ آدمی کی گزر گاہ شاہراہ حیات
ہزاروں سال کا بار گراں اٹھائے ہوئے
جبیں پہ کاتب تقدیر کی جلی تحریر
گلے سے سیکڑوں نقش قدم لگائے ہوئے
گزرتے وقت کے گرد و غبار کے نیچے
حسین جسم کی تابندگی چھپائے ہوئے
گزشتہ دور کی تہذیب کی منازل کو
جوان ماں کی طرح گود میں سلائے ہوئے
یہ آدمی کی گزر گاہ شاہراہ حیات
ہزاروں سال کا بار گراں اٹھائے ہوئے
ادھر سے گزرے ہیں چنگیز و نادر و تیمور
لہو میں بھیگی ہوئی مشعلیں جلائے ہوئے
غلاموں اور کنیزوں کے کارواں آئے
خود اپنے خون میں ڈوبے ہوئے نہائے ہوئے
شکستہ دوش پہ دیوار چین کو لادے
سروں پہ مصر کے احرام کو اٹھائے ہوئے
جلال شیخ و شکوہ برہمنی کے جلوس
ہوس کے سینوں میں آتش کدے چھپائے ہوئے
جہالتوں کی طویل و عریض پرچھائیں
توہمات کی تاریکیاں جگائے ہوئے
سفید قوم کے عیار تاجروں کے گروہ
فریب و مکر سے اپنی دکاں سجائے ہوئے
شکست خوردہ سیاسی گداگروں کے ہجوم
ادب سے ٹوٹی ہوئی گردنیں جھکائے ہوئے
غموں سے چور مسافر تھکے ہوئے راہی
چراغ روح کے دل کے کنول بجھائے ہوئے
یہ آدمی کی گزر گاہ شاہراہ حیات
ہزاروں سال کا بار گراں اٹھائے ہوئے
نئے افق سے نئے قافلوں کی آمد ہے
چراغ وقت کی رنگین لو بڑھائے ہوئے
بغاوتوں کی سپہ انقلاب کے لشکر
زمیں پہ پاؤں فلک پہ نظر جمائے ہوئے
غرور فتح کے پرچم ہوا میں لہراتے
ثبات و عزم کے اونچے علم اٹھائے ہوئے
ہتھیلیوں پہ لیے آفتاب اور مہتاب
بغل میں کرۂ ارض حسیں دبائے ہوئے
اٹھو اور اٹھ کے انہیں قافلوں میں مل جاؤ
جو منزلوں کو ہیں گرد سفر بنائے ہوئے
قدم بڑھائے ہوئے ہیں مجاہدان وطن
مجاہدان‌ وطن ہیں قدم بڑھائے ہوئے

علی سردار جعفری

نظم

سیاست کی فسوں سازی
تجارت کی زیاں کاری
ہوس کی گرم بازاری
کسی عیار قوت کی جہاں داری
میں دم گھٹتا ہے
ہر لمحہ عذاب جاوداں معلوم ہوتا ہے

ساجدہ زیدی

نظم

وہ سولہ بہاروں کے بعد
دوبارہ ملا ہے
تو کیا ہے
کہ مختار کو دیکھ کر
میری آنکھوں میں
حیرت کے آثار پیدا ہوئے
میرا دل بجھ گیا ہے
وہ عیار
یاروں کا یار
اپنا لہجہ اسی طرح سے نرم ریز
اور نظر تیز رکھے
مگر
اس سے کس نے کہا تھا
کہ خوشبو، شراب اور عورت سے
پرہیز رکھے۔۔۔۔۔۔

ساقی فاروقی

نظم

یہ ہر شب سوچ کر سوتا ہوں آنے والی صبحوں میں
گلوں سے پتیوں سے اوس کی بوندیں چرانی ہیں
شہہ آکاش کی نظریں نما کرنوں سے پہلے جاگ جانا ہے
صبائے عنبریں کے لمس کو محسوس کرنا ہے
لباس سبز میں ملبوس الھڑ پتیوں کی باتیں سننی ہیں
حسیں دوشیزہ کی مسکان سی کلیوں سے دو اک بات کر لوں گا
مگر کچھ کر نہیں پاتا کہ راحت روکے رکھتی ہے
کوئی افسانہ پڑھنا ہو کسی کی شاعری پہ بات کرنی ہو
کسی تخلیق سے پہلے خیال و فکر کو آزاد رکھنا ہو
کسی سارق کسی شاطر کسی کم فہم سے سچائی کہنی ہو
بڑی معصوم شکلوں میں چھپے عیار کو مکار کو شیشہ دکھانا ہو
فقیہ وقت امیر شہر کا قزاق سے ملعون سے رشتہ بتانا ہو
مگر یہ کر نہیں سکتا مصلحت خاموش رکھتی ہے
حریم مے کدے میں خانقاہوں مٹھ مدرسوں میں
برہمن شیخ سے پیر مغاں سے ساقیوں سے اور واعظ سے
یہ اکثر سوچتا ہوں جا کے کہہ دوں میں
ریا و کبر تہی اخلاص اور بد اطواری سے تیرے
جہاں میں عشق اخوت علم اور اخلاق مرتے ہیں
مگر میں کہہ نہیں سکتا عقیدت باز رکھتی ہے
تعصب خود پسندی بغض سے کبر و حسد سے
بساط ذہن و دل کو چاہتا ہوں پاک کر لوں
زر و املاک کی خواہش سے اپنے آپ کو آزاد کر لوں
کہ جب جب سعی کرتا ہوں ہوس انکار کرتی ہے
مگر ایقان ہے میرا ہمارے عہد کے بچے
مرے کذب و ریا کو مکر کو اور بے ایمانی کو
نفاق و بد قماشی کو مرے ظاہر کو باطن کو
ہویدا کر کے چھوڑیں گے علی الاعلان کہہ دیں گے
کہ میرے باپ ایسے تھے مرے استاذ ایسے تھے
سو ان کی بات سے اعمال سے شرمندہ ہوں میں بھی
یہ کہنے سے انہیں عزت نہ روکے گی
نہ ان کو خوف روکے گا
انہیں کچھ بھی نہ روکے گا
چلن بدلا ہوا ہوگا
ہماری ساری عزت ساری ذلت دوسروں کے حق کی پامالی
کتاب حق کے پنوں پر بہت واضح لکھی ہوں گی

ابوبکر عباد

نظم

کانٹوں کے تاج چنو
یا
جب سچ کی راہ چلو
لفظوں کے پیچ و تاب میں الو نہ بنو
شاعری مت کرو!
موٹے جھوٹے یجمانوں کی جھڑکیاں ہوں
یا کاہل ریاکار افسروں کا پھٹکاریں
یا پھر
دبلی پتلی دق زدہ بیویوں کے طعنے ہوں
یا طوطا چشم عیار رت بدلی
محبوباؤں کی جھوٹی مسکراہٹیں
خاموش رہو
ہر شے کو
قدرت کا کرشمہ سمجھو

خلیل مامون

نظم

اے ظلم کے اور ستم کے بانی
اے شوخ جفا شعار عیار
مجھ کو دوبھر ہے زندگانی
میری آنکھوں میں ہے جہاں تار

عظیم الدین احمد

نظم

اگر میں کہتا ہوں جینا ہے قید تنہائی
تو زندگانی کی قیمت پہ حرف کیوں آئے
اگر نہ آیا مجھے سازگار وصل حبیب
تو اعتماد محبت پہ حرف کیوں آئے
اگر ملے مجھے ورثے میں کچھ شکستہ کھنڈر
تو کائنات کی وسعت پہ حرف کیوں آئے
اگر دکھائی دئے مجھ کو آدمی آسیب
تو عصر نو کی بصیرت پہ حرف کیوں آئے
اگر نہ راہ یقیں پا سکی مری تشکیک
تو فکر و فن کی شرافت پہ حرف کیوں آئے
اگر خزاں ہی ملی مجھ کو آنکھ کھلنے پر
تو فصل گل کی امانت پہ حرف کیوں آئے
اگر مرے غم بے نام ہمیں ملی وحشت
تو بزم جشن مسرت پہ حرف کیوں آئے
میں اپنے عہد کا ہوں نوحہ خواں نہ دیجے داد
قصیدہ خواں کی روایت پہ حرف کیوں آئے
اگر ہنر ہے مرا جنس کم عیار تو ہو
ضمیر و دل کی تجارت پہ حرف کیوں آئے
میں اپنے خوابوں کا بھٹکا ہوا مسافر ہوں
اگر مجھے نہ ملی منزل نجات تو کیا
میں اپنی روح کی تنہائیوں کا شعلہ ہوں
ہوائے دہر میں حاصل نہیں ثبات تو کیا
میں اپنی طرفگی طبع کا تو پی لوں زہر
جو دسترس میں نہیں چشمۂ حیات تو کیا
میں اپنی ذات کی خلوت کا حیرتی ہی سہی
جو مجھ پہ کھل نہ سکا راز کائنات تو کیا
میں اپنے خوں کے چراغوں کو روشنی دے دوں
سحر نصیب نہ ہو پائے میری رات تو کیا
میں آپ سے نہ کہوں گا کہ ہے زیاں جاں کا
خیال شیشۂ دل سنگ آزما نہ کرے
میں آپ سے نہیں چاہوں گا داد جاں بازی
دعا ہے آپ کو غم درد آشنا نہ کرے
میں آپ سے نہیں مانگوں گا خوں بہائے وفا
کوئی تو ترک رہ و رسم عاشقانہ کرے
میں آپ کو نہ دکھاؤں گا اپنے زخمی خواب
خلل ہو آپ کے آرام میں خدا نہ کرے

وحید اختر

نظم

ان میں خوش کار بھی ہیں ان میں ریاکار بھی ہیں
ان میں غم خوار بھی ہیں ان میں جفا کار بھی ہیں
خارہائے محن و درد کے تجار بھی ہیں
اور گلہائے‌ محبت کے خریدار بھی ہیں
شعبدہ گر بھی ہیں چالاک بھی عیار بھی ہیں
اور گردیدۂ محنت بھی ہیں فن کار بھی ہیں
ان میں بے ہوش بھی ہیں ان میں جنوں کار بھی ہیں
ان میں دانا بھی ہیں بینا بھی ہیں ہوشیار بھی ہیں

داؤد غازی

نظم

ہجر درویش نہیں
ہجر کم اندیش نہیں
ہجر نہیں پیر مغاں
ہجر عیار ہے
دنیا کا طلب گار ہے
اب تک ہے جواں

ثمینہ راجہ

نظم

بہت عیار تھے وہ لوگ
وہ سارا دن خدا کو یاد کرتے
مسجدوں میں جاتے
روتے گڑگڑاتے اور تسبیحیں پڑھا کرتے
زمانہ معتقد تھا اس قدر ان کا
وہ جب باہر نکلتے
لوگ ان کے راستے کی گرد کو
اپنے عماموں سے ہٹاتے تھے
ان کی خاطر خوان پر نعمت سجاتے تھے

نعمان شوق

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے