کی تلاش کا نتیجه | موضو - نظم, صفحہ haamil

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "haamil"

نظم کے متعلقہ نتیجہ "haamil"

نظم

سلسلۂ روز و شب نقش گر حادثات
سلسلۂ روز و شب اصل حیات و ممات
سلسلۂ روز و شب تار حریر دو رنگ
جس سے بناتی ہے ذات اپنی قبائے صفات
سلسلۂ روز و شب ساز ازل کی فغاں
جس سے دکھاتی ہے ذات زیر و بم ممکنات
تجھ کو پرکھتا ہے یہ مجھ کو پرکھتا ہے یہ
سلسلۂ روز و شب صیرفی کائنات
تو ہو اگر کم عیار میں ہوں اگر کم عیار
موت ہے تیری برات موت ہے میری برات
تیرے شب و روز کی اور حقیقت ہے کیا
ایک زمانے کی رو جس میں نہ دن ہے نہ رات
آنی و فانی تمام معجزہ ہائے ہنر
کار جہاں بے ثبات کار جہاں بے ثبات
اول و آخر فنا باطن و ظاہر فنا
نقش کہن ہو کہ نو منزل آخر فنا
ہے مگر اس نقش میں رنگ ثبات دوام
جس کو کیا ہو کسی مرد خدا نے تمام
مرد خدا کا عمل عشق سے صاحب فروغ
عشق ہے اصل حیات موت ہے اس پر حرام
تند و سبک سیر ہے گرچہ زمانے کی رو
عشق خود اک سیل ہے سیل کو لیتا ہے تھام
عشق کی تقویم میں عصر رواں کے سوا
اور زمانے بھی ہیں جن کا نہیں کوئی نام
عشق دم جبرئیل عشق دل مصطفی
عشق خدا کا رسول عشق خدا کا کلام
عشق کی مستی سے ہے پیکر گل تابناک
عشق ہے صہبائے خام عشق ہے کاس الکرام
عشق فقیہہ حرام عشق امیر جنود
عشق ہے ابن السبیل اس کے ہزاروں مقام
عشق کے مضراب سے نغمۂ تار حیات
عشق سے نور حیات عشق سے نار حیات
اے حرم قرطبہ عشق سے تیرا وجود
عشق سراپا دوام جس میں نہیں رفت و بود
رنگ ہو یا خشت و سنگ چنگ ہو یا حرف و صوت
معجزۂ فن کی ہے خون جگر سے نمود
قطرۂ خون جگر سل کو بناتا ہے دل
خون جگر سے صدا سوز و سرور و سرود
تیری فضا دل فروز میری نوا سینہ سوز
تجھ سے دلوں کا حضور مجھ سے دلوں کی کشود
عرش معلی سے کم سینۂ آدم نہیں
گرچہ کف خاک کی حد ہے سپہر کبود
پیکر نوری کو ہے سجدہ میسر تو کیا
اس کو میسر نہیں سوز و گداز سجود
کافر ہندی ہوں میں دیکھ مرا ذوق و شوق
دل میں صلوٰۃ و درود لب پہ صلوٰۃ و درود
شوق مری لے میں ہے شوق مری نے میں ہے
نغمۂ اللہ ہو میرے رگ و پے میں ہے
تیرا جلال و جمال مرد خدا کی دلیل
وہ بھی جلیل و جمیل تو بھی جلیل و جمیل
تیری بنا پائیدار تیرے ستوں بے شمار
شام کے صحرا میں ہو جیسے ہجوم نخیل
تیرے در و بام پر وادی ایمن کا نور
تیرا منار بلند جلوہ گہ جبرئیل
مٹ نہیں سکتا کبھی مرد مسلماں کہ ہے
اس کی اذانوں سے فاش سر کلیم و خلیل
اس کی زمیں بے حدود اس کا افق بے ثغور
اس کے سمندر کی موج دجلہ و دنیوب و نیل
اس کے زمانے عجیب اس کے فسانے غریب
عہد کہن کو دیا اس نے پیام رحیل
ساقی ارباب ذوق فارس میدان شوق
بادہ ہے اس کا رحیق تیغ ہے اس کی اصیل
مرد سپاہی ہے وہ اس کی زرہ لا الہ
سایۂ شمشیر میں اس کی پنہ لا الہ
تجھ سے ہوا آشکار بندۂ مومن کا راز
اس کے دنوں کی تپش اس کی شبوں کا گداز
اس کا مقام بلند اس کا خیال عظیم
اس کا سرور اس کا شوق اس کا نیاز اس کا ناز
ہاتھ ہے اللہ کا بندۂ مومن کا ہاتھ
غالب و کار آفریں کار کشا کارساز
خاکی و نوری نہاد بندۂ مولا صفات
ہر دو جہاں سے غنی اس کا دل بے نیاز
اس کی امیدیں قلیل اس کے مقاصد جلیل
اس کی ادا دل فریب اس کی نگہ دل نواز
آج بھی اس دیس میں عام ہے چشم غزال
اور نگاہوں کے تیر آج بھی ہیں دل نشیں
بوئے یمن آج بھی اس کی ہواؤں میں ہے
رنگ حجاز آج بھی اس کی نواؤں میں ہے
دیدۂ انجم میں ہے تیری زمیں آسماں
آہ کہ صدیوں سے ہے تیری فضا بے اذاں
کون سی وادی میں ہے کون سی منزل میں ہے
عشق بلا خیز کا قافلۂ سخت جاں
دیکھ چکا المنی شورش اصلاح دیں
جس نے نہ چھوڑے کہیں نقش کہن کے نشاں
حرف غلط بن گئی عصمت پیر کنشت
اور ہوئی فکر کی کشتئ نازک رواں
چشم فرانسیس بھی دیکھ چکی انقلاب
جس سے دگر گوں ہوا مغربیوں کا جہاں
ملت رومی نژاد کہنہ پرستی سے پیر
لذت تجدیدہ سے وہ بھی ہوئی پھر جواں
روح مسلماں میں ہے آج وہی اضطراب
راز خدائی ہے یہ کہہ نہیں سکتی زباں
نرم دم گفتگو گرم دم جستجو
رزم ہو یا بزم ہو پاک دل و پاک باز
نقطۂ پرکار حق مرد خدا کا یقیں
اور یہ عالم تمام وہم و طلسم و مجاز
عقل کی منزل ہے وہ عشق کا حاصل ہے وہ
حلقۂ آفاق میں گرمئ محفل ہے وہ
کعبۂ ارباب فن سطوت دین مبیں
تجھ سے حرم مرتبت اندلسیوں کی زمیں
ہے تہ گردوں اگر حسن میں تیری نظیر
قلب مسلماں میں ہے اور نہیں ہے کہیں
آہ وہ مردان حق وہ عربی شہسوار
حامل خلق عظیم صاحب صدق و یقیں
جن کی حکومت سے ہے فاش یہ رمز غریب
سلطنت اہل دل فقر ہے شاہی نہیں
جن کی نگاہوں نے کی تربیت شرق و غرب
ظلمت یورپ میں تھی جن کی خرد راہ بیں
جن کے لہو کے طفیل آج بھی ہیں اندلسی
خوش دل و گرم اختلاط سادہ و روشن جبیں
دیکھیے اس بحر کی تہہ سے اچھلتا ہے کیا
گنبد نیلوفری رنگ بدلتا ہے کیا
وادی کہسار میں غرق شفق ہے سحاب
لعل بدخشاں کے ڈھیر چھوڑ گیا آفتاب
سادہ و پرسوز ہے دختر دہقاں کا گیت
کشتئ دل کے لیے سیل ہے عہد شباب
آب روان کبیر تیرے کنارے کوئی
دیکھ رہا ہے کسی اور زمانے کا خواب
عالم نو ہے ابھی پردۂ تقدیر میں
میری نگاہوں میں ہے اس کی سحر بے حجاب
پردہ اٹھا دوں اگر چہرۂ افکار سے
لا نہ سکے گا فرنگ میری نواؤں کی تاب
جس میں نہ ہو انقلاب موت ہے وہ زندگی
روح امم کی حیات کشمکش انقلاب
صورت شمشیر ہے دست قضا میں وہ قوم
کرتی ہے جو ہر زماں اپنے عمل کا حساب
نقش ہیں سب ناتمام خون جگر کے بغیر
نغمہ ہے سودائے خام خون جگر کے بغیر

علامہ اقبال

نظم

یہ تری آنکھوں کی بے زاری یہ لہجے کی تھکن
کتنے اندیشوں کی حامل ہیں یہ دل کی دھڑکنیں
پیشتر اس کے کہ ہم پھر سے مخالف سمت کو
بے خدا حافظ کہے چل دیں جھکا کر گردنیں

احمد فراز

نظم

وہ ایک طرز سخن کی خوشبو
وہ ایک مہکا ہوا تکلم
لبوں سے جیسے گلوں کی بارش
کہ جیسے جھرنا سا گر رہا ہو
کہ جیسے خوشبو بکھر رہی ہو
کہ جیسے ریشم الجھ رہا ہو
عجب بلاغت تھی گفتگو میں
رواں تھا دریا فصاحتوں کا
وہ ایک مکتب تھا آگہی کا
وہ علم و دانش کا مے کدہ تھا
وہ قلب اور ذہن کا تصادم
جو گفتگو میں رواں دواں تھا
وہ اس کے الفاظ کی روانی
وہ اس کا رک رک کے بات کرنا
وہ شعلۂ لفظ اور معانی
کہیں لپکنا کہیں ٹھہرنا
ٹھہر کے پھر وہ کلام کرنا
بہت سے جذبوں کی پردہ داری
بہت سے جذبوں کو عام کرنا
جو میں نے پوچھا
گزشتہ شب کے مشاعرے میں بہت سے شیدائی منتظر تھے
مجھے بھی یہ ہی پتہ چلا تھا کہ آپ تشریف لا رہے ہیں
مگر ہوا کیا
ذرا توقف کے بعد بولے نہیں گیا میں
نہ جا سکا میں
سنو ہوا کیا
میں خود کو مائل ہی کر نہ پایا
یہ میری حالت میری طبیعت
پھر اس پہ میری یہ بد مزاجی و بد حواسی
یہ وحشت دل
میاں حقیقت ہے یہ بھی سن لو کہ اب ہمارے مشاعرے بھی
نہیں ہیں ان وحشتوں کے حامل
جو میری تقدیر بن چکی ہیں
جو میری تصویر بن چکی ہیں
جو میری تقصیر بن چکی ہیں
پھر اک توقف
کہ جس توقف کی کیفیت پر گراں سماعت گزر رہی تھی
اس ایک ساعت کا ہاتھ تھامے یہ اک وضاحت گزر رہی تھی
ادب فروشوں نے جاہلوں نے مشاعرے کو بھی اک تماشہ بنا دیا ہے
غزل کی تقدیس لوٹ لی ہے ادب کو مجرا بنا دیا ہے
سخن وروں نے بھی جانے کیا کیا ہمارے حصے میں رکھ دیا ہے
ستم تو یہ ہے کہ چیخ کو بھی سخن کے زمرے میں رکھ دیا ہے
الٰہی توبہ
سماعتوں میں خراشیں آنے لگی ہیں اب اور شگاف ذہنوں میں پڑ گئے ہیں
میاں ہمارے قدم تو کب کے زمیں میں خفت سے گڑ گئے ہیں
خموشیوں کے دبیز کہرے سے چند لمحوں کا پھر گزرنا
وہ جیسے خود کو اداسیوں کے سمندروں میں تلاش کرنا
وہ جیسے پھر سرمئی افق پر ستارے الفاظ کے ابھرنا
یہ زندگی سے جو بے نیازی ہے کس لیے ہے
یہ روز و شب کی جو بد حواسی ہے کس لیے ہے
بس اتنا سمجھو
کہ خود کو برباد کر چکا ہوں
سخن تو آباد خیر کیا ہو
مگر جہاں دل دھڑک رہے ہوں وہ شہر آباد کر چکا ہوں
بچا ہی کیا ہے
تھا جس کے آنے کا خوف مجھ کو وہ ایک ساعت گزر چکی ہے
وہ ایک صفحہ کہ جس پے لکھا تھا زندگی کو وہ کھو چکا ہے
کتاب ہستی بکھر چکی ہے
پڑھا تھا میں نے بھی زندگی کو
مگر تسلسل نہیں تھا اس میں
ادھر ادھر سے یہاں وہاں سے عجب کہانی گڑھی گئی تھی
سمجھ میں آئی نہ اس لیے بھی کے درمیاں سے پڑھی گئی تھی
سمجھتا کیسے
نہ فلسفی میں نہ کوئی عالم
عقوبتوں کے سفر پہ نکلا میں اک ستارہ ہوں آگہی کا
اجل کے ہاتھوں میں ہاتھ ڈالے اک استعارہ ہوں زندگی کا
عتاب نازل ہوا ہے جس پر میں وہ ہی معتوب آدمی ہوں
ستم گروں کو طلب ہے جس کی میں وہ ہی مطلوب آدمی ہوں
کبھی محبت نے یہ کہا تھا میں ایک محبوب آدمی ہوں
مگر وہ ضرب جفا پڑی ہے کہ ایک مضروب آدمی ہوں
میں ایک بیکل سا آدمی ہوں بہت ہی بوجھل سا آدمی ہوں
سمجھ رہی ہے یہ دنیا مجھ کو میں ایک پاگل سا آدمی ہوں
مگر یہ پاگل یہ نیم وحشی خرد کے ماروں سے مختلف ہے
جو کہنا چاہا تھا کہہ نہ پایا
کہا گیا جو اسے یہ دنیا سمجھ نہ پائی
نہ بات اب تک کہی گئی ہے
نہ بات اب تک سنی گئی ہے
شراب و شعر و شعور کا جو اک تعلق ہے اس کے بارے میں رائے کیا ہے
سنا ہے ہم نے کہ آپ پر بھی بہت سے فتوے لگے ہیں لیکن
شراب‌ نوشی حرام ہے تو
یہ مسئلہ بھی بڑا عجب ہے
میں ایک میکش ہوں یہ تو سچ ہے
مگر یہ میکش کبھی کسی کے لہو سے سیراب کب ہوا ہے
ہمیشہ آنسو پیے ہیں اس نے ہمیشہ اپنا لہو پیا ہے
یہ بحث چھوڑو حرام کیا ہے حلال کیا ہے عذاب کیا ہے ثواب کیا ہے
شراب کیا ہے
اذیتوں سے نجات ہے یہ حیات ہے یہ
شراب و شب اور شاعری نے بڑا سہارا دیا ہے مجھ کو
سنبھال رکھا شراب نے اور رہی ہے محسن یہ رات میری
اسی نے مجھ کو دئے دلاسے سنی ہے اس نے ہی بات میری
ہمیشہ میرے ہی ساتھ جاگی ہمیشہ میرے ہی ساتھ سوئی
میں خوش ہوا تو یہ مسکرائی میں رو دیا تو یہ ساتھ روئی
یہ شعر گوئی ہے خود کلامی کا اک ذریعہ
اسی ذریعہ اسی وسیلہ سے میں نے خود سے وہ باتیں کی ہیں
جو دوسروں سے میں کہہ نہ پایا
حرام کیا ہے حلال کیا ہے یہ سب تماشے ہیں مفتیوں کے
یہ سارے فتنے ہیں مولوی کے
حرام کر دی تھی خود کشی بھی کہ اپنی مرضی سے مر نہ پائے
یہ مے کشی بھی حرام ٹھہری کہ ہم کو اپنا لہو بھی پینے کا حق نہیں ہے
کہ اپنی مرضی سے ہم کو جینے کا حق نہیں ہے
کسے بتائیں
ضمیر و ظرف بشر پہ موقوف ہیں مسائل
سمندروں میں انڈیل جتنی شراب چاہے
نہ حرف پانی پہ آئے گا اور نہ اوس کی تقدیس ختم ہوگی
تو مے کشی کو حرام کہنے سے پہلے دیکھو
کہ پینے والے کا ظرف کیا ہے ہیں کس کے ہاتھوں میں جام و مینا
یہ نکتہ سنجی یہ نکتہ دانی جو مولوی کی سمجھ میں آتی تو بات بنتی
نہ دین و مذہب کو جس نے سمجھا نہ جس نے سمجھا ہے زندگی کو
طہورا پینے کی بات کر کے حرام کہتا ہے مے کشی کو
جو دین و مذہب کا ذکر آیا تو میں نے پوچھا
کہ اس حوالے سے رائے کیا ہے
یہ خود پرستی خدا پرستی کے درمیاں کا جو فاصلہ ہے
جو اک خلا ہے یہ کیا بلا ہے
یہ دین و مذہب فقط کتابیں
بجز کتابوں کے اور کیا ہے
کتابیں ایسی جنہیں سمجھنے کی کوششیں کم ہیں اور زیادہ پڑھا گیا ہے
کتابیں ایسی کہ عام انساں کو ان کے پڑھنے کا حق ہے لیکن
انہیں سمجھنے کا حق نہ ہرگز دیا گیا ہے
کہ ان کتابوں پہ دین و مذہب کے ٹھیکیدار اجارہ داروں کی دسترس ہے
اسی لیے تو یہ دین و مذہب فساد د فتنہ بنے ہوئے ہیں
یہ دین و مذہب
جو علم و حکمت کے ساتھ ہو تو سکون ہوگا
جو دسترس میں ہو جاہلوں کی جنون ہوگا
یہ عشق کیا ہے یہ حسن کیا ہے
یہ زندگی کا جواز کیا ہے
یہ تم ہو جی جی کے مر رہے ہو یہ میں ہوں مر مر کے جی رہا ہوں
یہ راز کیا ہے
ہے کیا حقیقت مجاز کیا ہے
سوائے خوابوں کے کچھ نہیں ہے
بجز سرابوں کے کچھ نہیں ہے
یہ اک سفر ہے تباہیوں کا اداسیوں کی یہ رہ گزر ہے
نہ اس کو دنیا کا علم کوئی نہ اس کو اپنی کوئی خبر ہے
کبھی کہیں پر نظر نہ آئے کبھی ہر اک شے میں جلوہ گر ہے
کبھی زیاں ہے کبھی ضرر ہے
نہ خوف اس کو نہ کچھ خطر ہے
کبھی خدا ہے کبھی بشر ہے
ہوا حقیقت سے آشنا تو یہ سوئے دار و رسن گیا ہے
کبھی ہنسا ہے یہ زیر خنجر کبھی یہ سولی پہ ہنس دیا ہے
کبھی یہ گل نار ہو گیا ہے سناں پہ گفتار ہو گیا ہے
کبھی ہوا ہے یہ غرق دریا
کبھی یہ تقدیر دشت و صحرا
رقم ہوا ہے یہ آنسوؤں میں
کبھی لہو نے ہے اس کو لکھا
حکایت دل حکایت جاں حکایت زندگی یہی ہے
اگر سلیقے سے لکھی جائے عبارت زندگی یہی ہے
یہ حسن ہے اس دھنک کی صورت
کہ جس کے رنگوں کا فلسفہ ہی کبھی کسی پر نہیں کھلا ہے
یہ فلسفہ جو فریب پیہم کا سلسلہ ہے
کہ اس کے رنگوں میں اک اشارہ ہے بے رخی کا
اک استعارہ ہے زندگی کا
کبھی علامت ہے شوخیوں کی
کبھی کنایہ ہے سادگی کا
بدلتے موسم کی کیفیت کے ہیں رنگ پنہاں اسی دھنک میں
کشش شرارت و جاذبیت کے شوخ رنگوں نے اس دھنک کو عجیب پیکر عطا کیا ہے اک ایسا منظر عطا کیا ہے
کہ جس کے سحر و اثر میں آ کر
لہو بہت آنکھیں رو چکی ہیں بہت تو بینائی کھو چکی ہیں
بصارتیں کیا بصیرتیں بھی تو عقل و دانائی کھو چکی ہیں
نہ جانے کتنے ہی رنگ مخفی ہیں اس دھنک میں
بس ایک رنگ وفا نہیں ہیں
اس ایک رنگت کی آرزو نے لہو رلایا ہے آدمی کو
یہی بتایا ہے آگہی کو
یہ اک چھلاوا ہے زندگی کا
حسین دھوکہ ہے زندگی کا
مگر مقدر ہے آدمی کا
فریب گندم سمجھ میں آیا تو میں نے جانا
یہ عشق کیا ہے یہ حسن کیا ہے
یہ ایک لغزش ہے جس کے دم سے حیات نو کا بھرم کھلا ہے

طارق قمر

نظم

اے جوانان وطن روح جواں ہے تو اٹھو
آنکھ اس محشر نو کی نگراں ہے تو اٹھو
خوف بے حرمتی و فکر زیاں ہے تو اٹھو
پاس ناموس نگاران جہاں ہے تو اٹھو
اٹھو نقارۂ افلاک بجا دو اٹھ کر
ایک سوئے ہوئے عالم کو جگا دو اٹھ کر
ایک اک سمت سے شبخون کی تیاری ہے
لطف کا وعدہ ہے اور مشق جفا کاری ہے
محفل زیست پہ فرمان قضا جاری ہے
شہر تو شہر ہے گاؤں پہ بھی بمباری ہے
یہ فضا میں جو گرجتے ہوئے طیارے ہیں
برسر دوش ہوا موت کے ہرکارے ہیں
اس طرف ہاتھوں میں شمشیریں ہی شمشیریں ہیں
اس طرف ذہن میں تدبیریں ہی تدبیریں ہیں
ظلم پر ظلم ہیں تعزیروں پہ تعزیریں ہیں
سر پہ تلوار ہے اور پاؤں میں زنجیریں ہیں
ایک ہو ایک کہ ہنگامۂ محشر ہے یہی
عرصۂ زیست کا ہنگامۂ اکبر ہے یہی
اپنی سرحد پہ جو اغیار چلے آتے ہیں
شعلہ افشاں و شرر بار چلے آتے ہیں
خون پیتے ہوئے سرشار چلے آتے ہیں
تم جو اٹھ جاؤ تو بے کار چلے آتے ہیں
خوں جو بہہ نکلا ہے اس خوں میں بہا دو ان کو
ان کی کھودی ہوئی خندق میں گرا دو ان کو
رنگ گلہائے گلستان وطن تم سے ہے
سورش نعرۂ رندان وطن تم سے ہے
نشۂ نرگس خوبان وطن تم سے ہے
عفت ماہ جبینان وطن تم سے ہے
تم ہو غیرت کے امیں تم ہو شرافت کے امیں
اور یہ خطرے میں ہیں احساس تمہیں ہے کہ نہیں
یہ درندے یہ شرافت کے پرانے دشمن
تم کہ ہو حامل آداب و روایات کہن
جادہ پیما کے لیے خضر ہو تم یہ رہزن
تم ہو خرمن کے نگہبان یہ برق خرمن
خطۂ پاک میں زنہار نہ آنے پائیں
آ ہی جائیں جو یہ زندہ تو نہ جانے پائیں
مرد و زن پیر و جواں ان کے مظالم کے شکار
خون معصوم میں ڈوبی ہوئی ان کی تلوار
یہ قیامت کے ہوس ناک غضب کے خوں خار
ان کے عصیاں کی نہ حد ہے نہ جرائم کا شمار
یہ ترحم سے نہ دیکھیں گے کسی کی جانب
ان کی توپوں کے دہن کر دو انہی کی جانب
یہ تو ہیں فتنۂ بیدار دبا دو ان کو
یہ مٹا دیں گے تمدن کو مٹا دو ان کو
پھونک دو ان کو جھلس دو کہ جلا دو ان کو
شان شایان وطن ہو یہ بتا دو ان کو
یاد ہے تم کو کن اسلاف کی تم یادیں ہو
تم تو خالد کے پسر بھیم کی اولادیں ہو
تم تو تنہا بھی نہیں ہو کئی دم ساز بھی ہیں
روس کے مرد بھی ہیں چین کے جاں باز بھی ہیں
کچھ نہ کچھ ساتھ فرنگی کے فسوں ساز بھی ہیں
اور ہم جیسے بہت زمزمہ پرداز بھی ہیں
دور انسان کے سر سے یہ مصیبت کر دو
آگ دوزخ کی بجھا دو اسے جنت کر دو

اسرار الحق مجاز

نظم

ماتحت کی ضعیف آنکھوں میں
ایک بجھتی ہوئی ذہانت تھی
افسروں کے لطیف لہجے میں
قہر تھا، زہر تھا، خطابت تھی
یہ ہر اک دن کا واقعہ، اس دن
صرف اس اہمیت کا حامل تھا
کہ شرافت کے زعم کے با وصف
میں بھی ان افسروں میں شامل تھا

مصطفی زیدی

نظم

دریا کے دو ساحل ہیں اور دونوں ہی ناپید
شر ہے دست سیہ اور خیر کا حامل روئے سفید
اک بار مژگاں اک لب خند

ن م راشد

نظم

چلو یوں سہی میرا دل دل نہیں تھا
وفا کا لہو اس میں شامل نہیں تھا
یہ سچی محبت کا حامل نہیں تھا
تمہاری پرستش کے قابل نہیں تھا
یہ بہتر ہے اب تم مجھے بھول جاؤ
غضب کی تھی اف وہ ملاقات پہلی
جب اک کم زباں سے تھی کی بات پہلی
وہ ہلکی سی بوندیں وہ برسات پہلی
خدا جانے کیسی تھی وہ رات پہلی
یہ بہتر ہے اب تم مجھے بھول جاؤ

م حسن لطیفی

نظم

گوشہ گوشہ تیرا نور علم سے معمور ہے
ذرہ ذرہ حامل نور چراغ طور ہے

عرش ملسیانی

نظم

لفظ ہی روح کا دانائے سبل
لفظ ہے اس کا جمال
لفظ ہے اس کا جلال
لفظ موجود بھی ہے غیب بھی ہے
لفظ ہے حامل اسرار و رموز
لفظ نمرود کی آتش میں گل افشاں
لفظ سے وادیٔ سینا بھی ہوئی بقعۂ نور
ید بیضا بھی ہے لفظ
دم عیسیٰ بھی ہے لفظ
لفظ ہی شق قمر
لفظ براق ہے معراج کی شب
لفظ ہی روح امیں
۲
میں بھی اک لفظ ہی تھا
مگر اب بکھرا ہوا حرفوں میں
حرف ظلمات میں محصور ہوئے
منتظر ہوں
دم عیسیٰ
ید بیضا
ان کو پھر لفظ بنا دے

اعجاز فاروقی

نظم

خاموش رات اس کی منتظر تھی
وہ ایک مرتبہ پھر سے
اپنی مسحور کن شخصیت سے
میری نیند کو شکست دیتے ہوئے
میرے خواب کی دہلیز پر
ماضی کی یادوں سے مہکتا ہوا
بکے تھامے کھڑا تھا
میں دستک کی منتظر تھی
وہ دبے قدموں میرے خواب کی ادھ کھلی کھڑکی سے
اندر داخل ہوا اور خاموشی سے میرے پیچھے آن کھڑا ہوا
وہ خاموشی بالکل ایسی تھی کہ
جیسے صحرا میں کوئی زخمی اداس پنچھی
کسی دیو کی قید میں منتظر ہو
کسی مسیحا کی مسیحائی کا
اور وہ مسیحا خود کسی مسیحا کے انتظار میں
شمع جلائے کسی کی چوکھٹ پر بیٹھا ہو
وہ انگلیوں کی پوروں میں سگریٹ تھامے کھڑا تھا
وہ لمبے لمبے کش لے رہا تھا
پھر وہ تھک گیا
جیسے لمبی مسافت کے باد
کوئی مسافر کسی کارواں سرائے میں جا بیٹھے
اور یک دم اپنی منزل کا تصور آتے ہی
اس بے وجہ تھکان کو الوداع کہہ دے
اس نے اپنے ہاتھوں کو ایک بار پھر سے حرکت دی
انگلیوں میں دبے سگریٹ کو
ہونٹوں کے قریب لے گیا
اور نرمی سے اسے چھوا
وہ اس کا آخری کش تھا
آخری کش جیسے آخری وار ہو
لبوں پر فاتحانہ مسکراہٹ سجائے اس نے آخری کش مکمل کیا
پھر زمین پہ پھینکا اور مسل دیا
وہ اور ناری ایک سی خصوصیات کے حامل ہیں
جب تک سلگن باقی رہے
ہونٹوں کے قریب رہیں گے
اور ٹھنڈی ہوتے ہی اپنے انجام کو پہنچ جائیں گے
سرد رات اس کی تپش اور حرارت کو بھی نگل چکی تھی
وہ بھی اپنے انجام کی آخری سرحدوں پر تھی
رات چھٹتی جا رہی تھی
جیسے اس کی دیوانگی کی وحشت سے ڈرے ہوئے تاروں کو
لوری سناتے سناتے اس نے مقدس چاند کو الوداع کہہ دیا ہو
اور میں اپنی آنکھوں میں لا حاصل کی تمنا سجائے
جیسے تیز آندھی میں تاک میں پڑے ہوئے دئیے کے گرد ہتھیلیاں جمائے کھڑی تھی

سائرہ اقبال

نظم

کبھی کیا زخم بھرتے ہیں
کبھی کیا خواب مرتے ہیں
چلو ہم مان لیتے ہیں
کہ ہم سے کچھ پرانی سوچ کے حامل
نئی خواہش سے ڈرتے ہیں

خمار میرزادہ

نظم

مجھے معاف کرنا
ہواؤں کے پرسوز چہرو
کہ میں نے تمہارے فلک در فلک تیوروں کا سراب بھی پایا نہیں ہے
مجھے معاف کرنا ستاروں کے سایو
تمہاری سیاہی کے بوسیدہ نقطوں میں ڈھلنے سے اب تک میں قاصر رہا ہوں
غیابوں کی نظروں سے تنہا بہا ہوں
مجھے معاف کرنا محبت کے حامل سرابو
کہ بانہوں میں آ کر بسا ہوں تمہاری
سمندر کی اجڑی صداؤں کی صورت
کسے ڈھونڈتی ہے مری بے زبانی
مجھے معاف کرنا ابھی تک میں یہ جان پایا نہیں ہوں
مجھے معاف کرنا ابد کے سلاسل میں جکڑی ہوئی ساری چیزو
کہ میں وقت کی بوند میں پیاس کی طرح بویا گیا ہوں
زمانوں کی آنکھوں سے رویا گیا ہوں
میں منظر کسی لمحہ ماورا کا
میں ہم عصر ہوں تتلیوں کے پروں کا
ہوا کا
خدا

ریاض لطیف

نظم

میں اندھیرے کی پھیلی ہوئی کھائیوں میں جو گم ہو گیا ہوں
تو اس کی وجہ یہ نہیں ہے
کہ مجھ میں ضیا بار کرنوں کا فقدان ہے
یا روشنی کی تمازت کو سہنے کا حامل نہیں ہوں
حقیقت تو یہ ہے
جسے روشنی کا تم منبع سمجھ کر
ازل سے طواف مکرر میں مصروف ہو
وہ تمہارے ہی اندر کی سمٹی ہوئی تاریکیوں کے سوا کچھ نہیں ہے
اور میں۔۔۔۔!
میں مجسم منور نگاہی کی خواہش لئے
سفر میں رہا ہوں
سفر میں رہوں گا ابد تک!!

یوسف تقی

نظم

آخر لوگ طوائف سے اتنی نفرت کیوں کرتے ہیں
آج کے دور میں اکثر انساں
ایسے کردار کے حامل ہیں
جس میں ایک طوائف پنہاں ہے
فرق صرف اتنا ہے
وہ کوٹھے کے اوپر ہے
یہ کوٹھے کے نیچے ہے
شاید تمہیں معلوم نہیں
عالیشان محلوں میں
بن موسم کے گل کھلتے ہیں
گھر کے بند در و دیوار میں
گھنے سنہرے خوابوں کے
سیج یوں ہی سجا کرتے ہیں
گھر دفتر بازار محلہ
کسی نہ کسی غرض کی خاطر
خوشی خوشی یا مجبوری میں
عزت روز بکا کرتی ہے
دھندے روز ہوا کرتے ہیں

حلیمہ سعدیہ شگفتہ

نظم

اگلے جنم میں
خدا سے گزارش کروں گا
وہ آواز کو طوائف بنا کر بھیجے
میری خواہش ہے
میرے قبیلے کے لوگ
برہنہ چھاتیوں کی جستجو میں
احتجاج کے پھولوں پر ایمان لائیں
اور اپنی جیب سے
دہائی کے گلدستے خریدیں
میں کوشش کروں گا
خدا خاموشی کو
ہماری طلاق یافتہ بیویاں تسلیم کرے
جن کی کوکھ
ہماری پکار کے رنگوں کی حامل نہ ہو
اس جنم میں
ہمارے لوگ

منیر جعفری

نظم

شرط بس یہ ہے
کہ تم ساتھ رہو
پاس رہو
میری ہر مرضی میں شامل ہو تمہاری مرضی
میری ہر سانس کی شاہد ہوں تمہاری سانسیں
میرے ہر راز کی حامل ہو تمہاری دھڑکن
اور ہم ایک ہی زنجیر میں پابستہ ہوں

رفیعہ شبنم عابدی

نظم

گواہ رہنا
یہ پست قامت کریہہ چہروں گھمنڈ لہجوں سسکتی سرگوشیوں کے حامل
مرے قبیلے کے سورما سب
نجس اکھاڑوں میں اپنے لاغر نحیف جسموں کو چاٹتے ہیں
مرے قبیلے کے فلسفہ گر
غلیظ فاسد رطوبتوں سے بھری ٹپکتی سراب سوچوں سے کام لے کر عجیب منطق تراشتے ہیں
یہ فلسفہ گر صدا و آہنگ و حرف و معنی کو زخم دے کر لہو کا کچا کھرنڈ دانتوں سے نوچتے ہیں

کامران نفیس

نظم

صدیوں پہلے آدمی جنگل سے
میدان کی سمت آیا تھا
بستیاں بسا کر زندگی گزارنے کے لئے
مگر اب بستیاں ہی جنگل بن گئی ہیں
جہاں انسان
جانور سے بد تر خصلتوں کا حامل ہو گیا ہے
چلو پھر جنگل کی طرف لوٹ چلیں
فطرت سے قریب ہونے کے لئے
پر سکون زندگی کی تلاش میں

احسن رضوی

نظم

جب تک نشان پختہ نہیں ہو جاتا
آنسو نہیں کہلاتا
آنسو سیال صورت نہیں
جامدانہ وصف کا بھی حامل ہے
قیمت عرض ہنر کی خاطر
استقامت ،پختگی اور گرفتگیٔ فکر لازم ہے
وقت ہتھیلی پر ٹھہری شبنم کو آئینہ کیا دکھلاتا
شبنم خود متصف ہے آئینے کی
نوشتہ ہے وقت کی

ساحل احمد

نظم

اے گل تر کس قدر دل کش ہے نظارہ ترا
حامل حسن ازل ہے قلب سی پارہ ترا
پتی پتی میں تری پیش نگاہ عارفاں
لے رہا ہے اک جہان رنگ و بو انگڑائیاں
فاش تیری دید سے ہے چشم بینا پر یہ راز
جلوہ گر ہے آئینے کے بھیس میں آئینہ ساز
فرش کے رنگیں صحیفے گلشن فانی کے پھول
جاں فزا ہے عرش دل پر یہ تری شان نزول
لیکن اس دنیا میں حسن چند روزہ کا مآل
بڑھ رہا ہے تیری جانب لے کے پیغام زوال
منتشر ہوں گے یہ اوراق کتاب رنگ و بو
چاک کر دے گی خزاں آخر نقاب رنگ و بو
زیب سر کر کے تجھے ارماں نکالا جائے گا
پاؤں کے نیچے پھر اک دن روند ڈالا جائے گا

شمیم فاروق بانس پاری

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے