Sher on Barg

phūloñ ko surḳhī dene meñ

patte piile ho jaate haiñ

phulon ko surKHi dene mein

patte pile ho jate hain

aate haiñ barg-o-bār daraḳhtoñ ke jism par

tum bhī uThāo haath ki mausam duā kā hai

aate hain barg-o-bar daraKHton ke jism par

tum bhi uThao hath ki mausam dua ka hai

shajar-e-tar na yahāñ barg-e-shanāsā koī

is qarīne se sajāyā hai ye manzar kis ne

shajar-e-tar na yahan barg-e-shanasa koi

is qarine se sajaya hai ye manzar kis ne

le aa.egā ik roz gul o barg bhī 'sarvat'

bārāñ kā musalsal ḳhas-o-ḳhāshāk pe honā

le aaega ek roz gul o barg bhi 'sarwat'

baran ka musalsal KHas-o-KHashak pe hona

sab ko phuul aur kaliyāñ bāñTo ham ko do sūkhe patte

ye kaise tohfe laa.e ho ye kyā barg-faroshī hai

sab ko phul aur kaliyan banTo hum ko do sukhe patte

ye kaise tohfe lae ho ye kya barg-faroshi hai

shāḳhoñ se barg-e-gul nahīñ jhaḌte haiñ baaġh meñ

zevar utar rahā hai urūs-e-bahār kā

shaKHon se barg-e-gul nahin jhaDte hain bagh mein

zewar utar raha hai urus-e-bahaar ka

shajar se bichhḌā huā barg-e-ḳhushk huuñ 'faisal'

havā ne apne gharāne meñ rakh liyā hai mujhe

shajar se bichhDa hua barg-e-KHushk hun 'faisal'

hawa ne apne gharane mein rakh liya hai mujhe

barg-e-gul aa maiñ tere bose luuñ

tujh meñ hai Dhañg yaar ke lab kā

barg-e-gul aa main tere bose lun

tujh mein hai Dhang yar ke lab ka

kyā jaane shāḳh-e-vaqt se kis vaqt gir paḌūñ

mānind-e-barg-e-zard abhī Doltā huuñ maiñ

kya jaane shaKH-e-waqt se kis waqt gir paDun

manind-e-barg-e-zard abhi Dolta hun main