mire junūñ kā natīja zarūr niklegā

isī siyāh samundar se nuur niklegā

mere junun ka natija zarur niklega

isi siyah samundar se nur niklega

log jis haal meñ marne kī duā karte haiñ

maiñ ne us haal meñ jiine kī qasam khaa.ī hai

log jis haal mein marne ki dua karte hain

main ne us haal mein jine ki qasam khai hai

ik parinda abhī uḌaan meñ hai

tiir har shaḳhs kī kamān meñ hai

ek parinda abhi uDan mein hai

tir har shaKHs ki kaman mein hai

yakum january hai nayā saal hai

december meñ pūchhūñgā kyā haal hai

yakum january hai naya sal hai

december mein puchhunga kya haal hai

usī kā shahr vahī mudda.ī vahī munsif

hameñ yaqīñ thā hamārā qusūr niklegā

usi ka shahr wahi muddai wahi munsif

hamein yaqin tha hamara qusur niklega

aaj kī raat bhī guzrī hai mirī kal kī tarah

haath aa.e na sitāre tire āñchal kī tarah

aaj ki raat bhi guzri hai meri kal ki tarah

hath aae na sitare tere aanchal ki tarah

tum raah meñ chup-chāp khaḌe ho to ga.e ho

kis kis ko batāoge ki ghar kyuuñ nahīñ jaate

tum rah mein chup-chap khaDe ho to gae ho

kis kis ko bataoge ki ghar kyun nahin jate

sunā hai ab bhī mire haath kī lakīroñ meñ

najūmiyoñ ko muqaddar dikhā.ī detā hai

suna hai ab bhi mere hath ki lakiron mein

najumiyon ko muqaddar dikhai deta hai

mire paḌos meñ aise bhī log baste haiñ

jo mujh meñ DhūñD rahe haiñ burā.iyāñ apnī

mere paDos mein aise bhi log baste hain

jo mujh mein DhunD rahe hain buraiyan apni

mujh se bach bach ke chalī hai duniyā

mere nazdīk ḳhudā ho jaise

mujh se bach bach ke chali hai duniya

mere nazdik KHuda ho jaise

zindagī aur haiñ kitne tire chehre ye batā

tujh se ik umr kī hālāñki shanāsā.ī hai

zindagi aur hain kitne tere chehre ye bata

tujh se ek umr ki haalanki shanasai hai

yaar kyā zindagī hai sūraj kī

sub.h se shaam tak jalā karnā

yar kya zindagi hai suraj ki

subh se sham tak jala karna

kyā guzartī hai mire baad us par

aaj maiñ us se bichhaḌ kar dekhūñ

kya guzarti hai mere baad us par

aaj main us se bichhaD kar dekhun

sukūt-e-shab meñ dar-e-dil pe ek dastak thī

bikhar ga.ī tirī yādoñ kī kahkashāñ mujh se

sukut-e-shab mein dar-e-dil pe ek dastak thi

bikhar gai teri yaadon ki kahkashan mujh se

mire ghar meñ to koī bhī nahīñ hai

ḳhudā jaane maiñ kis se Dar rahā huuñ

mere ghar mein to koi bhi nahin hai

KHuda jaane main kis se Dar raha hun

maiñ ne kyuuñ tark-e-ta.alluq kī jasārat kī hai

tum agar ġhaur karoge to pashīmāñ hoge

main ne kyun tark-e-talluq ki jasarat ki hai

tum agar ghaur karoge to pashiman hoge

na jaane kaisā masīhā thā chāhtā kyā thā

tamām shahr ko bīmār dekh kar ḳhush thā

na jaane kaisa masiha tha chahta kya tha

tamam shahr ko bimar dekh kar KHush tha

jahāñ jahāñ bhī hai nahr-e-furāt kā imkāñ

vahīñ yazīd kā lashkar dikhā.ī detā hai

jahan jahan bhi hai nahr-e-furaat ka imkan

wahin yazid ka lashkar dikhai deta hai

zarā badlūñgā is be-manzarī ko

phir us ke baad mar jā.ūñgā maiñ bhī

zara badlunga is be-manzari ko

phir us ke baad mar jaunga main bhi

adā huā hai jo ik lafz be-asās na ho

mirā ḳhudā kahīñ merī tarah udaas na ho

ada hua hai jo ek lafz be-asas na ho

mera KHuda kahin meri tarah udas na ho

mere us ke darmiyāñ haa.il ka.ī kohsār haiñ

mujh tak āte-āte bādal tishna-lab ho jā.egā

mere us ke darmiyan hail kai kohsar hain

mujh tak aate-ate baadal tishna-lab ho jaega