کاینات شاعری

تم اپنے چاند تارے کہکشاں چاہے جسے دینا

مری آنکھوں پہ اپنی دید کی اک شام لکھ دینا

یہ کائنات ابھی ناتمام ہے شاید

کہ آ رہی ہے دمادم صدائے کن فیکوں

ہے کائنات کو حرکت تیرے ذوق سے

پرتو سے آفتاب کے ذرے میں جان ہے

جہاں میں منزل مقصود ڈھونڈنے والے

یہ کائنات کی تصویر ہی خیالی ہے

یہ کائنات مرے سامنے ہے مثل بساط

کہیں جنوں میں الٹ دوں نہ اس جہان کو میں

پرانے ہیں یہ ستارے فلک بھی فرسودہ

جہاں وہ چاہیئے مجھ کو کہ ہو ابھی نوخیز

رات دن گردش میں ہیں لیکن پڑا رہتا ہوں میں

کام کیا میرا یہاں ہے سوچتا رہتا ہوں میں

سلسلہ روشن تجسس کا ادھر میرا بھی ہے

اے ستارو اس خلا میں اک سفر میرا بھی ہے

خلا میں تیرتے پھرتے ہیں ہاتھ پکڑے ہوئے

زمیں کی ایک صدی ایک سال سورج کا

مری فضا میں ہے ترتیب کائنات کچھ اور

عجب نہیں جو ترا چاند ہے ستارہ مجھے

کل کائنات فکر سے آزاد ہو گئی

انساں مثال دست تہ سنگ رہ گیا

اپنا آپ پڑا رہ جاتا ہے بس اک اندازے پر

آدھے ہم اس دھرتی پر ہیں آدھے اس سیارے پر

دور تک ایک خلا ہے سو خلا کے اندر

صرف تنہائی کی صورت ہی نظر آئے گی

مری نظر میں ہے قائمؔ یہ کائنات تمام

نظر میں گو کوئی لاتا نہیں ہے یاں مجھ کو

بھلا چکے ہیں زمین و زماں کے سب قصے

سخن طراز ہیں لیکن خلا میں رہتے ہیں

جن اجنبی خلاؤں سے واقف نہیں کوئی

مضطرؔ انہیں خلاؤں کا سیارہ ہم ہوئے

رجعت بھی کرے گا تو ٹھہرا ہوا سیارہ

سورج کی محبت میں گھر اپنا جلا دے گا

شمس و قمر سے اور کبھی کہکشاں سے ہم

گزرے ہیں لاکھ بار حد لا مکاں سے ہم