Urdu shayari mein deepawali: Raushni ke hazaar rang

raat ko jiit to paatā nahīñ lekin ye charāġh

kam se kam raat kā nuqsān bahut kartā hai

raat ko jit to pata nahin lekin ye charagh

kam se kam raat ka nuqsan bahut karta hai

hai raam ke vajūd pe hindostāñ ko naaz

ahl-e-nazar samajhte haiñ us ko imām-e-hind

hai ram ke wajud pe hindostan ko naz

ahl-e-nazar samajhte hain us ko imam-e-hind

shahr ke añdhere ko ik charāġh kaafī hai

sau charāġh jalte haiñ ik charāġh jalne se

shahr ke andhere ko ek charagh kafi hai

sau charagh jalte hain ek charagh jalne se

sabhī ke diip sundar haiñ hamāre kyā tumhāre kyā

ujālā har taraf hai is kināre us kināre kyā

sabhi ke dip sundar hain hamare kya tumhaare kya

ujala har taraf hai is kinare us kinare kya

dekhūñ tire hāthoñ ko to lagtā hai tire haath

mandir meñ faqat diip jalāne ke liye haiñ

dekhun tere hathon ko to lagta hai tere hath

mandir mein faqat dip jalane ke liye hain

raushnī aadhī idhar aadhī udhar

ik diyā rakkhā hai dīvāroñ ke biich

raushni aadhi idhar aadhi udhar

ek diya rakkha hai diwaron ke bich

aap aa.e to bahāroñ ne luTā.ī ḳhushbū

phuul to phuul the kāñToñ se bhī aa.ī ḳhushbū

aap aae to bahaaron ne luTai KHushbu

phul to phul the kanTon se bhi aai KHushbu

rāhoñ meñ jaan ghar meñ charāġhoñ se shaan hai

dīpāvlī se aaj zamīn āsmān hai

rahon mein jaan ghar mein charaghon se shan hai

dipawli se aaj zamin aasman hai

jā.egī gulshan talak us gul kī aamad kī ḳhabar

aa.egī bulbul mire ghar meñ mubārakbād ko

jaegi gulshan talak us gul ki aamad ki KHabar

aaegi bulbul mere ghar mein mubarakbaad ko

khiḌkiyoñ se jhāñktī hai raushnī

battiyāñ jaltī haiñ ghar ghar raat meñ

khiDkiyon se jhankti hai raushni

battiyan jalti hain ghar ghar raat mein

biis baras se ik taare par man kī jot jagātā huuñ

dīvālī kī raat ko tū bhī koī diyā jalāyā kar

bis baras se ek tare par man ki jot jagata hun

diwali ki raat ko tu bhi koi diya jalaya kar

ye bhī ejaaz mujhe ishq ne baḳhshā thā kabhī

us kī āvāz se maiñ diip jalā saktā thā

ye bhi ejaz mujhe ishq ne baKHsha tha kabhi

us ki aawaz se main dip jala sakta tha

diloñ ko tere tabassum kī yaad yuuñ aa.ī

ki jagmagā uTheñ jis tarah mandiroñ meñ charāġh

dilon ko tere tabassum ki yaad yun aai

ki jagmaga uThen jis tarah mandiron mein charagh

zarā se rizq meñ barkat bhī kitnī hotī thī

aur ik charāġh se kitne charāġh jalte the

zara se rizq mein barkat bhi kitni hoti thi

aur ek charagh se kitne charagh jalte the

ik diyā dil kī raushnī kā safīr

ho mayassar to raat bhī din hai

ek diya dil ki raushni ka safir

ho mayassar to raat bhi din hai

shāmil hue haiñ bazm meñ misl-e-charāġh ham

ab sub.h tak jaleñge lagātār dekhnā

shamil hue hain bazm mein misl-e-charagh hum

ab subh tak jalenge lagatar dekhna

sameT leñ mah o ḳhurshīd raushnī apnī

salāhiyat hai zamīñ meñ bhī jagmagāne kī

sameT len mah o KHurshid raushni apni

salahiyat hai zamin mein bhi jagmagane ki

aao to mere sahn meñ ho jaa.e raushnī

muddat guzar ga.ī hai charāġhāñ kiye hue

aao to mere sahn mein ho jae raushni

muddat guzar gai hai charaghan kiye hue

maiñ raushnī pe zindagī kā naam likh ke aa gayā

use miTā miTā ke ye siyāh raat thak ga.ī

main raushni pe zindagi ka nam likh ke aa gaya

use miTa miTa ke ye siyah raat thak gai

har taraf phailī huī thī raushnī hī raushnī

vo bahāreñ thiiñ ki ab ke baaġh meñ rasta na thā

har taraf phaili hui thi raushni hi raushni

wo bahaaren thin ki ab ke bagh mein rasta na tha