ye kis maqaam pe sujhi tujhe bichhaDne ki: Jamal Ehsani

tamām raat nahāyā thā shahr bārish meñ

vo rañg utar hī ga.e jo utarne vaale the

tamam raat nahaya tha shahr barish mein

wo rang utar hi gae jo utarne wale the

qarār dil ko sadā jis ke naam se aayā

vo aayā bhī to kisī aur kaam se aayā

qarar dil ko sada jis ke nam se aaya

wo aaya bhi to kisi aur kaam se aaya

'jamāl' har shahr se hai pyārā vo shahr mujh ko

jahāñ se dekhā thā pahlī baar āsmān maiñ ne

'jamal' har shahr se hai pyara wo shahr mujh ko

jahan se dekha tha pahli bar aasman main ne

ik safar meñ koī do baar nahīñ luT saktā

ab dobāra tirī chāhat nahīñ kī jā saktī

ek safar mein koi do bar nahin luT sakta

ab dobara teri chahat nahin ki ja sakti

hazār tarah ke the ranj pichhle mausam meñ

par itnā thā ki koī saath rone vaalā thā

hazar tarah ke the ranj pichhle mausam mein

par itna tha ki koi sath rone wala tha

sub.h aatā huuñ yahāñ aur shaam ho jaane ke ba.ad

lauT jaatā huuñ maiñ ghar nākām ho jaane ke ba.ad

subh aata hun yahan aur sham ho jaane ke baad

lauT jata hun main ghar nakaam ho jaane ke baad

hārne vāloñ ne is ruḳh se bhī sochā hogā

sar kaTānā hai to hathiyār na Daale jaa.eñ

haarne walon ne is ruKH se bhi socha hoga

sar kaTana hai to hathiyar na Dale jaen

thakan bahut thī magar sāya-e-shajar meñ 'jamāl'

maiñ baiThtā to mirā ham-safar chalā jaatā

thakan bahut thi magar saya-e-shajar mein 'jamal'

main baiThta to mera ham-safar chala jata

ye kis maqām pe sūjhī tujhe bichhaḌne kī

ki ab to jā ke kahīñ din sañvarne vaale the

ye kis maqam pe sujhi tujhe bichhaDne ki

ki ab to ja ke kahin din sanwarne wale the

aur ab ye chāhtā huuñ koī ġham baTā.e mirā

maiñ apnī miTTī kabhī aap Dhone vaalā thā

aur ab ye chahta hun koi gham baTae mera

main apni miTTi kabhi aap Dhone wala tha

bikhar gayā hai jo motī pirone vaalā thā

vo ho rahā hai yahāñ jo na hone vaalā thā

bikhar gaya hai jo moti pirone wala tha

wo ho raha hai yahan jo na hone wala tha

vo log mere bahut pyaar karne vaale the

guzar ga.e haiñ jo mausam guzarne vaale the

wo log mere bahut pyar karne wale the

guzar gae hain jo mausam guzarne wale the

jo mere zikr par ab qahqahe lagātā hai

bichhaḌte vaqt koī haal dekhtā us kā

jo mere zikr par ab qahqahe lagata hai

bichhaDte waqt koi haal dekhta us ka

us raste par pīchhe se itnī āvāzeñ aa.iiñ 'jamāl'

ek jagah to ghuum ke rah ga.ī eḌī sīdhe paañv kī

us raste par pichhe se itni aawazen aain 'jamal'

ek jagah to ghum ke rah gai eDi sidhe panw ki

charāġh bujhte chale jā rahe haiñ silsila-vār

maiñ ḳhud ko dekh rahā huuñ fasāna hote hue

charagh bujhte chale ja rahe hain silsila-war

main KHud ko dekh raha hun fasana hote hue

mirā kamāl ki maiñ is fazā meñ zinda huuñ

du'ā na milte hue aur havā na hote hue

mera kamal ki main is faza mein zinda hun

du'a na milte hue aur hawa na hote hue

charāġh sāmne vaale makān meñ bhī na thā

ye sāneha mire vahm-o-gumān meñ bhī na thā

charagh samne wale makan mein bhi na tha

ye saneha mere wahm-o-guman mein bhi na tha

din guzarte jā rahe haiñ aur hujūm-e-ḳhush-gumāñ

muntazir baiThā hai aab o ḳhaak se bichhḌā huā

din guzarte ja rahe hain aur hujum-e-KHush-guman

muntazir baiTha hai aab o KHak se bichhDa hua

kyā us se mulāqāt kā imkāñ bhī nahīñ ab

kyuuñ in dinoñ mailī tirī poshāk bahut hai

kya us se mulaqat ka imkan bhi nahin ab

kyun in dinon maili teri poshak bahut hai

vo bhī milne na.ī poshāk badal kar aayā

maiñ jo kal pairahan-e-ḳhāk badal kar aayā

wo bhi milne nai poshak badal kar aaya

main jo kal pairahan-e-KHak badal kar aaya