بن سنور کر رہا کرو حسرتؔ

اس کی پڑ جائے اک نظر شاید

بس ایک ہی بلا ہے محبت کہیں جسے

وہ پانیوں میں آگ لگاتی ہے آج بھی

ہزار چپ سہی پر اس کا بولتا چہرہ

خموش رہ کے ہمیں لا جواب کر دے گا

گزرے جدھر سے نور بکھیرے چلے گئے

وہ ہم سفر ہوئے تو اندھیرے چلے گئے

کبھی میں روتے روتے ہنس دیا کرتا ہوں پاگل سا

کبھی میں ہنستے ہنستے آنسوؤں سے بھیگ جاتا ہوں

جس میں انسانیت نہیں رہتی

ہم درندے ہیں ایسے جنگل کے

پہلے وقتوں میں ہو تو ہو شاید

دوستی اب حسین گالی ہے

آخری امید بھی آنکھوں سے چھلکائے ہوئے

کون سی جانب چلے ہیں تیرے ٹھکرائے ہوئے

ابھی کچھ اور تری جستجو رلائے گی

ابھی کچھ اور بھٹکنا ہے در بدر مجھ کو

روٹھا یار منانا ہے

کوئی سوانگ رچاؤ اب

میں گہرے پانیوں کو چیر دیتا ہوں مگر حسرتؔ

جہاں پانی بہت کم ہو وہاں میں ڈوب جاتا ہوں

یہ گرم گرم سے آنسو بتا رہے ہیں یہی

ضرور آگ کہیں دل کے آس پاس لگی

تیرگی میں نور آئے گا نظر

ڈوبتے سورج کو بھی سجدہ کرو

وہ دن ہوا ہوئے وہ زمانے گزر گئے

بندے کا جب قیام پری زادیوں میں تھا

خاک میں ملنا تھا آخر بے نشاں ہونا ہی تھا

جلنے والے کے مقدر میں دھواں ہونا ہی تھا

جنہیں تھا شوق میلہ دیکھنے کا

وہ سارے لوگ اپنے گھر گئے ہیں

ہمارے عہد کا یہ المیہ ہے

اجالے تیرگی سے ڈر گئے ہیں

سرد آہوں سے دل کی آگ بجھا

گرم اشکوں سے جام بھرتا جا

ہجر کا دن کیوں چڑھنے پائے

وصل کی شب طولانی کر دو

ترے پیام ہی سے سرخ ہو گیا ہے بدن

کہ مینہ پڑا نہیں ہے کھل اٹھے کنول پہلے