kyā isī vāste sīñchā thā lahū se apne

jab sañvar jaa.e chaman aag lagā dī jaa.e

kya isi waste sincha tha lahu se apne

jab sanwar jae chaman aag laga di jae

nasheman hī ke luT jaane kā ġham hotā to kyā ġham thā

yahāñ to bechne vaale ne gulshan bech Daalā hai

nasheman hi ke luT jaane ka gham hota to kya gham tha

yahan to bechne wale ne gulshan bech Dala hai

ġham se mansūb karūñ dard kā rishta de duuñ

zindagī aa tujhe jiine kā salīqa de duuñ

gham se mansub karun dard ka rishta de dun

zindagi aa tujhe jine ka saliqa de dun

ban rahe haiñ sat.h-e-dil par dā.ere

tum ne to patthar koī pheñkā nahīñ

ban rahe hain sath-e-dil par daere

tum ne to patthar koi phenka nahin

kināroñ se mujhe ai nāḳhudāo duur hī rakkho

vahāñ le kar chalo tūfāñ jahāñ se uThne vaalā hai

kinaron se mujhe ai naKHudao dur hi rakkho

wahan le kar chalo tufan jahan se uThne wala hai

kaaTī hai ġham kī raat baḌe ehtirām se

aksar bujhā diyā hai charāġhoñ ko shaam se

kaTi hai gham ki raat baDe ehtiram se

aksar bujha diya hai charaghon ko sham se

phirtā huuñ apnā naqsh-e-qadam DhūñDtā huā

le kar charāġh haath meñ vo bhī bujhā huā

phirta hun apna naqsh-e-qadam DhunDta hua

le kar charagh hath mein wo bhi bujha hua

us shajar ke saa.e meñ baiThā huuñ maiñ

jis kī shāḳhoñ par koī pattā nahīñ

us shajar ke sae mein baiTha hun main

jis ki shaKHon par koi patta nahin

ek tahrīr jo us ke hāthoñ kī thī

baat vo mujh se kartī rahī raat bhar

ek tahrir jo us ke hathon ki thi

baat wo mujh se karti rahi raat bhar

ye ḳhuun rañg-e-chaman meñ badal bhī saktā hai

zarā Thahar ki badal jā.eñge ye manzar bhī

ye KHun rang-e-chaman mein badal bhi sakta hai

zara Thahar ki badal jaenge ye manzar bhi

āñdhiyoñ kā kaam chalnā hai ġharaz is se nahīñ

peḌ par pattā rahegā yā judā ho jā.egā

aandhiyon ka kaam chalna hai gharaz is se nahin

peD par patta rahega ya juda ho jaega

duur tak dil meñ dikhā.ī nahīñ detā koī

aise vīrāne meñ ab kis ko sadā dī jaa.e

dur tak dil mein dikhai nahin deta koi

aise virane mein ab kis ko sada di jae

laa.ī hai kis maqām pe ye zindagī mujhe

mahsūs ho rahī hai ḳhud apnī kamī mujhe

lai hai kis maqam pe ye zindagi mujhe

mahsus ho rahi hai KHud apni kami mujhe

roke se kahīñ hādsa-e-vaqt rukā hai

sho.aloñ se bachā shahr to shabnam se jalā hai

roke se kahin hadsa-e-waqt ruka hai

shoalon se bacha shahr to shabnam se jala hai

ham ne dekhā hai zamāne kā badalnā lekin

un ke badle hue tevar nahīñ dekhe jaate

hum ne dekha hai zamane ka badalna lekin

un ke badle hue tewar nahin dekhe jate