بیچ سڑک اک لاش پڑی تھی اور یہ لکھا تھا

بھوک میں زہریلی روٹی بھی میٹھی لگتی ہے

وہ تھے جواب کے ساحل پہ منتظر لیکن

سمے کی ناؤ میں میرا سوال ڈوب گیا

الجھ رہے ہیں بہت لوگ میری شہرت سے

کسی کو یوں تو کوئی مجھ سے اختلاف نہ تھا

عزم محکم ہو تو ہوتی ہیں بلائیں پسپا

کتنے طوفان پلٹ دیتا ہے ساحل تنہا

اس کا جواب ایک ہی لمحے میں ختم تھا

پھر بھی مرے سوال کا حق دیر تک رہا

یوں تو کئی کتابیں پڑھیں ذہن میں مگر

محفوظ ایک سادہ ورق دیر تک رہا

لوگ تو جا کے سمندر کو جلا آئے ہیں

میں جسے پھونک کر آیا وہ مرا گھر نکلا

وہ میرے قتل کا ملزم ہے لوگ کہتے ہیں

وہ چھٹ سکے تو مجھے بھی گواہ لکھ لیجے

خدا کرے مرا منصف سزا سنانے پر

مرا ہی سر مرے قاتل کے روبرو رکھ دے

عشق وشق یہ چاہت واہت من کا بھلاوا پھر من بھی اپنا کیا

یار یہ کیسا رشتہ جو اپنوں کو غیر کرے مولیٰ خیر کرے

ہم بھٹکتے رہے اندھیرے میں

روشنی کب ہوئی نہیں معلوم

دور حاضر کی بزم میں بیکلؔ

کون ہے آدمی نہیں معلوم

ہوائے عشق نے بھی گل کھلائے ہیں کیا کیا

جو میرا حال تھا وہ تیرا حال ہونے لگا

چاندی کے گھروندوں کی جب بات چلی ہوگی

مٹی کے کھلونوں سے بہلائے گئے ہوں گے

فرش تا عرش کوئی نام و نشاں مل نہ سکا

میں جسے ڈھونڈھ رہا تھا مرے اندر نکلا

نہ جانے کون سا نشہ ہے ان پہ چھایا ہوا

قدم کہیں پہ ہیں پڑتے کہیں پہ چلتے ہیں

بدن کی آنچ سے سنولا گئے ہیں پیراہن

میں پھر بھی صبح کے چہرے پہ شام لکھتا ہوں

ہر ایک لحظہ مری دھڑکنوں میں چبھتی تھی

عجیب چیز مرے دل کے آس پاس رہی

کواڑ بند کرو تیرہ بختو سو جاؤ

گلی میں یوں ہی اجالوں کی آہٹیں ہوں گی

زمین پیاسی ہے بوڑھا گگن بھی بھوکا ہے

میں اپنے عہد کے قصے تمام لکھتا ہوں

فرشتے دیکھ رہے ہیں زمین و چرخ کا ربط

یہ فاصلہ بھی تو انساں کی ایک جست لگے

میں جب بھی کوئی اچھوتا کلام لکھتا ہوں

تو پہلے ایک غزل تیرے نام لکھتا ہوں