biich saḌak ik laash paḌī thī aur ye likkhā thā

bhuuk meñ zahrīlī roTī bhī mīThī lagtī hai

bich saDak ek lash paDi thi aur ye likkha tha

bhuk mein zahrili roTi bhi miThi lagti hai

vo the javāb ke sāhil pe muntazir lekin

samay kī naav meñ merā savāl Duub gayā

wo the jawab ke sahil pe muntazir lekin

samay ki naw mein mera sawal Dub gaya

us kā javāb ek hī lamhe meñ ḳhatm thā

phir bhī mire savāl kā haq der tak rahā

us ka jawab ek hi lamhe mein KHatm tha

phir bhi mere sawal ka haq der tak raha

ulajh rahe haiñ bahut log merī shohrat se

kisī ko yuuñ to koī mujh se iḳhtilāf na thā

ulajh rahe hain bahut log meri shohrat se

kisi ko yun to koi mujh se iKHtilaf na tha

vo mere qatl kā mulzim hai log kahte haiñ

vo chhuT sake to mujhe bhī gavāh likh liije

wo mere qatl ka mulzim hai log kahte hain

wo chhuT sake to mujhe bhi gawah likh lije

yuuñ to ka.ī kitābeñ paḌhīñ zehn meñ magar

mahfūz ek saada varaq der tak rahā

yun to kai kitaben paDhin zehn mein magar

mahfuz ek sada waraq der tak raha

log to jā ke samundar ko jalā aa.e haiñ

maiñ jise phūñk kar aayā vo mirā ghar niklā

log to ja ke samundar ko jala aae hain

main jise phunk kar aaya wo mera ghar nikla

ḳhudā kare mirā munsif sazā sunāne par

mirā hī sar mire qātil ke rū-ba-rū rakh de

KHuda kare mera munsif saza sunane par

mera hi sar mere qatil ke ru-ba-ru rakh de

ham bhaTakte rahe andhere meñ

raushnī kab huī nahīñ mālūm

hum bhaTakte rahe andhere mein

raushni kab hui nahin malum

azm-e-mohkam ho to hotī haiñ balā.eñ paspā

kitne tūfān palaT detā hai sāhil tanhā

azm-e-mohkam ho to hoti hain balaen paspa

kitne tufan palaT deta hai sahil tanha

havā-e-ishq ne bhī gul khilā.e haiñ kyā kyā

jo merā haal thā vo terā haal hone lagā

hawa-e-ishq ne bhi gul khilae hain kya kya

jo mera haal tha wo tera haal hone laga

chāñdī ke gharoñdoñ kī jab baat chalī hogī

miTTī ke khilaunoñ se bahlā.e ga.e hoñge

chandi ke gharondon ki jab baat chali hogi

miTTi ke khilaunon se bahlae gae honge

farsh tā arsh koī nām-o-nishāñ mil na sakā

maiñ jise DhūñDh rahā thā mire andar niklā

farsh ta arsh koi nam-o-nishan mil na saka

main jise DhunDh raha tha mere andar nikla

ishq-vishiq ye chāhat-vāhat man kā bhulāvā phir man bhī apnā kyā

yaar ye kaisā rishta jo apnoñ ko ġhair kare maulā ḳhair kare

ishq-wishiq ye chahat-wahat man ka bhulawa phir man bhi apna kya

yar ye kaisa rishta jo apnon ko ghair kare maula KHair kare

badan kī aañch se sañvlā ga.e haiñ pairāhan

maiñ phir bhī sub.h ke chehre pe shaam likhtā huuñ

badan ki aanch se sanwla gae hain pairahan

main phir bhi subh ke chehre pe sham likhta hun

na jaane kaun sā nashsha hai un pe chhāyā huā

qadam kahīñ pe haiñ paḌte kahīñ pe chalte haiñ

na jaane kaun sa nashsha hai un pe chhaya hua

qadam kahin pe hain paDte kahin pe chalte hain

daur-e-hāzir kī bazm meñ 'bekal'

kaun hai aadmī nahīñ mālūm

daur-e-hazir ki bazm mein 'bekal'

kaun hai aadmi nahin malum

har ek lahza mirī dhaḌkanoñ meñ chubhtī thī

ajiib chiiz mire dil ke ās-pās rahī

har ek lahza meri dhaDkanon mein chubhti thi

ajib chiz mere dil ke aas-pas rahi

zamīn pyāsī hai būḌhā gagan bhī bhūkā hai

maiñ apne ahd ke qisse tamām likhtā huuñ

zamin pyasi hai buDha gagan bhi bhuka hai

main apne ahd ke qisse tamam likhta hun

kivāḌ band karo tīra-baḳhto so jaao

galī meñ yuuñ hī ujāloñ kī āhaTeñ hoñgī

kiwaD band karo tira-baKHto so jao

gali mein yun hi ujalon ki aahaTen hongi

farishte dekh rahe haiñ zamīn o charḳh kā rabt

ye fāsla bhī to insāñ kī ek jast lage

farishte dekh rahe hain zamin o charKH ka rabt

ye fasla bhi to insan ki ek jast lage

maiñ jab bhī koī achhūtā kalām likhtā huuñ

to pahle ek ġhazal tere naam likhtā huuñ

main jab bhi koi achhuta kalam likhta hun

to pahle ek ghazal tere nam likhta hun