آسان کس قدر ہے سمجھ لو مرا پتہ

بستی کے بعد پہلا جو ویرانہ آئے گا

آپ کیا آئے کہ رخصت سب اندھیرے ہو گئے

اس قدر گھر میں کبھی بھی روشنی دیکھی نہ تھی

گھر میں جو اک چراغ تھا تم نے اسے بجھا دیا

کوئی کبھی چراغ ہم گھر میں نہ پھر جلا سکے

پتھرو آج مرے سر پہ برستے کیوں ہو

میں نے تم کو بھی کبھی اپنا خدا رکھا ہے

جس نے بھی مجھے دیکھا ہے پتھر سے نوازا

وہ کون ہیں پھولوں کے جنہیں ہار ملے ہیں

وہ جو کہتا تھا کہ ناصرؔ کے لیے جیتا ہوں

اس کا کیا جانئے کیا حال ہوا میرے بعد

تمہارے بعد اجالے بھی ہو گئے رخصت

ہمارے شہر کا منظر بھی گاؤں جیسا ہے

وہ مجھے چھوڑ کے اک شام گئے تھے ناصرؔ

زندگی اپنی اسی شام سے آگے نہ بڑھی

یہ درد ہے ہمدم اسی ظالم کی نشانی

دے مجھ کو دوا ایسی کہ آرام نہ آئے

آپ کیا آئے کہ روشن سب اندھیرے ہو گئے

اس قدر گھر میں کبھی بھی روشنی دیکھی نہ تھی

مےکشی گردش ایام سے آگے نہ بڑھی

میری مدہوشی مرے جام سے آگے نہ بڑھی

اس کے دل پر بھی کڑی عشق میں گزری ہوگی

نام جس نے بھی محبت کا سزا رکھا ہے

یہ تماشا بھی عجب ہے ان کے اٹھ جانے کے بعد

میں نے دن میں اس سے پہلے تیرگی دیکھی نہ تھی

جب سے تو نے مجھے دیوانہ بنا رکھا ہے

سنگ ہر شخص نے ہاتھوں میں اٹھا رکھا ہے

دو گھڑی درد نے آنکھوں میں بھی رہنے نہ دیا

ہم تو سمجھے تھے بنیں گے یہ سہارے آنسو