maiñ vo sahrā jise paanī kī havas le Duubī

tū vo bādal jo kabhī TuuT ke barsā hī nahīñ

main wo sahra jise pani ki hawas le Dubi

tu wo baadal jo kabhi TuT ke barsa hi nahin

fursat meñ rahā karte haiñ fursat se zyāda

masrūf haiñ ham log zarūrat se zyāda

fursat mein raha karte hain fursat se zyaada

masruf hain hum log zarurat se zyaada

ik ḳhauf-e-be-panāh hai āñkhoñ ke ār-pār

tārīkiyoñ meñ Dūbtā lamha hai sāmne

ek KHauf-e-be-panah hai aankhon ke aar-par

tarikiyon mein Dubta lamha hai samne

safar safar mire qadmoñ se jagmagāyā huā

taraf taraf hai mirī ḳhāk-e-justujū raushan

safar safar mere qadmon se jagmagaya hua

taraf taraf hai meri KHak-e-justuju raushan

sāmne āñkhoñ ke phir yaḳh-basta manzar aa.egā

dhuup jam jā.egī āñgan meñ december aa.egā

samne aankhon ke phir yaKH-basta manzar aaega

dhup jam jaegi aangan mein december aaega

sab ke hoñToñ pe munavvar haiñ hamāre qisse

aur ham apnī kahānī bhī nahīñ jānte haiñ

sab ke honTon pe munawwar hain hamare qisse

aur hum apni kahani bhi nahin jaante hain

har ek dāstāñ tujh se shurūa hotī hai

har ek qissa tire naam par tamām huā

har ek dastan tujh se shurua hoti hai

har ek qissa tere nam par tamam hua

hamārī sāda-mizājī pe rashk karte haiñ

vo sāda-posh jo be-intihā rañgīle haiñ

hamari sada-mizaji pe rashk karte hain

wo sada-posh jo be-intiha rangile hain

kisī ke vāste jiitā hai ab na martā hai

har aadmī yahāñ apnā tavāf kartā hai

kisi ke waste jita hai ab na marta hai

har aadmi yahan apna tawaf karta hai

ye aur baat ki 'aḳhtar' haveliyāñ na rahīñ

khañDar meñ kam to nahīñ apnī aabrū raushan

ye aur baat ki 'aKHtar' haweliyan na rahin

khanDar mein kam to nahin apni aabru raushan

phir bhī ham log vahāñ jiite haiñ jiine kī tarah

mausam-e-qahr jahāñ Thahrā huā rahtā hai

phir bhi hum log wahan jite hain jine ki tarah

mausam-e-qahr jahan Thahra hua rahta hai