رنگ بدلا ہوا تھا پھولوں کا

تم یقیناً اداس گزرے تھے

لکھ کے رکھ دیتا ہوں الفاظ سبھی کاغذ پر

لفظ خود بول کے تاثیر بنا لیتے ہیں

دستک دینے والے تجھ کو علم نہیں

دروازے کے دونوں جانب تالا ہے

اک کرب کا موسم ہے جو دائم ہے ابھی تک

اک ہجر کا قصہ کہ مکمل نہیں ہوتا

لفظ اور آواز دونوں کھو گئے

مجھ سے حق چھینا گیا ہے بات کا

بدلے ہیں زمانے نے خد و خال ترے بھی

اب تجھ کو کوئی دیکھ کے پاگل نہیں ہوتا

غربت کا احسان تھا ہم پر

اک تھالی میں کھا سکتے تھے

مجھ جیسے درویش تمہاری دنیا میں

مرنے کی خواہش میں زندہ رہتے ہیں

معلوم نہیں کون سی بستی کے مکیں تھے

کچھ لوگ مری سوچ سے بھی بڑھ کے حسیں تھے

یخ بستہ شب گزار کبھی تو بھی ہجر میں

میری طرح کسی سے مودت تجھے بھی ہو

دوسرے شخص کیا کہوں تجھ کو

ایک ہونے نہیں دیا تو نے

جو جان چھڑکتے تھے وہی کہتے ہیں مجھ سے

تو حلقۂ احباب میں شامل ہی کہاں تھا

مجھے خبر ہے کیا کچھ ہے بنیادوں میں

تیری بستی کا پہلا مزدور تھا میں

نیلی چھت پہ لا محدود پرندے تھے

آج کسی نے اشک بہا کر رقص کیا

ہم تلوار اٹھا نہیں پائے

ہم آواز اٹھا سکتے تھے

ان چراغوں کا کیا بگاڑا تھا؟

کیوں جھگڑتی ہے روشنی مجھ سے

اب ترے ہجر میں اک پل نہ گزارا جائے

یہ نہ ہو قیس ترا دشت میں مارا جائے

سر اپنا اٹھا سکتا نہیں کوئی بھی ابلیس

مل جائے اگر فقر کی تلوار مجھے بھی

وہ جلوۂ صد رنگ میں اک ڈھنگ سے نکلا

جو مصرعہ ترے سینہ و آہنگ سے نکلا

دنیا کے قافلے میں روانہ ہیں اس لئے

ہم بھی منافقین کی پہچان کر سکیں

سفر میں ماں کی دعاؤں سے چھت بناتا ہوں

اگر کبھی نہ میسر ہو سائبان مجھے

یہ بستیاں ہیں اندھیر نگری میں رہنے والی

یہ لوگ وہ ہیں جو روشنی سے ڈرے ہوئے ہیں

میری خواہش ہے کہ جی بھر کے اسے دیکھ تو لوں

ہجر کے ممکنہ صدمات سے پہلے پہلے

تری لب کشائی پہ منحصر مری زندگانی ہے دوستا

ترا بولنا بھی قبول ہے تری خامشی بھی عزیز ہے

اس واسطے میں ہار گیا تیری طرف سے

ناکام پلٹ آئے تھے سب تیر ہدف سے

تجھ کو تو ملا وہ بھی جو مانگا نہیں تو نے

تو نے تو کبھی خون تمنا نہیں دیکھا

کیا خبر تھی کہ مجھے اس نے جکڑ لینا ہے

میں اداسی پہ بہت طنز کیا کرتا تھا

جہاں پہ باطنی خوشیاں نصیب ہوتی ہیں

وہ در جہاں میں کسی بھی ولی کا ہوتا ہے

یہ اپنی کیفیت کا بتاتے نہیں کبھی

مولا تمام ہجر کے ماروں کی خیر ہو

ابتدا کا علم ہے نہ انتہا معلوم ہے

وہ مسافر ہوں جسے نام خدا معلوم ہے

تو سامنے آ گیا تو کیا حال ہوگا ان کا

ترے تصور نے جن کو سرشار کر دیا ہے

یہ لوگ اپنے عدو کو بھی فیض دیتے ہیں

قلندروں کی جہاں میں یہی طریقت ہے

گزارتا ہوں اسے جس طرح سے مستحسنؔ

یہ زندگی مجھے ترتیب میں نہیں لگتی

جنوں کے عالم میں رقص کرنے کو آ گئے ہیں

بحال ہونے لگی ہے رونق تری گلی کی

زاد سفر میں رکھے گئے تھے کئی چراغ

عجلت میں ان سے کام کسی نے نہیں لیا

یقین کیجیے سب انتشار ختم ہوئے

جب اپنے آپ کو تسخیر کر لیا میں نے

عجب شباہت عجب بدن میں کدورتیں ہیں

سمجھ سے یکسر جدا یہ مٹی کی مورتیں ہیں

مری تمناؤں کا سفر کس قدر حسیں ہے

کبھی میسر ہے تیرا شانہ کبھی جبیں ہے

دیکھ کر اس کو سب خواہشیں مٹ گئیں

کچھ بچا ہی نہیں دیکھنے کے لئے

فراغتوں میں فقط ایک کام کرتا ہوں

میں روشنی سے مسلسل کلام کرتا ہوں

میں اسے یکسوئی سے پڑھ ہی نہیں پایا کبھی

زندگی کے لفظ میں کتنے جہاں آباد تھے

تجھے میں دیتا ہوں مولا کا واسطہ دنیا

مرے وجود سے رکھ فاصلہ زمانوں کا

بن دیکھے بھی چین نہیں ہے مستحسنؔ

دیکھوں تو ساری بینائی جاتی ہے

اک نظر نے مجھے زندگی بخش دی

مجھ سے مت پوچھئے میں فنا کب ہوا

آپ ہمدردی نہ یوں جتلائیے

یہ مرا معمول کا نقصان ہے

سوائے اس کے کوئی بھی مصروفیت نہیں ہے

میں ان دنوں بس چراغ تقسیم کر رہا ہوں

فطرت کا اگر شور حسیں غور سے سنئے

پھر اصل محبت کے ہیں حق دار پرندے

ہمارے پرکھوں نے جوتے کی نوک پر رکھی

ہمارے پاس بھی دنیا تبھی نہیں آتی

ترے حضور مری فکر کی رسائی کیا

ترے جمال کا منظر ہو کیا بیاں مجھ سے

عجیب اجرت محبتوں کی وہ دے گیا ہے

کیا ہے اندھے ہجوم پر آشکار مجھ کو