muñh par naqāb-e-zard har ik zulf par gulāl

holī kī shaam hī to sahar hai basant kī

munh par naqab-e-zard har ek zulf par gulal

holi ki sham hi to sahar hai basant ki

sajnī kī āñkhoñ meñ chhup kar jab jhāñkā

bin holī khele hī sājan bhiig gayā

sajni ki aankhon mein chhup kar jab jhanka

bin holi khele hi sajan bhig gaya

mausam-e-holī hai din aa.e haiñ rang aur raag ke

ham se tum kuchh māñgne aao bahāne phaag ke

mausam-e-holi hai din aae hain rang aur rag ke

hum se tum kuchh mangne aao bahane phag ke

saaqī kuchh aaj tujh ko ḳhabar hai basant kī

har sū bahār pesh-e-nazar hai basant kī

saqi kuchh aaj tujh ko KHabar hai basant ki

har su bahaar pesh-e-nazar hai basant ki

ġhair se khelī hai holī yaar ne

Daale mujh par dīda-e-ḳhūñ-bār rañg

ghair se kheli hai holi yar ne

Dale mujh par dida-e-KHun-bar rang

ab kī holī meñ rahā be-kār rañg

aur hī laayā firāq-e-yār rañg

ab ki holi mein raha be-kar rang

aur hi laya firaq-e-yar rang

bahār aa.ī ki din holī ke aa.e

guloñ meñ rang khelā jā rahā hai

bahaar aai ki din holi ke aae

gulon mein rang khela ja raha hai

puurā kareñge holī meñ kyā vāda-e-visāl

jin ko abhī basant kī ai dil ḳhabar nahīñ

pura karenge holi mein kya wada-e-visal

jin ko abhi basant ki ai dil KHabar nahin

vo tamāshā o khel holī kā

sab ke tan raḳht-e-kesarī hai yaad

wo tamasha o khel holi ka

sab ke tan raKHt-e-kesari hai yaad

holī ke ab bahāne chhiḌkā hai rang kis ne

nām-e-ḳhudā tujh uupar is aan ajab samāñ hai

holi ke ab bahane chhiDka hai rang kis ne

nam-e-KHuda tujh upar is aan ajab saman hai

Daal kar ġhunchoñ kī muñdrī shāḳh-e-gul ke kaan meñ

ab ke holī meñ banānā gul ko jogan ai sabā

Dal kar ghunchon ki mundri shaKH-e-gul ke kan mein

ab ke holi mein banana gul ko jogan ai saba

bādal aa.e haiñ ghir gulāl ke laal

kuchh kisī kā nahīñ kisī ko ḳhayāl

baadal aae hain ghir gulal ke lal

kuchh kisi ka nahin kisi ko KHayal

kis kī holī jashn-e-nau-rozī hai aaj

surḳh mai se sāqiyā dastār rañg

kis ki holi jashn-e-nau-rozi hai aaj

surKH mai se saqiya dastar rang

muhayyā sab hai ab asbāb-e-holī

uTho yaaro bharo rañgoñ se jholī

muhayya sab hai ab asbab-e-holi

uTho yaro bharo rangon se jholi

shab jo holī kī hai milne ko tire mukhḌe se jaan

chāñd aur taare liye phirte haiñ afshāñ haath meñ

shab jo holi ki hai milne ko tere mukhDe se jaan

chand aur tare liye phirte hain afshan hath mein

sahj yaad aa gayā vo laal holī-bāz juuñ dil meñ

gulālī ho gayā tan par mire ḳhirqa jo ujlā thā

sahj yaad aa gaya wo lal holi-baz jun dil mein

gulali ho gaya tan par mere KHirqa jo ujla tha

lab-e-dariyā pe dekh aa kar tamāshā aaj holī kā

bhañvar kaale ke daf baaje hai mauj ai yaar paanī meñ

lab-e-dariya pe dekh aa kar tamasha aaj holi ka

bhanwar kale ke daf baje hai mauj ai yar pani mein

bād-e-bahār meñ sab ātish junūn kī hai

har saal āvatī hai garmī meñ fasl-e-holī

baad-e-bahaar mein sab aatish junun ki hai

har sal aawati hai garmi mein fasl-e-holi