Sher on Sharab

tumhārī āñkhoñ kī tauhīn hai zarā socho

tumhārā chāhne vaalā sharāb piitā hai

tumhaari aankhon ki tauhin hai zara socho

tumhaara chahne wala sharab pita hai

aa.e the hañste khelte mai-ḳhāne meñ 'firāq'

jab pī chuke sharāb to sanjīda ho ga.e

aae the hanste khelte mai-KHane mein 'firaq'

jab pi chuke sharab to sanjida ho gae

kuchh bhī bachā na kahne ko har baat ho ga.ī

aao kahīñ sharāb piyeñ raat ho ga.ī

kuchh bhi bacha na kahne ko har baat ho gai

aao kahin sharab piyen raat ho gai

zāhid sharāb piine de masjid meñ baiTh kar

yā vo jagah batā de jahāñ par ḳhudā na ho

zahid sharab pine de masjid mein baiTh kar

ya wo jagah bata de jahan par KHuda na ho

ab to utnī bhī mayassar nahīñ mai-ḳhāne meñ

jitnī ham chhoḌ diyā karte the paimāne meñ

ab to utni bhi mayassar nahin mai-KHane mein

jitni hum chhoD diya karte the paimane mein

be piye hī sharāb se nafrat

ye jahālat nahīñ to phir kyā hai

be piye hi sharab se nafrat

ye jahaalat nahin to phir kya hai

itnī pī jaa.e ki miT jaa.e maiñ aur tū kī tamīz

yaanī ye hosh kī dīvār girā dī jaa.e

itni pi jae ki miT jae main aur tu ki tamiz

yani ye hosh ki diwar gira di jae

shab jo ham se huā muaaf karo

nahīñ pī thī bahak ga.e hoñge

shab jo hum se hua muaf karo

nahin pi thi bahak gae honge

zāhid sharāb piine se kāfir huā maiñ kyuuñ

kyā DeḌh chullū paanī meñ īmān bah gayā

zahid sharab pine se kafir hua main kyun

kya DeDh chullu pani mein iman bah gaya

ġham-e-duniyā bhī ġham-e-yār meñ shāmil kar lo

nashsha baḌhtā hai sharābeñ jo sharāboñ meñ mileñ

gham-e-duniya bhi gham-e-yar mein shamil kar lo

nashsha baDhta hai sharaben jo sharabon mein milen

bārish sharāb-e-arsh hai ye soch kar 'adam'

bārish ke sab hurūf ko ulTā ke pī gayā

barish sharab-e-arsh hai ye soch kar 'adam'

barish ke sab huruf ko ulTa ke pi gaya

aa.e kuchh abr kuchh sharāb aa.e

is ke ba.ad aa.e jo azaab aa.e

aae kuchh abr kuchh sharab aae

is ke baad aae jo azab aae

shab ko mai ḳhuub sī pī sub.h ko tauba kar lī

riñd ke riñd rahe haath se jannat na ga.ī

shab ko mai KHub si pi subh ko tauba kar li

rind ke rind rahe hath se jannat na gai

saaqī mujhe sharāb kī tohmat nahīñ pasand

mujh ko tirī nigāh kā ilzām chāhiye

saqi mujhe sharab ki tohmat nahin pasand

mujh ko teri nigah ka ilzam chahiye

piitā huuñ jitnī utnī hī baḌhtī hai tishnagī

saaqī ne jaise pyaas milā dī sharāb meñ

pita hun jitni utni hi baDhti hai tishnagi

saqi ne jaise pyas mila di sharab mein

lutf-e-mai tujh se kyā kahūñ zāhid

haa.e kam-baḳht tū ne pī hī nahīñ

lutf-e-mai tujh se kya kahun zahid

hae kam-baKHt tu ne pi hi nahin

tark-e-mai hī samajh ise nāseh

itnī pī hai ki pī nahīñ jaatī

tark-e-mai hi samajh ise naseh

itni pi hai ki pi nahin jati

pahle sharāb ziist thī ab ziist hai sharāb

koī pilā rahā hai piye jā rahā huuñ maiñ

pahle sharab zist thi ab zist hai sharab

koi pila raha hai piye ja raha hun main

ham intizār kareñ ham ko itnī taab nahīñ

pilā do tum hameñ paanī agar sharāb nahīñ

hum intizar karen hum ko itni tab nahin

pila do tum hamein pani agar sharab nahin

ai 'zauq' dekh duḳhtar-e-raz ko na muñh lagā

chhuTtī nahīñ hai muñh se ye kāfar lagī huī

ai 'zauq' dekh duKHtar-e-raz ko na munh laga

chhuTti nahin hai munh se ye kafar lagi hui

shikan na Daal jabīñ par sharāb dete hue

ye muskurātī huī chiiz muskurā ke pilā

shikan na Dal jabin par sharab dete hue

ye muskuraati hui chiz muskura ke pila

'ġhālib' chhuTī sharāb par ab bhī kabhī kabhī

piitā huuñ roz-e-abr o shab-e-māhtāb meñ

'ghaalib' chhuTi sharab par ab bhi kabhi kabhi

pita hun roz-e-abr o shab-e-mahtab mein

vo mile bhī to ik jhijhak sī rahī

kaash thoḌī sī ham piye hote

wo mile bhi to ek jhijhak si rahi

kash thoDi si hum piye hote

kidhar se barq chamaktī hai dekheñ ai vaa.iz

maiñ apnā jaam uThātā huuñ tū kitāb uThā

kidhar se barq chamakti hai dekhen ai waiz

main apna jam uThata hun tu kitab uTha

mire ashk bhī haiñ is meñ ye sharāb ubal na jaa.e

mirā jaam chhūne vaale tirā haath jal na jaa.e

mere ashk bhi hain is mein ye sharab ubal na jae

mera jam chhune wale tera hath jal na jae

ḳhushk bātoñ meñ kahāñ hai shaiḳh kaif-e-zindagī

vo to pī kar hī milegā jo mazā piine meñ hai

KHushk baaton mein kahan hai shaiKH kaif-e-zindagi

wo to pi kar hi milega jo maza pine mein hai

maiñ aadmī huuñ koī farishta nahīñ huzūr

maiñ aaj apnī zaat se ghabrā ke pī gayā

main aadmi hun koi farishta nahin huzur

main aaj apni zat se ghabra ke pi gaya

kisī kī bazm ke hālāt ne samjhā diyā mujh ko

ki jab saaqī nahīñ apnā to mai apnī na jaam apnā

kisi ki bazm ke haalat ne samjha diya mujh ko

ki jab saqi nahin apna to mai apni na jam apna

āḳhir gil apnī sarf-e-dar-e-mai-kada huī

pahuñche vahāñ hī ḳhaak jahāñ kā ḳhamīr ho

aaKHir gil apni sarf-e-dar-e-mai-kada hui

pahunche wahan hi KHak jahan ka KHamir ho

shirkat gunāh meñ bhī rahe kuchh savāb kī

tauba ke saath toḌiye botal sharāb kī

shirkat gunah mein bhi rahe kuchh sawab ki

tauba ke sath toDiye botal sharab ki

sab ko maarā 'jigar' ke sheroñ ne

aur 'jigar' ko sharāb ne maarā

sab ko mara 'jigar' ke sheron ne

aur 'jigar' ko sharab ne mara

achchhī pī lī ḳharāb pī lī

jaisī paa.ī sharāb pī lī

achchhi pi li KHarab pi li

jaisi pai sharab pi li

vaa.iz baḌā mazā ho agar yuuñ azaab ho

dozaḳh meñ paañv haath meñ jām-e-sharāb ho

waiz baDa maza ho agar yun azab ho

dozaKH mein panw hath mein jam-e-sharab ho

pūchhiye mai-kashoñ se lutf-e-sharāb

ye mazā pāk-bāz kyā jāneñ

puchhiye mai-kashon se lutf-e-sharab

ye maza pak-baz kya jaanen

pī shauq se vaa.iz are kyā baat hai Dar kī

dozaḳh tire qabze meñ hai jannat tire ghar kī

pi shauq se waiz are kya baat hai Dar ki

dozaKH tere qabze mein hai jannat tere ghar ki

azaañ ho rahī hai pilā jald saaqī

ibādat kareñ aaj maḳhmūr ho kar

azan ho rahi hai pila jald saqi

ibaadat karen aaj maKHmur ho kar

garche ahl-e-sharāb haiñ ham log

ye na samjho ḳharāb haiñ ham log

garche ahl-e-sharab hain hum log

ye na samjho KHarab hain hum log

be-piye shaiḳh farishta thā magar

pī ke insān huā jaatā hai

be-piye shaiKH farishta tha magar

pi ke insan hua jata hai

mad.hosh hī rahā maiñ jahān-e-ḳharāb meñ

gūñdhī ga.ī thī kyā mirī miTTī sharāb meñ

madhosh hi raha main jahan-e-KHarab mein

gundhi gai thi kya meri miTTi sharab mein

zabān-e-hosh se ye kufr sarzad ho nahīñ saktā

maiñ kaise bin piye le luuñ ḳhudā kā naam ai saaqī

zaban-e-hosh se ye kufr sarzad ho nahin sakta

main kaise bin piye le lun KHuda ka nam ai saqi

khulī fazā meñ agar laḌkhaḌā ke chal na sakeñ

to zahr piinā hai behtar sharāb piine se

khuli faza mein agar laDkhaDa ke chal na saken

to zahr pina hai behtar sharab pine se

ai mohtasib na pheñk mire mohtasib na pheñk

zālim sharāb hai are zālim sharāb hai

ai mohtasib na phenk mere mohtasib na phenk

zalim sharab hai are zalim sharab hai

fareb-e-sāqi-e-mahfil na pūchhiye 'majrūh'

sharāb ek hai badle hue haiñ paimāne

fareb-e-saqi-e-mahfil na puchhiye 'majruh'

sharab ek hai badle hue hain paimane

mirī sharāb kī tauba pe jā na ai vaa.iz

nashe kī baat nahīñ e'tibār ke qābil

meri sharab ki tauba pe ja na ai waiz

nashe ki baat nahin e'tibar ke qabil

sharāb band ho saaqī ke bas kī baat nahīñ

tamām shahar hai do chaar das kī baat nahīñ

sharab band ho saqi ke bas ki baat nahin

tamam shahar hai do chaar das ki baat nahin

jaam le kar mujh se vo kahtā hai apne muñh ko pher

rū-ba-rū yuuñ tere mai piine se sharmāte haiñ ham

jam le kar mujh se wo kahta hai apne munh ko pher

ru-ba-ru yun tere mai pine se sharmate hain hum

muñh meñ vaa.iz ke bhī bhar aatā hai paanī aksar

jab kabhī tazkira-e-jām-e-sharāb aatā hai

munh mein waiz ke bhi bhar aata hai pani aksar

jab kabhi tazkira-e-jam-e-sharab aata hai

pī kar do ghūñT dekh zāhid

kyā tujh se kahūñ sharāb kyā hai

pi kar do ghunT dekh zahid

kya tujh se kahun sharab kya hai

vaa.iz na tum piyo na kisī ko pilā sako

kyā baat hai tumhārī sharāb-e-tuhūr kī

waiz na tum piyo na kisi ko pila sako

kya baat hai tumhaari sharab-e-tuhur ki

kisī tarah to ghaTe dil kī be-qarārī bhī

chalo vo chashm nahīñ kam se kam sharāb to ho

kisi tarah to ghaTe dil ki be-qarari bhi

chalo wo chashm nahin kam se kam sharab to ho