Aansoo Shayari

aa dekh ki mere āñsuoñ meñ

ye kis kā jamāl aa gayā hai

aañkh kam-baḳht se us bazm meñ aañsū na rukā

ek qatre ne Duboyā mujhe dariyā ho kar

āñkhoñ se āñsuoñ ke marāsim purāne haiñ

mehmāñ ye ghar meñ aa.eñ to chubhtā nahīñ dhuāñ

āñkhoñ tak aa sakī na kabhī āñsuoñ kī lahr

ye qāfila bhī naql-e-makānī meñ kho gayā

aañsū hamāre gir ga.e un kī nigāh se

in motiyoñ kī ab koī qīmat nahīñ rahī

aañsū mirī āñkhoñ meñ haiñ naale mire lab par

saudā mire sar meñ hai tamannā mire dil meñ

aag duniyā kī lagā.ī huī bujh jā.egī

koī aañsū mire dāman pe bikhar jaane de

aaj aañsū tum ne poñchhe bhī to kyā

ye to apnā umr bhar kā kaam hai

ālūda-ba-ḳhuuñ chashm se Tapke hai jo aañsū

sab kahte haiñ hairat se ye motī hai ki mūñgā

aap ko ḳhuun ke aañsū hī rulānā hogā

haal-e-dil kahne ko ham apnā agar baiTh ga.e

ārizoñ par ye Dhalakte hue aañsū tauba

ham ne sho.aloñ pe machaltī huī shabnam dekhī

aarzū hasrat aur ummīd shikāyat aañsū

ik tirā zikr thā aur biich meñ kyā kyā niklā

aasrā de ke mere ashk na chhīn

yahī le de ke bachā hai mujh meñ

aayā hai mire dil kā ġhubār āñsuoñ ke saath

lo ab to huī mālik-e-ḳhushkī-o-tarī aañkh

ab apne chehre par do patthar se sajā.e phirtā huuñ

aañsū le kar bech diyā hai āñkhoñ kī bīnā.ī ko

ashk-e-ġham diida-e-pur-nam se sambhāle na ga.e

ye vo bachche haiñ jo maañ baap se paale na ga.e

ashkoñ ke nishāñ parcha-e-saada pe haiñ qāsid

ab kuchh na bayāñ kar ye ibārat hī bahut hai

ashkoñ ke Tapakne par tasdīq huī us kī

be-shak vo nahīñ uThte āñkhoñ se jo girte haiñ

aur kuchh tohfa na thā jo laate ham tere niyāz

ek do aañsū the āñkhoñ meñ so bhar laa.eñ haiñ ham

bahtā aañsū ek jhalak meñ kitne ruup dikhā.egā

aañkh se ho kar gaal bhigo kar miTTī meñ mil jā.egā

ba-qadr-e-zauq mere ashk-e-ġham kī tarjumānī hai

koī kahtā hai motī hai koī kahtā hai paanī hai

bichhī thiiñ har taraf āñkheñ hī āñkheñ

koī aañsū girā thā yaad hogā

dāman ashkoñ se tar kareñ kyuuñ-kar

raaz ko mushtahar kareñ kyuuñ-kar

dāman se vo poñchhtā hai aañsū

rone kā kuchh aaj hī mazā hai