Sher on Zulf

pūchhā jo un se chāñd nikaltā hai kis tarah

zulfoñ ko ruḳh pe Daal ke jhaTkā diyā ki yuuñ

puchha jo un se chand nikalta hai kis tarah

zulfon ko ruKH pe Dal ke jhaTka diya ki yun

ham hue tum hue ki 'mīr' hue

us kī zulfoñ ke sab asiir hue

hum hue tum hue ki 'mir' hue

us ki zulfon ke sab asir hue

aah ko chāhiye ik umr asar hote tak

kaun jiitā hai tirī zulf ke sar hote tak

aah ko chahiye ek umr asar hote tak

kaun jita hai teri zulf ke sar hote tak

jab yaar ne uThā kar zulfoñ ke baal bāñdhe

tab maiñ ne apne dil meñ lākhoñ ḳhayāl bāñdhe

jab yar ne uTha kar zulfon ke baal bandhe

tab main ne apne dil mein lakhon KHayal bandhe

kis ne bhīge hue bāloñ se ye jhaTkā paanī

jhuum ke aa.ī ghaTā TuuT ke barsā paanī

kis ne bhige hue baalon se ye jhaTka pani

jhum ke aai ghaTa TuT ke barsa pani

apne sar ik balā to lenī thī

maiñ ne vo zulf apne sar lī hai

apne sar ek bala to leni thi

main ne wo zulf apne sar li hai

bikhrī huī vo zulf ishāroñ meñ kah ga.ī

maiñ bhī sharīk huuñ tire hāl-e-tabāh meñ

bikhri hui wo zulf ishaaron mein kah gai

main bhi sharik hun tere haal-e-tabah mein

kuchh bikhrī huī yādoñ ke qisse bhī bahut the

kuchh us ne bhī bāloñ ko khulā chhoḌ diyā thā

kuchh bikhri hui yaadon ke qisse bhi bahut the

kuchh us ne bhi baalon ko khula chhoD diya tha

ye uḌī uḌī sī rañgat ye khule khule se gesū

tirī sub.h kah rahī hai tirī raat kā fasāna

ye uDi uDi si rangat ye khule khule se gesu

teri subh kah rahi hai teri raat ka fasana

niiñd us kī hai dimāġh us kā hai rāteñ us kī haiñ

terī zulfeñ jis ke baazū par pareshāñ ho ga.iiñ

nind us ki hai dimagh us ka hai raaten us ki hain

teri zulfen jis ke bazu par pareshan ho gain

bahut mushkil hai duniyā kā sañvarnā

tirī zulfoñ kā pech-o-ḳham nahīñ hai

bahut mushkil hai duniya ka sanwarna

teri zulfon ka pech-o-KHam nahin hai

ai junūñ phir mire sar par vahī shāmat aa.ī

phir phañsā zulfoñ meñ dil phir vahī aafat aa.ī

ai junun phir mere sar par wahi shamat aai

phir phansa zulfon mein dil phir wahi aafat aai

haath TūTeñ maiñ ne gar chheḌī hoñ zulfeñ aap kī

aap ke sar kī qasam bād-e-sabā thī maiñ na thā

hath TuTen main ne gar chheDi hon zulfen aap ki

aap ke sar ki qasam baad-e-saba thi main na tha

dekhī thī ek raat tirī zulf ḳhvāb meñ

phir jab talak jiyā maiñ pareshān hī rahā

dekhi thi ek raat teri zulf KHwab mein

phir jab talak jiya main pareshan hi raha

ye khule khule se gesū inheñ laakh tū sañvāre

mire haath se sañvarte to kuchh aur baat hotī

ye khule khule se gesu inhen lakh tu sanware

mere hath se sanwarte to kuchh aur baat hoti

chheḌtī haiñ kabhī lab ko kabhī ruḳhsāroñ ko

tum ne zulfoñ ko bahut sar pe chaḌhā rakkhā hai

chheDti hain kabhi lab ko kabhi ruKHsaron ko

tum ne zulfon ko bahut sar pe chaDha rakkha hai

sarak kar aa ga.iiñ zulfeñ jo in maḳhmūr āñkhoñ tak

maiñ ye samjhā ki mai-ḳhāne pe badlī chhā.ī jaatī hai

sarak kar aa gain zulfen jo in maKHmur aankhon tak

main ye samjha ki mai-KHane pe badli chhai jati hai

na jhaTko zulf se paanī ye motī TuuT jā.eñge

tumhārā kuchh na bigḌegā magar dil TuuT jā.eñge

na jhaTko zulf se pani ye moti TuT jaenge

tumhaara kuchh na bigDega magar dil TuT jaenge

zulfeñ siina naaf kamar

ek nadī meñ kitne bhañvar

zulfen sina naf kamar

ek nadi mein kitne bhanwar

ijāzat ho to maiñ tasdīq kar luuñ terī zulfoñ se

sunā hai zindagī ik ḳhūb-sūrat daam hai saaqī

ijazat ho to main tasdiq kar lun teri zulfon se

suna hai zindagi ek KHub-surat dam hai saqi

dekh lete jo mire dil kī pareshānī ko

aap baiThe hue zulfeñ na sañvārā karte

dekh lete jo mere dil ki pareshani ko

aap baiThe hue zulfen na sanwara karte

ka.ī chāñd the sar-e-āsmāñ ki chamak chamak ke palaT ga.e

na lahū mire hī jigar meñ thā na tumhārī zulf siyāh thī

kai chand the sar-e-asman ki chamak chamak ke palaT gae

na lahu mere hi jigar mein tha na tumhaari zulf siyah thi

phir yaad bahut aa.egī zulfoñ kī ghanī shaam

jab dhuup meñ saaya koī sar par na milegā

phir yaad bahut aaegi zulfon ki ghani sham

jab dhup mein saya koi sar par na milega

jo dekhte tirī zanjīr-e-zulf kā aalam

asiir hone kī āzād aarzū karte

jo dekhte teri zanjir-e-zulf ka aalam

asir hone ki aazad aarzu karte

aap kī nāzuk kamar par bojh paḌtā hai bahut

baḌh chale haiñ had se gesū kuchh inheñ kam kījiye

aap ki nazuk kamar par bojh paDta hai bahut

baDh chale hain had se gesu kuchh inhen kam kijiye

zāhid ne mirā hāsil-e-īmāñ nahīñ dekhā

ruḳh par tirī zulfoñ ko pareshāñ nahīñ dekhā

zahid ne mera hasil-e-iman nahin dekha

ruKH par teri zulfon ko pareshan nahin dekha

sub.h-dam zulfeñ na yuuñ bikhrā.iye

log dhokā khā rahe haiñ shaam kā

subh-dam zulfen na yun bikhraiye

log dhoka kha rahe hain sham ka

sab ke jaisī na banā zulf ki ham sāda-nigāh

tere dhoke meñ kisī aur ke shāne lag jaa.eñ

sab ke jaisi na bana zulf ki hum sada-nigah

tere dhoke mein kisi aur ke shane lag jaen

abr meñ chāñd gar na dekhā ho

ruḳh pe zulfoñ ko Daal kar dekho

abr mein chand gar na dekha ho

ruKH pe zulfon ko Dal kar dekho

tasavvur zulf kā hai aur maiñ huuñ

balā kā sāmnā hai aur maiñ huuñ

tasawwur zulf ka hai aur main hun

bala ka samna hai aur main hun

uljhā hai paañv yaar kā zulf-e-darāz meñ

lo aap apne daam meñ sayyād aa gayā

uljha hai panw yar ka zulf-e-daraaz mein

lo aap apne dam mein sayyaad aa gaya

muñh par naqāb-e-zard har ik zulf par gulāl

holī kī shaam hī to sahar hai basant kī

munh par naqab-e-zard har ek zulf par gulal

holi ki sham hi to sahar hai basant ki

baal apne us parī-rū ne sañvāre raat bhar

saañp loTe saikḌoñ dil par hamāre raat bhar

baal apne us pari-ru ne sanware raat bhar

sanp loTe saikDon dil par hamare raat bhar

mere junūñ ko zulf ke saa.e se duur rakh

raste meñ chhāñv pā ke musāfir Thahar na jaa.e

mere junun ko zulf ke sae se dur rakh

raste mein chhanw pa ke musafir Thahar na jae

kabhī khole to kabhī zulf ko bikhrā.e hai

zindagī shaam hai aur shaam Dhalī jaa.e hai

kabhi khole to kabhi zulf ko bikhrae hai

zindagi sham hai aur sham Dhali jae hai

ye kah kar sitam-gar ne zulfoñ ko jhaTkā

bahut din se duniyā pareshāñ nahīñ hai

ye kah kar sitam-gar ne zulfon ko jhaTka

bahut din se duniya pareshan nahin hai

zarā un kī shoḳhī to dekhnā liye zulf-e-ḳham-shuda haath meñ

mere paas aa.e dabe dabe mujhe saañp kah ke Darā diyā

zara un ki shoKHi to dekhna liye zulf-e-KHam-shuda hath mein

mere pas aae dabe dabe mujhe sanp kah ke Dara diya

ruḳh-e-raushan pe us kī gesū-e-shab-gūñ laTakte haiñ

qayāmat hai musāfir rāsta din ko bhaTakte haiñ

ruKH-e-raushan pe us ki gesu-e-shab-gun laTakte hain

qayamat hai musafir rasta din ko bhaTakte hain

shukr hai bāñdh liyā apne khule bāloñ ko

us ne shīrāza-e-ālam ko bikharne na diyā

shukr hai bandh liya apne khule baalon ko

us ne shiraaza-e-alam ko bikharne na diya

zulfoñ meñ kiyā qaid na abrū se kiyā qatl

tū ne to koī baat na maanī mire dil kī

zulfon mein kiya qaid na abru se kiya qatl

tu ne to koi baat na mani mere dil ki

kisī ke ho raho achchhī nahīñ ye āzādī

kisī kī zulf se lāzim hai silsila dil kā

kisi ke ho raho achchhi nahin ye aazadi

kisi ki zulf se lazim hai silsila dil ka

barsāt kā mazā tire gesū dikhā ga.e

aks āsmān par jo paḌā abr chhā ga.e

barsat ka maza tere gesu dikha gae

aks aasman par jo paDa abr chha gae

jaltā hai ab talak tirī zulfoñ ke rashk se

har-chand ho gayā hai chaman kā charāġh gul

jalta hai ab talak teri zulfon ke rashk se

har-chand ho gaya hai chaman ka charagh gul

allāh-re tere silsila-e-zulf kī kashish

jaatā hai jī udhar hī khiñchā kā.enāt kā

allah-re tere silsila-e-zulf ki kashish

jata hai ji udhar hi khincha kaenat ka

us zulf pe phabtī shab-e-dījūr kī sūjhī

andhe ko añdhere meñ baḌī duur kī sūjhī

us zulf pe phabti shab-e-dijur ki sujhi

andhe ko andhere mein baDi dur ki sujhi

'hātim' us zulf kī taraf mat dekh

jaan kar kyuuñ balā meñ phañstā hai

'hatim' us zulf ki taraf mat dekh

jaan kar kyun bala mein phansta hai

un ke gesū sañvarte jaate haiñ

hādse haiñ guzarte jaate haiñ

un ke gesu sanwarte jate hain

hadse hain guzarte jate hain

us ke ruḳhsār par kahāñ hai zulf

shola-e-husn kā dhuāñ hai zulf

us ke ruKHsar par kahan hai zulf

shola-e-husn ka dhuan hai zulf

tirī jo zulf kā aayā ḳhayāl āñkhoñ meñ

vahīñ khaTakne lagā baal baal āñkhoñ meñ

teri jo zulf ka aaya KHayal aankhon mein

wahin khaTakne laga baal baal aankhon mein

ga.ī thī kah ke maiñ laatī huuñ zulf-e-yār kī bū

phirī to bād-e-sabā kā dimāġh bhī na milā

gai thi kah ke main lati hun zulf-e-yar ki bu

phiri to baad-e-saba ka dimagh bhi na mila