so jaate haiñ fōtpath pe aḳhbār bichhā kar

mazdūr kabhī niiñd kī golī nahīñ khāte

so jate hain footpath pe aKHbar bichha kar

mazdur kabhi nind ki goli nahin khate

farishte aa kar un ke jism par ḳhushbū lagāte haiñ

vo bachche rail ke Dibboñ meñ jo jhāḌū lagāte haiñ

farishte aa kar un ke jism par KHushbu lagate hain

wo bachche rail ke Dibbon mein jo jhaDu lagate hain

kuchal kuchal ke na fōt-pāth ko chalo itnā

yahāñ pe raat ko mazdūr ḳhvāb dekhte haiñ

kuchal kuchal ke na foot-path ko chalo itna

yahan pe raat ko mazdur KHwab dekhte hain

aane vaale jaane vaale har zamāne ke liye

aadmī mazdūr hai rāheñ banāne ke liye

aane wale jaane wale har zamane ke liye

aadmi mazdur hai rahen banane ke liye

shahr meñ mazdūr jaisā dar-ba-dar koī nahīñ

jis ne sab ke ghar banā.e us kā ghar koī nahīñ

shahr mein mazdur jaisa dar-ba-dar koi nahin

jis ne sab ke ghar banae us ka ghar koi nahin

tū qādir o aadil hai magar tere jahāñ meñ

haiñ talḳh bahut banda-e-mazdūr ke auqāt

tu qadir o aadil hai magar tere jahan mein

hain talKH bahut banda-e-mazdur ke auqat

mehnat kar ke ham to āḳhir bhūke bhī so jā.eñge

yā maulā tū barkat rakhnā bachchoñ kī guḌ-dhānī meñ

mehnat kar ke hum to aaKHir bhuke bhi so jaenge

ya maula tu barkat rakhna bachchon ki guD-dhani mein

bojh uThānā shauq kahāñ hai majbūrī kā saudā hai

rahte rahte station par log qulī ho jaate haiñ

bojh uThana shauq kahan hai majburi ka sauda hai

rahte rahte station par log quli ho jate hain

hone do charāġhāñ mahloñ meñ kyā ham ko agar dīvālī hai

mazdūr haiñ ham mazdūr haiñ ham mazdūr kī duniyā kaalī hai

hone do charaghan mahlon mein kya hum ko agar diwali hai

mazdur hain hum mazdur hain hum mazdur ki duniya kali hai

ta.amīr-o-taraqqī vaale haiñ kahiye bhī to un ko kyā kahiye

jo shīsh-mahal meñ baiThe hue mazdūr kī bāteñ karte haiñ

tamir-o-taraqqi wale hain kahiye bhi to un ko kya kahiye

jo shish-mahal mein baiThe hue mazdur ki baaten karte hain

logoñ ne ārām kiyā aur chhuTTī puurī kī

yakum may ko bhī mazdūroñ ne mazdūrī kī

logon ne aaram kiya aur chhuTTi puri ki

yakum may ko bhi mazduron ne mazduri ki

peḌ ke nīche zarā sī chhāñv jo us ko milī

so gayā mazdūr tan par boriyā oḌhe hue

peD ke niche zara si chhanw jo us ko mili

so gaya mazdur tan par boriya oDhe hue

mill mālik ke kutte bhī charbīle haiñ

lekin mazdūroñ ke chehre piile haiñ

mill malik ke kutte bhi charbile hain

lekin mazduron ke chehre pile hain

terī tābish se raushan haiñ gul bhī aur vīrāne bhī

kyā tū bhī is hañstī-gātī duniyā kā mazdūr hai chāñd?

teri tabish se raushan hain gul bhi aur virane bhi

kya tu bhi is hansti-gati duniya ka mazdur hai chand?

maiñ ne 'anvar' is liye bāñdhī kalā.ī par ghaḌī

vaqt pūchheñge ka.ī mazdūr bhī raste ke biich

main ne 'anwar' is liye bandhi kalai par ghaDi

waqt puchhenge kai mazdur bhi raste ke bich

zindagī ab is qadar saffāk ho jā.egī kyā

bhuuk hī mazdūr kī ḳhūrāk ho jā.egī kyā

zindagi ab is qadar saffak ho jaegi kya

bhuk hi mazdur ki KHurak ho jaegi kya

ab un kī ḳhvāb-gāhoñ meñ koī āvāz mat karnā

bahut thak-hār kar fōtpath par mazdūr so.e haiñ

ab un ki KHwab-gahon mein koi aawaz mat karna

bahut thak-haar kar footpath par mazdur soe hain

pasīna merī mehnat kā mire māthe pe raushan thā

chamak la.al-o-javāhar kī mirī Thokar pe rakkhī thī

pasina meri mehnat ka mere mathe pe raushan tha

chamak lal-o-jawahar ki meri Thokar pe rakkhi thi

daulat kā falak toḌ ke aalam kī jabīñ par

mazdūr kī qismat ke sitāre nikal aa.e

daulat ka falak toD ke aalam ki jabin par

mazdur ki qismat ke sitare nikal aae

ḳhuun mazdūr kā miltā jo na ta.amīroñ meñ

na havelī na mahal aur na koī ghar hotā

KHun mazdur ka milta jo na tamiron mein

na haweli na mahal aur na koi ghar hota

maiñ ik mazdūr huuñ roTī kī ḳhātir bojh uThātā huuñ

mirī qismat hai bār-e-hukmarānī pusht par rakhnā

main ek mazdur hun roTi ki KHatir bojh uThata hun

meri qismat hai bar-e-hukmarani pusht par rakhna

bulāte haiñ hameñ mehnat-kashoñ ke haath ke chhāle

chalo muhtāj ke muñh meñ nivāla rakh diyā jaa.e

bulate hain hamein mehnat-kashon ke hath ke chhaale

chalo muhtaj ke munh mein niwala rakh diya jae

saroñ pe oḌh ke mazdūr dhuup kī chādar

ḳhud apne sar pe use sā.ebāñ samajhne lage

saron pe oDh ke mazdur dhup ki chadar

KHud apne sar pe use saeban samajhne lage

tirī zamīn pe kartā rahā huuñ mazdūrī

hai sūkhne ko pasīna muāvza hai kahāñ

teri zamin pe karta raha hun mazduri

hai sukhne ko pasina muawza hai kahan

phūTne vaalī hai mazdūr ke māthe se kiran

surḳh parcham ufuq-e-sub.h pe lahrāte haiñ

phuTne wali hai mazdur ke mathe se kiran

surKH parcham ufuq-e-subh pe lahraate hain

zamām-e-kār agar mazdūr ke hāthoñ meñ ho phir kyā

tarīq-e-koh-kan meñ bhī vahī hiile haiñ parvezī

zamam-e-kar agar mazdur ke hathon mein ho phir kya

tariq-e-koh-kan mein bhi wahi hile hain parwezi

is liye sab se alag hai mirī ḳhushbū 'āmī'

mushk-e-mazdūr pasīne meñ liye phirtā huuñ

is liye sab se alag hai meri KHushbu 'ami'

mushk-e-mazdur pasine mein liye phirta hun

inhī hairat-zada āñkhoñ se dekhe haiñ vo aañsū bhī

jo aksar dhuup meñ mehnat kī peshānī se Dhalte haiñ

inhi hairat-zada aankhon se dekhe hain wo aansu bhi

jo aksar dhup mein mehnat ki peshani se Dhalte hain

maiñ ki ek mehnat-kash maiñ ki tīrgī-dushman

sub.h-e-nau ibārat hai mere muskurāne se

main ki ek mehnat-kash main ki tirgi-dushman

subh-e-nau ibarat hai mere muskurane se

ab tak mire a.asāb pe mehnat hai musallat

ab tak mire kānoñ meñ mashīnoñ kī sadā hai

ab tak mere aasab pe mehnat hai musallat

ab tak mere kanon mein mashinon ki sada hai

abas mehnat hai kuchh hāsil nahīñ patthar-tarāshī se

yahī mazmūn thā farhād ke teshe kī khaT-khaT kā

abas mehnat hai kuchh hasil nahin patthar-tarashi se

yahi mazmun tha farhad ke teshe ki khaT-khaT ka

ham haiñ mazdūr hameñ kaun sahārā degā

ham to miT kar bhī sahārā nahīñ māñgā karte

hum hain mazdur hamein kaun sahaara dega

hum to miT kar bhi sahaara nahin manga karte

duniyā merī zindagī ke din kam kartī jaatī hai kyuuñ

ḳhuun pasīna ek kiyā hai ye merī mazdūrī hai

duniya meri zindagi ke din kam karti jati hai kyun

KHun pasina ek kiya hai ye meri mazduri hai

le ke tesha uThā hai phir mazdūr

Dhal rahe haiñ jabal mashīnoñ meñ

le ke tesha uTha hai phir mazdur

Dhal rahe hain jabal mashinon mein