ye saarī bāteñ haiñ dar-haqīqat hamāre aḳhlāq ke munāfī

suneñ burā.ī na ham kisī kī na ḳhud kisī ko burā kaheñ ham

ye sari baaten hain dar-haqiqat hamare aKHlaq ke munafi

sunen burai na hum kisi ki na KHud kisi ko bura kahen hum

gila mujh se thā yā merī vafā se

mirī mahfil se kyuuñ barham ga.e vo

gila mujh se tha ya meri wafa se

meri mahfil se kyun barham gae wo

zabāñ pe shikva-e-be-mehrī-e-ḳhudā kyuuñ hai?

duā to māñgiye 'ātish' kabhī duā kī tarah

zaban pe shikwa-e-be-mehri-e-KHuda kyun hai?

dua to mangiye 'atish' kabhi dua ki tarah

dar-haqīqat ittisāl-e-jism-o-jāñ hai zindagī

ye haqīqat hai ki arbāb-e-himam ke vāste

dar-haqiqat ittisal-e-jism-o-jaan hai zindagi

ye haqiqat hai ki arbab-e-himam ke waste

ġham-o-alam bhī haiñ tum se ḳhushī bhī tum se hai

navā-e-soz meñ tum ho sadā-e-sāz meñ tum

gham-o-alam bhi hain tum se KHushi bhi tum se hai

nawa-e-soz mein tum ho sada-e-saz mein tum

umiid un se vafā kī to ḳhair kyā kiije

jafā bhī karte nahīñ vo kabhī jafā kī tarah

umid un se wafa ki to KHair kya kije

jafa bhi karte nahin wo kabhi jafa ki tarah

maslahat kā yahī taqāzā hai

vo na māneñ to maan jaao tum

maslahat ka yahi taqaza hai

wo na manen to man jao tum

ye mai-ḳhāna hai mai-ḳhāna taqaddus us kā lāzim hai

yahāñ jo bhī qadam rakhnā hamesha bā-vazū rakhnā

ye mai-KHana hai mai-KHana taqaddus us ka lazim hai

yahan jo bhi qadam rakhna hamesha ba-wazu rakhna

tumheñ to apnī jafāoñ kī ḳhuub daad milī

mirī vafāoñ kā mujh ko koī sila na milā

tumhein to apni jafaon ki KHub dad mili

meri wafaon ka mujh ko koi sila na mila

mujhe bhī ik sitamgar ke karam se

sitam sahne kī aadat ho ga.ī hai

mujhe bhi ek sitamgar ke karam se

sitam sahne ki aadat ho gai hai

apne chehre se jo zulfoñ ko haTāyā us ne

dekh lī shaam ne tābinda sahar kī sūrat

apne chehre se jo zulfon ko haTaya us ne

dekh li sham ne tabinda sahar ki surat

aap kī hastī meñ hī mastūr ho jaatā huuñ maiñ

jab qarīb aate ho ḳhud se duur ho jaatā huuñ maiñ

aap ki hasti mein hi mastur ho jata hun main

jab qarib aate ho KHud se dur ho jata hun main

jo chāhte ho badalnā mizāj-e-tūfāñ ko

to nāḳhudā pe bharosā karo ḳhudā kī tarah

jo chahte ho badalna mizaj-e-tufan ko

to naKHuda pe bharosa karo KHuda ki tarah

muḳhālifoñ ko bhī apnā banā liyā tū ne

ajiib tarah kā jaadū tirī zabān meñ thā

muKHalifon ko bhi apna bana liya tu ne

ajib tarah ka jadu teri zaban mein tha

ḳhūgar-e-lazzat-e-āzār thā itnā 'ātish'

dard bhī māñgā to pahle se sivā māñgā thā

KHugar-e-lazzat-e-azar tha itna 'atish'

dard bhi manga to pahle se siwa manga tha

chārasāzoñ kī chāra-sāzī se

aur bīmār kī dashā bigḌī

chaarasazon ki chaara-sazi se

aur bimar ki dasha bigDi