یہ کھلا جسم کھلے بال یہ ہلکے ملبوس

تم نئی صبح کا آغاز کرو گے شاید

تمہاری گفتگو سے آس کی خوشبو چھلکتی ہے

جہاں تم ہو وہاں پہ زندگی معلوم ہوتی ہے

میں ذہنی طور پہ آوارہ ہوتا جاتا ہوں

مرے شعور مجھے اپنی حد کے اندر کھینچ

زمانہ تجھ کو حریف کہہ لے اسے یہ حق ہے

مری نظر میں تو دیوتا ہے یہی بہت ہے

تاریخ بتائے گی وہ قطرہ ہے کہ دریا

آنسو ہے ابھی وقت کے قدموں میں پڑا ہے

ستاتی ہے تمہاری یاد جب مجھ کو شب ہجراں

مجھے خود اپنی ہستی اجنبی معلوم ہوتی ہے

گم صم سا کھڑا ہے کوئی دروازۂ دل پر

اس شام کا منظر تو دل آویز بہت ہے

ابھی ستاروں میں باقی ہے زندگی کی رمق

کچھ اور دیر ذرا نرم گرم چادر کھینچ

ہر خواب شکستہ ہے تعمیر نشیمن کا

ہر صبح کے ماتھے پر بازار کی گرمی ہے

اسی لئے تو یہ دنیا دھلی دھلی سی لگے

ترے فراق میں روئے ہیں زار زار ابھی

میں اجالے کو محبت کا خدا لکھتا ہوں

وہ اندھیرے ہی سے مانوس ہوا جاتا ہے

ادائے خار سے گلشن کی بڑھ گئی زینت

اگرچہ پھولوں کے دامن ہیں تار تار ابھی