jiyūñgā maiñ tirī sāñsoñ meñ jab tak

ḳhud apnī saañs meñ zinda rahūñgā

jiyunga main teri sanson mein jab tak

KHud apni sans mein zinda rahunga

mayassar se ziyāda chāhtā hai

samundar jaise dariyā chāhtā hai

mayassar se ziyaada chahta hai

samundar jaise dariya chahta hai

ishq ik aisī havelī hai ki jis se bāhar

koī darvāza khule aur na darīcha nikle

ishq ek aisi haweli hai ki jis se bahar

koi darwaza khule aur na daricha nikle

andhā safar hai ziist kise chhoḌ de kahāñ

uljhā huā sā ḳhvāb hai tābīr kyā kareñ

andha safar hai zist kise chhoD de kahan

uljha hua sa KHwab hai tabir kya karen

kuchh to ināyateñ haiñ mire kārsāz kī

aur kuchh mire mizāj ne tanhā kiyā mujhe

kuchh to inayaten hain mere karsaz ki

aur kuchh mere mizaj ne tanha kiya mujhe

hazār kārvāñ yuuñ to haiñ mere saath magar

jo mere naam hai vo qāfila kab aa.egā

hazar karwan yun to hain mere sath magar

jo mere nam hai wo qafila kab aaega

ye kaun sī jagah hai ye bastī hai kaun sī

koī bhī is jahān meñ tere sivā nahīñ

ye kaun si jagah hai ye basti hai kaun si

koi bhi is jahan mein tere siwa nahin

bār-hā tū ne ḳhvāb dikhlā.e

bār-hā ham ne kar liyā hai yaqīñ

bar-ha tu ne KHwab dikhlae

bar-ha hum ne kar liya hai yaqin

jaise paanī pe naqsh ho koī

raunaqeñ sab adam-sabāt rahīñ

jaise pani pe naqsh ho koi

raunaqen sab adam-sabaat rahin

havā bhī chāhiye aur raushnī bhī

har ik hujra darīcha chāhtā hai

hawa bhi chahiye aur raushni bhi

har ek hujra daricha chahta hai

rakhkhūñ kahāñ pe paañv baḌhā.ūñ kidhar qadam

raḳhsh-e-ḳhayāl aaj hai be-iḳhtiyār phir

rakhkhun kahan pe panw baDhaun kidhar qadam

raKHsh-e-KHayal aaj hai be-iKHtiyar phir

ye pūchh aa ke kaun nasīboñ jiyā hai dil

mat dekh ye ki kaun sitāra hai baḳht meñ

ye puchh aa ke kaun nasibon jiya hai dil

mat dekh ye ki kaun sitara hai baKHt mein

badan malbūs meñ sho.ala sā ik larzāñ qarīn-e-jāñ

dil-e-ḳhāshāk bhī sho.ala huā jaltā rahā maiñ bhī

badan malbus mein shoala sa ek larzan qarin-e-jaan

dil-e-KHashak bhi shoala hua jalta raha main bhi

hairat se dekhtā huā chehra kiyā mujhe

sahrā kiyā kabhī kabhī dariyā kiyā mujhe

hairat se dekhta hua chehra kiya mujhe

sahra kiya kabhi kabhi dariya kiya mujhe