دنیا تو ہم سے ہاتھ ملانے کو آئی تھی

ہم نے ہی اعتبار دوبارہ نہیں کیا

ہم تو سنتے تھے کہ مل جاتے ہیں بچھڑے ہوئے لوگ

تو جو بچھڑا ہے تو کیا وقت نے گردش نہیں کی

فیصلہ بچھڑنے کا کر لیا ہے جب تم نے

پھر مری تمنا کیا پھر مری اجازت کیوں

اس عارضی دنیا میں ہر بات ادھوری ہے

ہر جیت ہے لا حاصل ہر مات ادھوری ہے

مجھ میں اب میں نہیں رہی باقی

میں نے چاہا ہے اس قدر تم کو

تعلق جو بھی رکھو سوچ لینا

کہ ہم رشتہ نبھانا جانتے ہیں

اڑ گئے سارے پرندے موسموں کی چاہ میں

انتظار ان کا مگر بوڑھے شجر کرتے رہے

اب کے ہم نے بھی دیا ترک تعلق کا جواب

ہونٹ خاموش رہے آنکھ نے بارش نہیں کی

عمر بھر کے سجدوں سے مل نہیں سکی جنت

خلد سے نکلنے کو اک گناہ کافی ہے

محبت اور قربانی میں ہی تعمیر مضمر ہے

در و دیوار سے بن جائے گھر ایسا نہیں ہوتا

دھیان میں آ کر بیٹھ گئے ہو تم بھی ناں

مجھے مسلسل دیکھ رہے ہو تم بھی ناں

تم نے کس کیفیت میں مخاطب کیا

کیف دیتا رہا لفظ تو دیر تک

بن کے ہنسی ہونٹوں پر بھی رہتے ہو

اشکوں میں بھی تم بہتے ہو تم بھی ناں

جو تم ہو تو یہ کیسے مان لوں میں

کہ جو کچھ ہے یہاں بس اک گماں ہے

کیا خوب تماشہ ہے یہ کار گہ ہستی

ہر جسم سلامت ہے ہر ذات ادھوری ہے

بھول جوتے ہیں مسافر رستہ

لوگ کہتے ہیں کہانی پھر بھی

دل جن کو ڈھونڈھتا ہے نہ جانے کہاں گئے

خواب و خیال سے وہ زمانے کہاں گئے

کیا جانئے کیا سوچ کے افسردہ ہوا دل

میں نے تو کوئی بات پرانی نہیں لکھی

زندگی میں کبھی کسی کو بھی

میں نے چاہا نہیں مگر تم کو

وہ جنگ جس میں مقابل رہے ضمیر مرا

مجھے وہ جیت بھی عنبرؔ نہ ہوگی ہار سے کم

اک حسیں خواب کہ آنکھوں سے نکلتا ہی نہیں

ایک وحشت ہے کہ تعبیر ہوئی جاتی ہے

لفظ کی حرمت مقدم ہے دل و جاں سے مجھے

سچ تعارف ہے مرے ہر شعر ہر تحریر کا

ترے فراق میں دل کا عجیب عالم ہے

نہ کچھ خمار سے بڑھ کر نہ کچھ خمار سے کم

تشہیر تو مقصود نہیں قصۂ دل کی

سو تجھ کو لکھا تیری نشانی نہیں لکھی

پیروی سے ممکن ہے کب رسائی منزل تک

نقش پا مٹانے کو گرد راہ کافی ہے

اے آسماں کس لیے اس درجہ برہمی

ہم نے تو تری سمت اشارا نہیں کیا

مانوس بام و در سے نظر پوچھتی رہی

ان میں بسے وہ لوگ پرانے کہاں گئے

عیاں دونوں سے تکمیل جہاں ہے

زمیں گم ہو تو پھر کیا آسماں ہے

ہزار خوف مسلط رہے ہیں انساں پر

مگر ہمیں تو ہمی سے ڈرا دیا گیا ہے

تمہاری یاد کا چہرہ ہمارے درد کا رنگ

نکھر گئے ہیں سبھی اشک بار ہونے سے