شہر میں آ کر پڑھنے والے بھول گئے

کس کی ماں نے کتنا زیور بیچا تھا

عید کا دن ہے سو کمرے میں پڑا ہوں اسلمؔ

اپنے دروازے کو باہر سے مقفل کر کے

ہماری جیت ہوئی ہے کہ دونوں ہارے ہیں

بچھڑ کے ہم نے کئی رات دن گزارے ہیں

اسلمؔ بڑے وقار سے ڈگری وصول کی

اور اس کے بعد شہر میں خوانچہ لگا لیا

صرف میرے لیے نہیں رہنا

تم مرے بعد بھی حسیں رہنا

کانٹے سے بھی نچوڑ لی غیروں نے بوئے گل

یاروں نے بوئے گل سے بھی کانٹا بنا دیا

جب میں اس کے گاؤں سے باہر نکلا تھا

ہر رستے نے میرا رستہ روکا تھا

قریب آ کے بھی اک شخص ہو سکا نہ مرا

یہی ہے میری حقیقت یہی فسانہ مرا

جانے کس لمحۂ وحشی کی طلب ہے کہ فلک

دیکھنا چاہے مرے شہر کو جنگل کر کے