'mīr' 'ġhālib' yahīñ to rahte the

ham bhī dillī se dil lagā leñ kyā

'mir' 'ghaalib' yahin to rahte the

hum bhi dilli se dil laga len kya

sab ko kāñToñ pe shak huā thā magar

zaḳhm ke ās-pās phuul mile

sab ko kanTon pe shak hua tha magar

zaKHm ke aas-pas phul mile

isī paanī meñ lāsheñ tairtī haiñ

isī paanī meñ patthar baiThte haiñ

isi pani mein lashen tairti hain

isi pani mein patthar baiThte hain

ek pardā hai sirf sāñsoñ kā

saañs Thahre to kā.enāt khule

ek parda hai sirf sanson ka

sans Thahre to kaenat khule

DhūñD rahā hai dariyā kis ko

roz kināre TuuT rahe haiñ

DhunD raha hai dariya kis ko

roz kinare TuT rahe hain

āñkhoñ se kyā ret giregī

dariyā to ab suukh chukā hai

aankhon se kya ret giregi

dariya to ab sukh chuka hai

hotā nahīñ udaas kisī dukh se maiñ kabhī

itne hasīn log mire ās-pās haiñ

hota nahin udas kisi dukh se main kabhi

itne hasin log mere aas-pas hain

maiñ ne āvāz baa'd meñ khoī

pahle maiñ ne use pukārā thā

main ne aawaz ba'd mein khoi

pahle main ne use pukara tha

hijr meñ jalte hue us ko kahāñ dekh sakā

itnī tāḳhīr huī sirf dhuāñ dekh sakā

hijr mein jalte hue us ko kahan dekh saka

itni taKHir hui sirf dhuan dekh saka

aap kā to shauq hai jalte gharoñ ko dekhnā

aap āñkheñ nam kareñge aap rahne dījiye

aap ka to shauq hai jalte gharon ko dekhna

aap aankhen nam karenge aap rahne dijiye

din din bhar ā.īna dekhā jaatā hai

tab jā kar do chaar ishāre bante haiñ

din din bhar aaina dekha jata hai

tab ja kar do chaar ishaare bante hain

achchhā 'amal samajh ke jo dariyā meñ Daal diiñ

dil kartā hai vo nekiyāñ paanī se khīñch luuñ

achchha 'amal samajh ke jo dariya mein Dal din

dil karta hai wo nekiyan pani se khinch lun

bichhḌe the jis kī vaj.h se siitā se raam jī

maiñ us hiran ko rām-kahānī se khīñch luuñ

bichhDe the jis ki wajh se sita se ram ji

main us hiran ko ram-kahani se khinch lun

mujh se bāhar nikal rahe the sab

maiñ bhī hairān sā nikal aayā

mujh se bahar nikal rahe the sab

main bhi hairan sa nikal aaya

ruuTh jā.eñge mujh se ik din sab

is qadar rūThtā huuñ maiñ sab se

ruTh jaenge mujh se ek din sab

is qadar ruThta hun main sab se

āñkhoñ se ik dariyā niklā

dariyā se kuchh lāsheñ niklīñ

aankhon se ek dariya nikla

dariya se kuchh lashen niklin

dard chehra pahan ke aayā thā

terā chehra thā so qubūl kiyā

dard chehra pahan ke aaya tha

tera chehra tha so qubul kiya

aañsū batā rahe haiñ ki mujh meñ hai zindagī

yā'nī maiñ intizār meñ patthar nahīñ huā

aansu bata rahe hain ki mujh mein hai zindagi

ya'ni main intizar mein patthar nahin hua

javāb hañs ke diyā us ne aur rone lagā

savāl pūchh ke sharmindagī baḌhī merī

jawab hans ke diya us ne aur rone laga

sawal puchh ke sharmindagi baDhi meri

maiñ sun rahā huuñ phone pe ḳhāmoshiyāñ tirī

maiñ jāntā huuñ aaj se kyā kyā tamām hai

main sun raha hun phone pe KHamoshiyan teri

main jaanta hun aaj se kya kya tamam hai

dhuup meñ dekh kar parindoñ ko

ugne lagtā hai ik shajar mujh meñ

dhup mein dekh kar parindon ko

ugne lagta hai ek shajar mujh mein

pahle us kī āñkheñ sochī jaatī haiñ

phir āñkhoñ meñ raat bitā.ī jaatī hai

pahle us ki aankhen sochi jati hain

phir aankhon mein raat bitai jati hai

hañsī un ke laboñ tak aa ga.ī hai

mukammal ho gayā ronā hamārā

hansi un ke labon tak aa gai hai

mukammal ho gaya rona hamara

musalsal saath sūraj ke chalī to

kisī din Duub jā.egī nazar bhī

musalsal sath suraj ke chali to

kisi din Dub jaegi nazar bhi

kuchh sazā aur baḌh ga.ī is par

zaḳhm khaa.e to muskurā.e kyoñ

kuchh saza aur baDh gai is par

zaKHm khae to muskurae kyon

qabr par phuul rakhne aayā thā

phir yahīñ ghar banā liyā maiñ ne

qabr par phul rakhne aaya tha

phir yahin ghar bana liya main ne