جتنا ہنگامہ زیادہ ہوگا

آدمی اتنا ہی تنہا ہوگا

ہم تم میں کل دوری بھی ہو سکتی ہے

وجہ کوئی مجبوری بھی ہو سکتی ہے

بھوک چہروں پہ لیے چاند سے پیارے بچے

بیچتے پھرتے ہیں گلیوں میں غبارے بچے

مرنے کے بعد خود ہی بکھر جاؤں گا کہیں

اب قبر کیا بنے گی اگر گھر نہیں بنا

خول چہروں پہ چڑھانے نہیں آتے ہم کو

گاؤں کے لوگ ہیں ہم شہر میں کم آتے ہیں

میرے اندر کا پانچواں موسم

کس نے دیکھا ہے کس نے جانا ہے

دشمن مجھ پر غالب بھی آ سکتا ہے

ہار مری مجبوری بھی ہو سکتی ہے

کہیں انتہا کی ملامتیں کہیں پتھروں سے اٹی چھتیں

ترے شہر میں مرے بعد اب کوئی سر پھرا نہیں آئے گا

ہو گیا چرخ ستم گر کا کلیجہ ٹھنڈا

مر گئے پیاس سے دریا کے کنارے بچے

گرمی لگی تو خود سے الگ ہو کے سو گئے

سردی لگی تو خود کو دوبارہ پہن لیا

یہ دل جو مضطرب رہتا بہت ہے

کوئی اس دشت میں تڑپا بہت ہے

رات کو روز ڈوب جاتا ہے

چاند کو تیرنا سکھانا ہے