shahr ke aa.iin meñ ye mad bhī likkhī jā.egī

zinda rahnā hai to qātil kī sifārish chāhiye

shahr ke aain mein ye mad bhi likkhi jaegi

zinda rahna hai to qatil ki sifarish chahiye

har ek aañkh ko kuchh TuuTe ḳhvāb de ke gayā

vo zindagī ko ye kaisā azaab de ke gayā

har ek aankh ko kuchh TuTe KHwab de ke gaya

wo zindagi ko ye kaisa azab de ke gaya

ham kisī bahrūpiye ko jaan leñ mushkil nahīñ

us ko kyā pahchāniye jis kā koī chehrā na ho

hum kisi bahrupiye ko jaan len mushkil nahin

us ko kya pahchaniye jis ka koi chehra na ho

giregī kal bhī yahī dhuup aur yahī shabnam

is āsmāñ se nahīñ aur kuchh utarne kā

giregi kal bhi yahi dhup aur yahi shabnam

is aasman se nahin aur kuchh utarne ka

mujh meñ the jitne aib vo mere qalam ne likh diye

mujh meñ thā jitnā husn vo mere hunar meñ gum huā

mujh mein the jitne aib wo mere qalam ne likh diye

mujh mein tha jitna husn wo mere hunar mein gum hua

terī āñkhoñ meñ aañsū bhī dekhe haiñ

tere hāthoñ meñ dekhā hai ḳhanjar bhī

teri aankhon mein aansu bhi dekhe hain

tere hathon mein dekha hai KHanjar bhi

apnī nazar se TuuT kar apnī nazar meñ gum huā

vo baḌā bā-shu.ūr thā apne hī ghar meñ gum huā

apni nazar se TuT kar apni nazar mein gum hua

wo baDa ba-shuur tha apne hi ghar mein gum hua

itnā badal gayā huuñ ki pahchānñe mujhe

aa.egā vo to ḳhud se guzar kar hī aa.egā

itna badal gaya hun ki pahchanne mujhe

aaega wo to KHud se guzar kar hi aaega

baaġh meñ honā hī shāyad seb kī pahchān thī

ab ki vo bāzār meñ hai ab to biknā hai use

bagh mein hona hi shayad seb ki pahchan thi

ab ki wo bazar mein hai ab to bikna hai use

agarche us kī har ik baat khurdurī hai bahut

mujhe pasand hai Dhañg us ke baat karne kā

agarche us ki har ek baat khurduri hai bahut

mujhe pasand hai Dhang us ke baat karne ka

jo mere paas thā sab luuT le gayā koī

kivāḌ band rakhūñ ab mujhe hai Dar kis kā

jo mere pas tha sab luT le gaya koi

kiwaD band rakhun ab mujhe hai Dar kis ka

tujh pe khul jā.eñge ḳhud apne bhī asrār ka.ī

tū zarā mujh ko bhī rakh apne barābar meñ kabhī

tujh pe khul jaenge KHud apne bhi asrar kai

tu zara mujh ko bhi rakh apne barabar mein kabhi

na jaane kis liye rotā huuñ hañste hañste maiñ

basā huā hai nigāhoñ meñ ā.īna koī

na jaane kis liye rota hun hanste hanste main

basa hua hai nigahon mein aaina koi

dekhte haiñ dar-o-dīvār harīfāna mujhe

itnā be-bas bhī kahāñ hogā koī ghar meñ kabhī

dekhte hain dar-o-diwar harifana mujhe

itna be-bas bhi kahan hoga koi ghar mein kabhi

chhoḌ kar bār-e-sadā vo be-sadā ho jā.egā

vahm thā merā ki patthar ā.īna ho jā.egā

chhoD kar bar-e-sada wo be-sada ho jaega

wahm tha mera ki patthar aaina ho jaega

reza reza raat bhar jo ḳhauf se hotā rahā

din ko sāñsoñ par abhī tak bojh us patthar kā hai

reza reza raat bhar jo KHauf se hota raha

din ko sanson par abhi tak bojh us patthar ka hai