شہر کے آئین میں یہ مد بھی لکھی جائے گی

زندہ رہنا ہے تو قاتل کی سفارش چاہیئے

ہر ایک آنکھ کو کچھ ٹوٹے خواب دے کے گیا

وہ زندگی کو یہ کیسا عذاب دے کے گیا

ہم کسی بہروپئے کو جان لیں مشکل نہیں

اس کو کیا پہچانیے جس کا کوئی چہرا نہ ہو

گرے گی کل بھی یہی دھوپ اور یہی شبنم

اس آسماں سے نہیں اور کچھ اترنے کا

مجھ میں تھے جتنے عیب وہ میرے قلم نے لکھ دیئے

مجھ میں تھا جتنا حسن وہ میرے ہنر میں گم ہوا

اپنی نظر سے ٹوٹ کر اپنی نظر میں گم ہوا

وہ بڑا با شعور تھا اپنے ہی گھر میں گم ہوا

تیری آنکھوں میں آنسو بھی دیکھے ہیں

تیرے ہاتھوں میں دیکھا ہے خنجر بھی

اتنا بدل گیا ہوں کہ پہچاننے مجھے

آئے گا وہ تو خود سے گزر کر ہی آئے گا

باغ میں ہونا ہی شاید سیب کی پہچان تھی

اب کہ وہ بازار میں ہے اب تو بکنا ہے اسے

اگرچہ اس کی ہر اک بات کھردری ہے بہت

مجھے پسند ہے ڈھنگ اس کے بات کرنے کا

جو میرے پاس تھا سب لوٹ لے گیا کوئی

کواڑ بند رکھوں اب مجھے ہے ڈر کس کا

تجھ پہ کھل جائیں گے خود اپنے بھی اسرار کئی

تو ذرا مجھ کو بھی رکھ اپنے برابر میں کبھی

نہ جانے کس لیے روتا ہوں ہنستے ہنستے میں

بسا ہوا ہے نگاہوں میں آئینہ کوئی

دیکھتے ہیں در و دیوار حریفانہ مجھے

اتنا بے بس بھی کہاں ہوگا کوئی گھر میں کبھی

چھوڑ کر بار صدا وہ بے صدا ہو جائے گا

وہم تھا میرا کہ پتھر آئینہ ہو جائے گا

ریزہ ریزہ رات بھر جو خوف سے ہوتا رہا

دن کو سانسوں پر ابھی تک بوجھ اس پتھر کا ہے