جانتا اس کو ہوں دوا کی طرح

چاہتا اس کو ہوں شفا کی طرح

کیا جانیں ان کی چال میں اعجاز ہے کہ سحر

وہ بھی انہیں سے مل گئے جو تھے ہمارے لوگ

ٹوٹیں وہ سر جس میں تیری زلف کا سودا نہیں

پھوٹیں وہ آنکھیں کہ جن کو دید کا لپکا نہیں

خوب مل کر گلے سے رو لینا

اس سے دل کی صفائی ہوتی ہے

یا اس سے جواب خط لانا یا قاصد اتنا کہہ دینا

بچنے کا نہیں بیمار ترا ارشاد اگر کچھ بھی نہ ہوا

تھوڑی تکلیف سہی آنے میں

دو گھڑی بیٹھ کے اٹھ جائیے گا

مجھے اب موت بہتر زندگی سے

وہ کی تم نے ستم گاری کہ توبہ

کی کسی پر نہ جفا میرے بعد

خوب روئے وہ سنا میرے بعد

کھلی جو آنکھ مری سامنا قضا سے ہوا

جو آنکھ بند ہوئی سابقہ خدا سے ہوا

عشق کے پھندے سے بچئے اے حقیرؔ خستہ دل

اس کا ہے آغاز شیریں اور ہے انجام تلخ

چار دن کی بہار ہے ساری

یہ تکبر ہے یار جانی ہیچ

چھا گئی ایک مصیبت کی گھٹا چار طرف

کھلے بالوں جو وہ دریا سے نہا کر نکلے

بند قبا پہ ہاتھ ہے شرمائے جاتے ہیں

کمسن ہیں ذکر وصل سے گھبرائے جاتے ہیں

ساقیا ایسا پلا دے مے کا مجھ کو جام تلخ

زندگی دشوار ہو اور ہو مجھے آرام تلخ

بت کو پوجوں گا صنم خانوں میں جا جا کے تو میں

اس کے پیچھے مرا ایمان رہے یا نہ رہے

حقارت کی نگاہوں سے نہ فرش خاک کو دیکھو

امیروں کا فقیروں کا یہی آخر کو بستر ہے

دیکھا بغور عیب سے خالی نہیں کوئی

بزم جہاں میں سب ہیں خدا کے سنوارے لوگ

بہ خدا سجدے کرے گا وہ بٹھا کر بت کو

اب حقیرؔ آگے مسلمان رہے یا نہ رہے

یک بہ یک ترک نہ کرنا تھا محبت مجھ سے

خیر جس طرح سے آتا تھا وہ آتا جاتا

بت کدے میں بھی گیا کعبہ کی جانب بھی گیا

اب کہاں ڈھونڈھنے تجھ کو ترا شیدا جاتا

کیوں نہ کعبہ کو کہوں اللہ کا اور بت کا گھر

وہ بھی میرے دل میں ہے اور یہ بھی میرے دل میں ہے

جب سے کچھ قابو ہے اپنا کاکل خم دار پر

سانپ ہر دم لوٹتا ہے سینۂ اغیار پر