افسوس عمر کٹ گئی رنج و ملال میں

دیکھا نہ خواب میں بھی جو کچھ تھا خیال میں

مشکل کا سامنا ہو تو ہمت نہ ہاریے

ہمت ہے شرط صاحب ہمت سے کیا نہ ہو

تڑپ تڑپ کے تمنا میں کروٹیں بدلیں

نہ پایا دل نے ہمارے قرار ساری رات

آئنہ دیکھ کے فرماتے ہیں

کس غضب کی ہے جوانی میری

دوستی کی تم نے دشمن سے عجب تم دوست ہو

میں تمہاری دوستی میں مہرباں مارا گیا

تمہارے عاشقوں میں بے قراری کیا ہی پھیلی ہے

جدھر دیکھو جگر تھامے ہوئے دو چار بیٹھے ہیں

کچھ سمجھ کر اس مۂ خوبی سے کی تھی دوستی

یہ نہ سمجھے تھے کہ دشمن آسماں ہو جائے گا

جب نہیں کچھ اعتبار زندگی

اس جہاں کا شاد کیا ناشاد کیا

عبادت خدا کی بہ امید حور

مگر تجھ کو زاہد حیا کچھ نہیں

اس طرف اٹھتے نہیں ہاتھ جدھر سب کچھ ہے

اس طرف دوڑتے ہیں پاؤں جدھر کچھ بھی نہیں

دل سے کیا پوچھتا ہے زلف گرہ گیر سے پوچھ

اپنے دیوانے کا احوال تو زنجیر سے پوچھ

دل نہ دیتے اسے تو کیا کرتے

اے اثرؔ دکھ ہمیں اٹھانا تھا

اب جہاں پر ہے شیخ کی مسجد

پہلے اس جا شراب خانہ تھا

خوب و زشت جہاں کا فرق نہ پوچھ

موت جب آئی سب برابر تھا

ساتھ دنیا کا نہیں طالب دنیا دیتے

اپنے کتوں کو یہ مردار لیے پھرتی ہے

گلشن میں کون بلبل نالاں کو دے پناہ

گلچیں و باغباں بھی ہیں صیاد کی طرف

دل کی حالت سے خبر دیتی ہے

اثرؔ آشفتہ بیانی میری

پا رہا ہے دل مصیبت کے مزے

آئے لب پر شکوۂ بیداد کیا

کیسا آنا کیسا جانا میرے گھر کیا آؤ گے

غیروں کے گھر جانے سے تم فرصت کس دن پاتے ہو

مر ہی کر اٹھیں گے تیرے در سے ہم

آ کے جب بیٹھے تو پھر اٹھ جائیں کیا

خدا جانے اثرؔ کو کیا ہوا ہے

رہا کرتا ہے چپ دو دو پہر تک

کرتا ہے اے اثرؔ دل خوں گشتہ کا گلہ

عاشق وہ کیا کہ خستۂ تیغ جفا نہ ہو

حسینوں کی جفائیں بھی تلون سے نہیں خالی

ستم کے بعد کرتے ہیں کرم ایسا بھی ہوتا ہے

الٹی کیوں پڑتی ہے تدبیر یہ ہم کیا جانیں

کون الٹ دیتا ہے اس راز کو تدبیر سے پوچھ

بناتے ہیں ہزاروں زخم خنداں خنجر غم سے

دل ناشاد کو ہم اس طرح پر شاد کرتے ہیں