تو نے ہی رہ نہ دکھائی تو دکھائے گا کون

ہم تری راہ میں گمراہ ہوئے بیٹھے ہیں

ہے فہم اس کا جو ہر انسان کے دل کی زباں سمجھے

سخن وہ ہے جسے ہر شخص اپنا ہی بیاں سمجھے

ہر شے میں ہر بشر میں نظر آ رہا ہے تو

سجدے میں اپنے سر کو جھکاؤں کہاں کہاں

محبت میں نہیں ہے ابتدا یا انتہا کوئی

ہم اپنے عشق کو ہی عشق کی منزل سمجھتے ہیں

آنکھوں آنکھوں میں پلا دی مرے ساقی نے مجھے

خوف ذلت ہے نہ اندیشۂ رسوائی ہے

قدرت کی برکتیں ہیں خزانہ بسنت کا

کیا خوب کیا عجیب زمانہ بسنت کا

دوزخ سے بھی خراب کہوں میں بہشت کو

دو چار اگر وہاں پہ بھی سرمایہ دار ہوں

کیسی کشش ہے عشق کے ٹوٹے مزار میں

میلہ لگا ہوا ہے ہمارے دیار میں

چھپے ہیں سات پردوں میں یہ سب کہنے کی باتیں ہیں

انہیں میری نگاہوں نے جہاں ڈھونڈا وہاں نکلے

سخن سازی میں لازم ہے کمال علم و فن ہونا

محض تک بندیوں سے کوئی شاعر ہو نہیں سکتا

فرشتہ ہر بشر کو ہر زمیں کو آسماں سمجھے

کہ ہم تو عشق میں دنیا کو ہی جنت نشاں سمجھے

ہم رو بہ روئے شمع ہیں اس انتظار میں

کچھ جاں پروں میں آئے تو اڑ کر نثار ہوں

زمانہ یہ آ گیا ہے رہبرؔ کہ اہل بینش کو کون پوچھے

جمے ہیں مکار کرسیوں پر دکھا رہے ہیں گنوار آنکھیں

محبت سی شے اس نے مجھ کو عطا کی

کہ خوش خوش چلوں عمر برباد کر کے

دل کو بہت عزیز ہے آنا بسنت کا

رہبرؔ کی زندگی میں سمانا بسنت کا

رشک جناں چمن کو بنانا بسنت کا

ہر ہر کلی میں رنگ دکھانا بسنت کا

دل اس کا جگر اس کا ہے جاں اس کی ہم اس کے

کس بات سے انکار کیا جائے کسی کو

محو دیدار ہوئے جاتے ہیں رہ رو سارے

اک تماشہ ہوا گویا رخ دلبر نہ ہوا

آیا انہیں پسند تو ان کا ہی ہو گیا

کم تھا ہمارے دل سے ہمارا کلام کیا

ایک آنسو بھی اگر رو دے تو جانوں تجھ کو

میری تقدیر مجھے دیکھ کر ہنستی کیا ہے

پھر وہی سودا وہی وحشت وہی طرز جنوں

ہیں نشاں موجود سارے عشق کی تاثیر کے

کھنچتے جاتے ہیں خود مری جانب

مجھ کو جیوں جیوں وہ آزماتے ہیں

پیغام لطف خاص سنانا بسنت کا

دریائے فیض عام بہانا بسنت کا

تنگ پیمائی کا شکوہ ساقئ ازلی سے کیا

ہم نے سمجھا ہی نہیں دستور مے خانہ ابھی

تصویر روئے یار دکھانا بسنت کا

اٹکھیلیوں سے دل کو لبھانا بسنت کا

ہر سمت سبزہ زار بچھانا بسنت کا

پھولوں میں رنگ و بو کو لٹانا بسنت کا

وہی صفتیں جو بتلاتا ہے تو واعظ سب اس میں ہیں

دیا ہے جس کو دل ہم نے وہی تیرا خدا ہوگا