بات کرنے کا حسیں طور طریقہ سیکھا

ہم نے اردو کے بہانے سے سلیقہ سیکھا

کسی کے عشق میں برباد ہونا

ہمیں آیا نہیں فرہاد ہونا

میں تھا جب کارواں کے ساتھ تو گل زار تھی دنیا

مگر تنہا ہوا تو ہر طرف صحرا ہی صحرا تھا

زندگی دیکھ لے نظر بھر کے

ہم ہیں شامل ترے خرابوں میں

دل کا سارا درد بھرا تصویروں میں

ایک مصور نقش ہوا تصویروں میں

مرے دل میں کوئی معصوم بچہ

کسی سے آج تک روٹھا ہوا ہے

سنا ہے رات پورے چاند کی ہے

سمندر شام سے بہکا ہوا ہے

وقت کہاں مٹھی میں آنے والا تھا

لیکن ہم نے باندھ لیا تصویروں میں

لطف تو دیتی ہے یہ آوارگی

پھر بھی ہم کو لوٹ جانا چاہئے

تجھے جب دیکھتا ہوں تو خود اپنی یاد آتی ہے

مرا انداز ہنسنے کا کبھی تیرے ہی جیسا تھا

سفر میں اب مسلسل زلزلے ہیں

وہ رک جائیں جنہیں گرنے کا ڈر ہے

ہم چراغوں کی مدد کرتے رہے

اور ادھر سورج بجھا ڈالا گیا

بتاؤں کیا تمہیں حاصل سفر کا

ادھوری داستاں ہے اور میں ہوں

مری آوارگی ہی میرے ہونے کی علامت ہے

مجھے پھر اس سفر کے بعد بھی کوئی سفر دینا

اسی نے راہ دکھلائی جہاں کو

جو اپنی راہ پر تنہا گیا تھا

کتنے لوگوں سے ملنا جلنا تھا

خود سے ملنا بھی اب محال ہوا

زمانے سے گھبرا کے سمٹے تھے خود میں

مگر اب تو خود سے بھی اکتا رہے ہیں

گفتگو کا کوئی تو ملتا سرا

پھر اسے ناراض کر کے دیکھتے

سیدھے اپنی بات پہ آ

یہ لہجہ درباری چھوڑ

اب تک جسم سلگتا ہے

کیسی تھی برسات نہ پوچھ

اب اپنا چہرہ بیگانہ لگتا ہے

ہم کو تھی سنجیدہ رہنے کی عادت

اڑانوں نے کیا تھا اس قدر مایوس ان کو

تھکے ہارے پرندے جال میں خود پھنس رہے تھے

کوئی تعمیر کی صورت تو نکلے

ہمیں منظور ہے بنیاد ہونا

کاغذوں پر مفلسی کے مورچے سر ہو گئے

اور کہنے کے لئے حالات بہتر ہو گئے

ہم نے تو پاس ادب میں بندہ پرور کہہ دیا

اور وہ سمجھے کہ سچ میں بندہ پرور ہو گئے

آخر ہم کو بے زاری تک لے آئی

ہر شے پر گرویدہ رہنے کی عادت

اول آخر ہی جب نہیں بس میں

کیا کریں درمیان کی باتیں

چند لکیریں تو اس درجہ گہری تھیں

دیکھنے والا ڈوب گیا تصویروں میں

کتنی عجلت میں مٹا ڈالا گیا

آگ میں سب کچھ جلا ڈالا گیا