دیکھتے رہتے ہیں خود اپنا تماشا دن رات

ہم ہیں خود اپنے ہی کردار کے مارے ہوئے لوگ

حریم دل میں ٹھہر یا سرائے جان میں رک

یہ سب مکان ہیں تیرے کسی مکان میں رک

تو نے اے وقت پلٹ کر بھی کبھی دیکھا ہے

کیسے ہیں سب تری رفتار کے مارے ہوئے لوگ

کیا پتا جانے کہاں آگ لگی

ہر طرف صرف دھواں ہے مجھ میں

تیری دہلیز پہ اقرار کی امید لیے

پھر کھڑے ہیں ترے انکار کے مارے ہوئے لوگ

میں ادھورا سا ہوں اس کے اندر

اور وہ شخص مکمل مجھ میں

مجھ میں تھوڑی سی جگہ بھی نہیں نفرت کے لیے

میں تو ہر وقت محبت سے بھرا رہتا ہوں

جشن ہوتا ہے وہاں رات ڈھلے

وہ جو اک خالی مکاں ہے مجھ میں

تمام شہر میں بکھرا پڑا ہے میرا وجود

کوئی بتائے بھلا کس طرح چنوں خود کو

ایک دریا کو دکھائی تھی کبھی پیاس اپنی

پھر نہیں مانگا کبھی میں نے دوبارا پانی

خود اپنے قتل کا الزام ڈھو رہا ہوں ابھی

میں اپنی لاش پہ سر رکھ کے رو رہا ہوں ابھی

میں ہی آئینۂ دنیا میں چلا آیا ہوں

یا چلی آئی ہے دنیا مرے آئینے میں

میں نے کیسے کیسے موتی ڈھونڈے ہیں

لیکن تیرے آگے سب کچھ پتھر ہے

نہ انتظار کرو کل کا آج درج کرو

خموشی توڑ دو اور احتجاج درج کرو

میری آنکھوں سے بھی اک بار نکل

دیکھوں میں تیری روانی پانی