ye lamha lamha zinda rahne kī ḳhvāhish kā hāsil hai

ki lahza lahza apne aap hī meñ mar rahā huuñ maiñ

ye lamha lamha zinda rahne ki KHwahish ka hasil hai

ki lahza lahza apne aap hi mein mar raha hun main

mirī nazar meñ ga.e mausamoñ ke rañg bhī haiñ

jo aane vaale haiñ un mausamoñ se Darnā kyā

meri nazar mein gae mausamon ke rang bhi hain

jo aane wale hain un mausamon se Darna kya

dil ek aur hazār āzmā.isheñ ġham kī

diyā jalā to thā lekin havā kī zad par thā

dil ek aur hazar aazmaishen gham ki

diya jala to tha lekin hawa ki zad par tha

nazar churā ke vo guzrā qarīb se lekin

nazar bachā ke mujhe dekhtā bhī jaatā thā

nazar chura ke wo guzra qarib se lekin

nazar bacha ke mujhe dekhta bhi jata tha

ye haal hai mire dīvār-o-dar kī vahshat kā

ki mere hote hue bhī makān ḳhālī hai

ye haal hai mere diwar-o-dar ki wahshat ka

ki mere hote hue bhi makan KHali hai

hazār baar ḳhud apne makāñ pe dastak dī

ik ehtimāl meñ jaise ki maiñ hī andar thā

hazar bar KHud apne makan pe dastak di

ek ehtimal mein jaise ki main hi andar tha

bujhe hue dar-o-dīvār dekhne vaalo

use bhī dekho jo ik umr yaañ guzār gayā

bujhe hue dar-o-diwar dekhne walo

use bhi dekho jo ek umr yan guzar gaya