کیا ارادے ہیں وحشت دل کے

کس سے ملنا ہے خاک میں مل کے

تم ایسے اچھے کہ اچھے نہیں کسی کے ساتھ

میں وہ برا کہ کسی کا برا نہیں کرتا

کس کو مہرباں کہئے کون مہرباں اپنا

وقت کی یہ باتیں ہیں وقت اب کہاں اپنا

ظاہر نہ تھا نہیں سہی لیکن ظہور تھا

کچھ کیوں نہ تھا جہان میں کچھ تو ضرور تھا

ہمارے عیب میں جس سے مدد ملے ہم کو

ہمیں ہے آج کل ایسے کسی ہنر کی تلاش

ہچکیوں پر ہو رہا ہے زندگی کا راگ ختم

جھٹکے دے کر تار توڑے جا رہے ہیں ساز کے

آئی ہوگی تو موت آئے گی

تم تو جاؤ مرا خدا حافظ

اب کہاں گفتگو محبت کی

ایسی باتیں ہوئے زمانہ ہوا

تمہاری بات کا اتنا ہے اعتبار ہمیں

کہ ایک بات نہیں اعتبار کے قابل

ہمیں کم بخت احساس خودی اس در پہ لے بیٹھا

ہم اٹھ جاتے تو وہ پردہ بھی اٹھ جاتا جو حائل تھا

کچھ نہیں اچھا تو دنیا میں برا بھی کچھ نہیں

کیجیے سب کچھ مگر اپنی ضرورت دیکھ کر

اے زندگی جنوں نہ سہی بے خودی سہی

تو کچھ بھی اپنی عقل سے پاگل اٹھا تو لا

ہمیں جو یاد ہے ہم تو اسی سے کام لیتے ہیں

کسی کا نام لینا ہو اسی کا نام لیتے ہیں

مے کو مرے سرور سے حاصل سرور تھا

میں تھا نشہ میں چور نشہ مجھ میں چور تھا

ڈھونڈھتی ہے اضطراب شوق کی دنیا مجھے

آپ نے محفل سے اٹھوا کر کہاں رکھا مجھے

ہم تو مسجد سے بھی مایوس ہی آئے ناطقؔ

کوئی اللہ کا بندہ تو مسلماں ہوتا

ہاں جان تو دیں گے مگر اے موت ابھی دم لے

ایسا نہ کہیں وہ کہ ہم آئے تو چلے آپ

سب کچھ مجھے مشکل ہے نہ پوچھو مری مشکل

آسان بھی ہو کام تو آساں نہیں ہوتا

رہ کے اچھا بھی کچھ بھلا نہ ہوا

میں برا ہو گیا برا نہ ہوا

عمر بھر کا ساتھ مٹی میں ملا

ہم چلے اے جسم بے جاں الودع

وفا پر ناز ہم کو ان کو اپنی بے وفائی پر

کوئی منہ آئنہ میں دیکھتا ہے کوئی پانی میں

اب میں کیا تم سے اپنا حال کہوں

بخدا یاد بھی نہیں مجھ کو

بے خود شوق ہوں آتا ہے خدا یاد مجھے

راستہ بھول کے بیٹھا ہوں صنم خانے کا

اب جہاں میں باقی ہے آہ سے نشاں اپنا

اڑ گئے دھوئیں اپنے رہ گیا دھواں اپنا

مجھ سے ناراض ہیں جو لوگ وہ خوش ہیں ان سے

میں جدا چیز ہوں ناطقؔ مرے اشعار جدا

کیا کروں اے دل مایوس ذرا یہ تو بتا

کیا کیا کرتے ہیں صدموں سے ہراساں ہو کر

اک حرف شکایت پر کیوں روٹھ کے جاتے ہو

جانے دو گئے شکوے آ جاؤ میں باز آیا

پہلی باتیں ہیں نہ پہلے کی ملاقاتیں ہیں

اب دنوں میں وہ رہا لطف نہ راتوں میں رہا

دوسروں کو کیا کہئے دوسری ہے دنیا ہی

ایک ایک اپنے کو ہم نے دوسرا پایا

گھر بنانے کی بڑی فکر ہے دنیا میں ہمیں

صاحب خانہ بنے جاتے ہیں مہماں ہو کر

ہم پاؤں بھی پڑتے ہیں تو اللہ رے نخوت

ہوتا ہے یہ ارشاد کہ پڑتے ہیں گلے آپ

ملے مراد ہماری مگر ملے بھی کہیں

خدا کرے مگر ایسا خدا نہیں کرتا

مجنوں سے جو نفرت ہے دیوانی ہے تو لیلیٰ

وہ خاک اڑاتا ہے لیکن نہیں دل میلا

دوسرا ایسا کہاں اے دشت خلوت کا مقام

اپنی ویرانی کو لے کر میرے ویرانے میں آ

نظر آتا نہیں اب گھر میں وہ بھی اف رے تنہائی

اک آئینہ میں پہلے آدمی تھا میری صورت کا

آتی ہے یاد صبح مسرت کی بار بار

خورشید آتے آتے اسے کل اٹھا تو لا

رہتی ہے شمس و قمر کو ترے سائے کی تلاش

روشنی ڈھونڈھتی پھرتی ہے اندھیرا تیرا

دوستی کس کی رہی یاد وہ کس پر بھولا

دوسرا بیچ میں کون آ کے مرا میرے بعد

چراغ لے کے پھرا ڈھونڈھتا ہوا گھر گھر

شب فراق جو مجھ کو رہی سحر کی تلاش

سب کو یہ شکایت ہے کہ ہنستا نہیں ناطقؔ

ہم کو یہ تعجب کہ وہ گریاں نہیں ہوتا

اول اول خوب دوڑی کشتیٔ اہل ہوس

آخر آخر ڈوب مرنے کا مقام آ ہی گیا

ایسے بہتان لگائے کہ خدا یاد آیا

بت نے گھبرا کے کہا مجھ سے کہ قرآن اٹھا

پہنچائے گا نہیں تو ٹھکانے لگائے گا

اب اس گلی میں غیر کو رہبر بنائیں گے

ہنگامۂ حیات سے لینا تو کچھ نہیں

ہاں دیکھتے چلو کہ تماشا ہے راہ کا

نہ مے کشی نہ عبادت ہماری عادت ہے

کہ سامنے کوئی کام آ گیا تو کر لینا

آخر کو راہبر نے ٹھکانے لگا دیا

خود اپنی راہ لی مجھے رستہ بتا دیا

مل گئے تم ہاتھ اٹھا کر مجھ کو سب کچھ مل گیا

آج تو گھر لوٹ لائی ہے دعا تاثیر کی

چال اور ہے دنیا کی ہمارا ہے چلن اور

وہ ساخت ہے کچھ اور یہ بے ساختہ پن اور

گزرتی ہے مزے سے واعظوں کی زندگی اب تو

سہارا ہو گیا ہے دین دنیا دار لوگوں کا

ہو گئی آوارہ گردی بے گھری کی پردہ دار

کام جتنا ہم کو آتا تھا وہ کام آ ہی گیا