tum aise achchhe ki achchhe nahīñ kisī ke saath

maiñ vo burā ki kisī kā burā nahīñ kartā

tum aise achchhe ki achchhe nahin kisi ke sath

main wo bura ki kisi ka bura nahin karta

kyā irāde haiñ vahshat-e-dil ke

kis se milnā hai ḳhaak meñ mil ke

kya irade hain wahshat-e-dil ke

kis se milna hai KHak mein mil ke

kis ko mehrbāñ kahiye kaun mehrbāñ apnā

vaqt kī ye bāteñ haiñ vaqt ab kahāñ apnā

kis ko mehrban kahiye kaun mehrban apna

waqt ki ye baaten hain waqt ab kahan apna

zāhir na thā nahīñ sahī lekin zuhūr thā

kuchh kyuuñ na thā jahān meñ kuchh to zarūr thā

zahir na tha nahin sahi lekin zuhur tha

kuchh kyun na tha jahan mein kuchh to zarur tha

hamāre aib meñ jis se madad mile ham ko

hameñ hai aaj kal aise kisī hunar kī talāsh

hamare aib mein jis se madad mile hum ko

hamein hai aaj kal aise kisi hunar ki talash

hichkiyoñ par ho rahā hai zindagī kā raag ḳhatm

jhaTke de kar taar toḌe jā rahe haiñ saaz ke

hichkiyon par ho raha hai zindagi ka rag KHatm

jhaTke de kar tar toDe ja rahe hain saz ke

aa.ī hogī to maut aa.egī

tum to jaao mirā ḳhudā hāfiz

aai hogi to maut aaegi

tum to jao mera KHuda hafiz

umr bhar kā saath miTTī meñ milā

ham chale ai jism-e-be-jāñ al-vidā.a

umr bhar ka sath miTTi mein mila

hum chale ai jism-e-be-jaan al-widaa

hameñ kam-baḳht ehsās-e-ḳhudī us dar pe le baiThā

ham uTh jaate to vo parda bhī uTh jaatā jo haa.il thā

hamein kam-baKHt ehsas-e-KHudi us dar pe le baiTha

hum uTh jate to wo parda bhi uTh jata jo hail tha

riyā-kārī ke sajde shaiḳh le baiTheñge masjid ko

kisī din dekhnā ho kar rahegī sar-nigūñ vo bhī

riya-kari ke sajde shaiKH le baiThenge masjid ko

kisi din dekhna ho kar rahegi sar-nigun wo bhi

ab kahāñ guftugū mohabbat kī

aisī bāteñ hue zamāna huā

ab kahan guftugu mohabbat ki

aisi baaten hue zamana hua

tumhārī baat kā itnā hai e'tibār hameñ

ki ek baat nahīñ e'tibār ke qābil

tumhaari baat ka itna hai e'tibar hamein

ki ek baat nahin e'tibar ke qabil

chaal aur hai duniyā kī hamārā hai chalan aur

vo sāḳht hai kuchh aur ye be-sāḳhta-pan aur

chaal aur hai duniya ki hamara hai chalan aur

wo saKHt hai kuchh aur ye be-saKHta-pan aur

kuchh nahīñ achchhā to duniyā meñ burā bhī kuchh nahīñ

kījiye sab kuchh magar apnī zarūrat dekh kar

kuchh nahin achchha to duniya mein bura bhi kuchh nahin

kijiye sab kuchh magar apni zarurat dekh kar

sab kuchh mujhe mushkil hai na pūchho mirī mushkil

āsān bhī ho kaam to āsāñ nahīñ hotā

sab kuchh mujhe mushkil hai na puchho meri mushkil

aasan bhi ho kaam to aasan nahin hota

DhūñDhtī hai iztirāb-e-shauq kī duniyā mujhe

aap ne mahfil se uThvā kar kahāñ rakkhā mujhe

DhunDhti hai iztirab-e-shauq ki duniya mujhe

aap ne mahfil se uThwa kar kahan rakkha mujhe

ai zindagī junūñ na sahī be-ḳhudī sahī

tū kuchh bhī apnī aql se pāgal uThā to lā

ai zindagi junun na sahi be-KHudi sahi

tu kuchh bhi apni aql se pagal uTha to la

mai ko mire surūr se hāsil surūr thā

maiñ thā nashe meñ chuur nasha mujh meñ chuur thā

mai ko mere surur se hasil surur tha

main tha nashe mein chur nasha mujh mein chur tha

hameñ jo yaad hai ham to usī se kaam lete haiñ

kisī kā naam lenā ho usī kā naam lete haiñ

hamein jo yaad hai hum to usi se kaam lete hain

kisi ka nam lena ho usi ka nam lete hain

ham to masjid se bhī māyūs hī aa.e 'nātiq'

koī allāh kā banda to musalmāñ hotā

hum to masjid se bhi mayus hi aae 'natiq'

koi allah ka banda to musalman hota

vafā par naaz ham ko un ko apnī bevafā.ī par

koī muñh aa.ine meñ dekhtā hai koī paanī meñ

wafa par naz hum ko un ko apni bewafai par

koi munh aaine mein dekhta hai koi pani mein

haañ jaan to deñge magar ai maut abhī dam le

aisā na kaheñ vo ki ham aa.e to chale aap

han jaan to denge magar ai maut abhi dam le

aisa na kahen wo ki hum aae to chale aap

rah ke achchhā bhī kuchh bhalā na huā

maiñ burā ho gayā burā na huā

rah ke achchha bhi kuchh bhala na hua

main bura ho gaya bura na hua

be-ḳhud-e-shauq huuñ aatā hai ḳhudā yaad mujhe

rāsta bhuul ke baiThā huuñ sanam-ḳhāne kā

be-KHud-e-shauq hun aata hai KHuda yaad mujhe

rasta bhul ke baiTha hun sanam-KHane ka

mujh se nārāz haiñ jo log vo ḳhush haiñ un se

maiñ judā chiiz huuñ 'nātiq' mire ash.ār judā

mujh se naraaz hain jo log wo KHush hain un se

main juda chiz hun 'natiq' mere ashaar juda

ab maiñ kyā tum se apnā haal kahūñ

ba-ḳhudā yaad bhī nahīñ mujh ko

ab main kya tum se apna haal kahun

ba-KHuda yaad bhi nahin mujh ko

ġham-o-andoh kā lashkar bhī chalā aatā hai

ek ghoḌ-dauḌ sī hai umr-e-gurezāñ ke qarīb

gham-o-andoh ka lashkar bhi chala aata hai

ek ghoD-dauD si hai umr-e-gurezan ke qarib

aise bohtān lagā.e ki ḳhudā yaad aayā

but ne ghabrā ke kahā mujh se ki qur.ān uThā

aise bohtan lagae ki KHuda yaad aaya

but ne ghabra ke kaha mujh se ki quran uTha

ham paañv bhī paḌte haiñ to allāh-re naḳhvat

hotā hai ye irshād ki paḌte haiñ gale aap

hum panw bhi paDte hain to allah-re naKHwat

hota hai ye irshad ki paDte hain gale aap

ab jahāñ meñ baaqī hai aah se nishāñ apnā

uḌ ga.e dhueñ apne rah gayā dhuāñ apnā

ab jahan mein baqi hai aah se nishan apna

uD gae dhuen apne rah gaya dhuan apna

ik harf-e-shikāyat par kyuuñ ruuTh ke jaate ho

jaane do ga.e shikve aa jaao maiñ baaz aayā

ek harf-e-shikayat par kyun ruTh ke jate ho

jaane do gae shikwe aa jao main baz aaya

kyā karūñ ai dil-e-māyūs zarā ye to batā

kyā kiyā karte haiñ sadmoñ se hirāsāñ ho kar

kya karun ai dil-e-mayus zara ye to bata

kya kiya karte hain sadmon se hirasan ho kar

dūsroñ ko kyā kahiye dūsrī hai duniyā hī

ek ek apne ko ham ne dūsrā paayā

dusron ko kya kahiye dusri hai duniya hi

ek ek apne ko hum ne dusra paya

kashtī hai ghaaT par tū chale kyuuñ na duur aaj

kal bas chale chale na chale chal uThā to lā

kashti hai ghaT par tu chale kyun na dur aaj

kal bas chale chale na chale chal uTha to la

ho ga.ī āvāragardī be-gharī kī parda-dār

kaam jitnā ham ko aatā thā vo kaam aa hī gayā

ho gai aawaragardi be-ghari ki parda-dar

kaam jitna hum ko aata tha wo kaam aa hi gaya

aa umr-e-rafta hashr ke dam-ḳham bhī dekh leñ

tūfān-e-zindagī kī vo halchal uThā to lā

aa umr-e-rafta hashr ke dam-KHam bhi dekh len

tufan-e-zindagi ki wo halchal uTha to la

pahlī bāteñ haiñ na pahle kī mulāqāteñ haiñ

ab dinoñ meñ vo rahā lutf na rātoñ meñ rahā

pahli baaten hain na pahle ki mulaqaten hain

ab dinon mein wo raha lutf na raaton mein raha

ghar banāne kī baḌī fikr hai duniyā meñ hameñ

sāhab-e-ḳhāna bane jaate haiñ mehmāñ ho kar

ghar banane ki baDi fikr hai duniya mein hamein

sahab-e-KHana bane jate hain mehman ho kar

kahne vaale vo sunñe vaalā maiñ

ek bhī aaj dūsrā na huā

kahne wale wo sunne wala main

ek bhi aaj dusra na hua

pahuñchā.egā nahīñ tū Thikāne lagā.egā

ab us galī meñ ġhair ko rahbar banā.eñge

pahunchaega nahin tu Thikane lagaega

ab us gali mein ghair ko rahbar banaenge

mile murād hamārī magar mile bhī kahīñ

ḳhudā kare magar aisā ḳhudā nahīñ kartā

mile murad hamari magar mile bhi kahin

KHuda kare magar aisa KHuda nahin karta

nazar aatā nahīñ ab ghar meñ vo bhī uf re tanhā.ī

ik ā.īne meñ pahle aadmī thā merī sūrat kā

nazar aata nahin ab ghar mein wo bhi uf re tanhai

ek aaine mein pahle aadmi tha meri surat ka

rahtī hai shams-o-qamar ko tire saa.e kī talāsh

raushnī DhūñDhtī phirtī hai añdherā terā

rahti hai shams-o-qamar ko tere sae ki talash

raushni DhunDhti phirti hai andhera tera

majnūñ se jo nafrat hai dīvānī hai tū lailā

vo ḳhaak uḌātā hai lekin nahīñ dil mailā

majnun se jo nafrat hai diwani hai tu laila

wo KHak uData hai lekin nahin dil maila

hañgāma-e-hayāt se lenā to kuchh nahīñ

haañ dekhte chalo ki tamāshā hai raah kā

hangama-e-hayat se lena to kuchh nahin

han dekhte chalo ki tamasha hai rah ka

rasm-e-talab meñ kyā hai samajh kar uThā qadam

aa tujh ko ham batā.eñ ki kyā maañg kyā na maañg

rasm-e-talab mein kya hai samajh kar uTha qadam

aa tujh ko hum bataen ki kya mang kya na mang

vahāñ se le ga.ī nākām badbaḳhtoñ ko ḳhud-kāmī

jahāñ chashm-e-karam se ḳhud-ba-ḳhud kuchh kaam honā thā

wahan se le gai nakaam badbaKHton ko KHud-kaami

jahan chashm-e-karam se KHud-ba-KHud kuchh kaam hona tha

ab gardish-e-daurāñ ko le aate haiñ qaabū meñ

ham daur chalāte haiñ saaqī se kaho mai lā

ab gardish-e-dauran ko le aate hain qabu mein

hum daur chalate hain saqi se kaho mai la

dūsrā aisā kahāñ ai dasht ḳhalvat kā maqām

apnī vīrānī ko le kar mere vīrāne meñ aa

dusra aisa kahan ai dasht KHalwat ka maqam

apni virani ko le kar mere virane mein aa

dostī kis kī rahī yaad vo kis par bhūlā

dūsrā biich meñ kaun aa ke marā mere ba.ad

dosti kis ki rahi yaad wo kis par bhula

dusra bich mein kaun aa ke mara mere baad